{"collection":"Bible & Christianity","html_url":"https://unchartedknowledge.5gfusion.net/browse/bib/vul/est016.htm","path":"bib/vul/est016.htm","source_url":"https://sacred-texts.com/bib/vul/est016.htm","text":"1 Rex magnus Artaxerxes ab India usque \u00c6thiopiam, centum viginti septem provinciarum ducibus ac principibus qui nostr\u00e6 jussioni obediunt, salutem dicit.\n2 Multi bonitate principum et honore, qui in eos collatus est, abusi sunt in superbiam:\n3 et non solum subjectos regibus nituntur opprimere, sed datam sibi gloriam non ferentes, in ipsos qui dederunt, moliuntur insidias.\n4 Nec contenti sunt gratias non agere beneficiis, et humanitatis in se jura violare, sed Dei quoque cuncta cernentis arbitrantur se posse fugere sententiam.\n5 Et in tantum vesani\u00e6 proruperunt, ut eos qui credita sibi officia diligenter observant, et ita cuncta agunt ut omnium laude digni sint, mendaciorum cuniculis conentur subvertere,\n6 dum aures principum simplices, et ex sua natura alios \u00e6stimantes, callida fraude decipiunt.\n7 Qu\u00e6 res et ex veteribus probatur historiis, et ex his qu\u00e6 geruntur quotidie, quomodo malis quorumdam suggestionibus regum studia depraventur.\n8 Unde providendum est paci omnium provinciarum.\n9\u00a0Nec putare debetis, si diversa jubeamus, ex animi nostri venire levitate, sed pro qualitate et necessitate temporum, ut reipublic\u00e6 poscit utilitas, ferre sententiam.\n \n10 Et ut manifestius quod dicimus intelligatis, Aman filius Amadathi, et animo et gente Macedo, alienusque a Persarum sanguine, et pietatem nostram sua crudelitate commaculans, peregrinus a nobis susceptus est:\n11 et tantam in se expertus humanitatem, ut pater noster vocaretur, et adoraretur ab omnibus post regem secundus:\n12 qui in tantum arroganti\u00e6 tumorem sublatus est, ut regno privare nos niteretur et spiritu.\n13 Nam Mardoch\u00e6um, cujus fide et beneficiis vivimus, et consortem regni nostri Esther cum omni gente sua, novis quibusdam atque inauditis machinis expetivit in mortem:\n14 hoc cogitans ut illis interfectis, insidiaretur nostr\u00e6 solitudini, et regnum Persarum transferret in Macedonas.\n15 Nos autem a pessimo mortalium Jud\u00e6os neci destinatos, in nulla penitus culpa reperimus, sed e contrario justis utentes legibus,\n16 et filios altissimi et maximi semperque viventis Dei, cujus beneficio et patribus nostris et nobis regnum est traditum, et usque hodie custoditur.\n17 Unde eas litteras, quas sub nomine nostro ille direxerat, sciatis esse irritas.\n18 Pro quo scelere ante portas hujus urbis, id est, Susan, et ipse qui machinatus est, et omnis cognatio ejus pendet in patibulis: non nobis, sed Deo reddente ei quod meruit.\n19 Hoc autem edictum, quod nunc mittimus, in cunctis urbibus proponatur, ut liceat Jud\u00e6is uti legibus suis.\n20 Quibus debetis esse adminiculo, ut eos qui se ad necem eorum paraverant, possint interficere tertiadecima die mensis duodecimi, qui vocatur Adar.\n21 Hanc enim diem, Deus omnipotens, m\u0153roris et luctus, eis vertit in gaudium.\n22 Unde et vos inter ceteros festos dies, hanc habetote diem, et celebrate eam cum omni l\u00e6titia, ut et in posterum cognoscatur,\n23 omnes qui fideliter Persis obediunt, dignam pro fide recipere mercedem; qui autem insidiantur regno eorum, perire pro scelere.\n24 Omnis autem provincia et civitas qu\u00e6 noluerit solemnitatis hujus esse particeps, gladio et igne pereat, et sic deleatur, ut non solum hominibus, sed etiam bestiis invia sit in sempiternum, pro exemplo contemptus et inobedienti\u00e6.","title":"Vulgate: Esther: Esther Chapter 16","type":"page"}