{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo002.htm","path":"bib/vul/exo002.htm","source_url":"https://sacred-texts.com/bib/vul/exo002.htm","text":"1 Egressus est post h\u00e6c vir de domo Levi: et accepit uxorem stirpis su\u00e6.\n2 Qu\u00e6 concepit, et peperit filium: et videns eum elegantem, abscondit tribus mensibus.\n3 Cumque jam celare non posset, sumpsit fiscellam scirpeam, et linivit eam bitumine ac pice: posuitque intus infantulum, et exposuit eum in carecto rip\u00e6 fluminis,\n4 stante procul sorore ejus, et considerante eventum rei.\n5 Ecce autem descendebat filia Pharaonis ut lavaretur in flumine: et puell\u00e6 ejus gradiebantur per crepidinem alvei. Qu\u00e6 cum vidisset fiscellam in papyrione, misit unam e famulabus suis: et allatam\n6 aperiens, cernensque in ea parvulum vagientem, miserta ejus, ait: De infantibus Hebr\u00e6orum est hic.\n7 Cui soror pueri: Vis, inquit, ut vadam, et vocem tibi mulierem hebr\u00e6am, qu\u00e6 nutrire possit infantulum?\n8 Respondit: Vade. Perrexit puella et vocavit matrem suam.\n9 Ad quam locuta filia Pharaonis: Accipe, ait, puerum istum, et nutri mihi: ego dabo tibi mercedem tuam. Suscepit mulier, et nutrivit puerum: adultumque tradidit fili\u00e6 Pharaonis.\n10\u00a0Quem illa adoptavit in locum filii, vocavitque nomen ejus Moyses, dicens: Quia de aqua tuli eum.\n \n11 In diebus illis postquam creverat Moyses, egressus est ad fratres suos: viditque afflictionem eorum, et virum \u00e6gyptium percutientem quemdam de Hebr\u00e6is fratribus suis.\n12 Cumque circumspexisset huc atque illuc, et nullum adesse vidisset, percussum \u00c6gyptium abscondit sabulo.\n13 Et egressus die altero conspexit duos Hebr\u00e6os rixantes: dixitque ei qui faciebat injuriam: Quare percutis proximum tuum?\n14\u00a0Qui respondit: Quis te constituit principem et judicem super nos? num occidere me tu vis, sicut heri occidisti \u00c6gyptium? Timuit Moyses, et ait: Quomodo palam factum est verbum istud?\n \n15 Audivitque Pharao sermonem hunc, et qu\u00e6rebat occidere Moysen: qui fugiens de conspectu ejus, moratus est in terra Madian, et sedit juxta puteum.\n16 Erant autem sacerdoti Madian septem fili\u00e6, qu\u00e6 venerunt ad hauriendam aquam: et impletis canalibus adaquare cupiebant greges patris sui.\n17 Supervenere pastores, et ejecerunt eas: surrexitque Moyses, et defensis puellis, adaquavit oves earum.\n18 Qu\u00e6 cum revertissent ad Raguel patrem suum, dixit ad eas: Cur velocius venistis solito?\n19 Responderunt: Vir \u00e6gyptius liberavit nos de manu pastorum: insuper et hausit aquam nobiscum, potumque dedit ovibus.\n20 At ille: Ubi est? inquit: quare dimisistis hominem? vocate eum ut comedat panem.\n21 Juravit ergo Moyses quod habitaret cum eo. Accepitque Sephoram filiam ejus uxorem:\n22\u00a0qu\u00e6 peperit ei filium, quem vocavit Gersam, dicens: Advena fui in terra aliena. Alterum vero peperit, quem vocavit Eliezer, dicens: Deus enim patris mei adjutor meus eripuit me de manu Pharaonis.\n \n23 Post multum vero tempore mortuus est rex \u00c6gypti: et ingemiscentes filii Isra\u00ebl, propter opera vociferati sunt: ascenditque clamor eorum ad Deum ab operibus.\n24 Et audivit gemitum eorum, ac recordatus est f\u0153deris quod pepigit cum Abraham, Isaac et Jacob.\n25 Et respexit Dominus filios Isra\u00ebl et cognovit eos.","title":"Vulgate: Exodus: Exodus Chapter 2","type":"page"}