{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo004.htm","path":"bib/vul/exo004.htm","source_url":"https://sacred-texts.com/bib/vul/exo004.htm","text":"1 Respondens Moyses ait: Non credent mihi, neque audient vocem meam, sed dicent: Non apparuit tibi Dominus.\n2 Dixit ergo ad eum: Quid est quod tenes in manu tua? Respondit: Virga.\n3 Dixitque Dominus: Projice eam in terram. Projecit, et versa est in colubrum, ita ut fugeret Moyses.\n4 Dixitque Dominus: Extende manum tuam, et apprehende caudam ejus. Extendit, et tenuit, versaque est in virgam.\n5 Ut credant, inquit, quod apparuerit tibi Dominus Deus patrum suorum, Deus Abraham, Deus Isaac et Deus Jacob.\n6 Dixitque Dominus rursum: Mitte manum tuam in sinum tuum. Quam cum misisset in sinum, protulit leprosam instar nivis.\n7 Retrahe, ait, manum tuam in sinum tuum. Retraxit, et protulit iterum, et erat similis carni reliqu\u00e6.\n8 Si non crediderint, inquit, tibi, neque audierint sermonem signi prioris, credent verbo signi sequentis.\n9\u00a0Quod si nec duobus quidem his signis crediderint, neque audierint vocem tuam: sume aquam fluminis, et effunde eam super aridam, et quidquid hauseris de fluvio, vertetur in sanguinem.\n \n10 Ait Moyses: Obsecro, Domine, non sum eloquens ab heri et nudiustertius: et ex quo locutus es ad servum tuum, impeditioris et tardioris lingu\u00e6 sum.\n11 Dixit Dominus ad eum: Quis fecit os hominis? aut quis fabricatus est mutum et surdum, videntem et c\u00e6cum? nonne ego?\n12 Perge, igitur, et ego ero in ore tuo: doceboque te quid loquaris.\n13 At ille: Obsecro, inquit, Domine, mitte quem missurus es.\n14 Iratus Dominus in Moysen, ait: Aaron frater tuus Levites, scio quod eloquens sit: ecce ipse egreditur in occursum tuum, vidensque te l\u00e6tabitur corde.\n15 Loquere ad eum, et pone verba mea in ore ejus: et ego ero in ore tuo, et in ore illius, et ostendam vobis quid agere debeatis.\n16 Ipse loquetur pro te ad populum, et erit os tuum: tu autem eris ei in his qu\u00e6 ad Deum pertinent.\n17 Virgam quoque hanc sume in manu tua, in qua facturus es signa.\n18\u00a0Abiit Moyses, et reversus est ad Jethro socerum suum, dixitque ei: Vadam et revertar ad fratres meos in \u00c6gyptum, ut videam si adhuc vivant. Cui ait Jethro: Vade in pace.\n \n19 Dixit ergo Dominus ad Moysen in Madian: Vade, et revertere in \u00c6gyptum, mortui sunt enim omnes qui qu\u00e6rebant animam tuam.\n20 Tulit ergo Moyses uxorem suam, et filios suos, et imposuit eos super asinum: reversusque est in \u00c6gyptum, portans virgam Dei in manu sua.\n21 Dixitque ei Dominus revertenti in \u00c6gyptum: Vide ut omnia ostenta qu\u00e6 posui in manu tua, facias coram Pharaone: ego indurabo cor ejus, et non dimittet populum.\n22 Dicesque ad eum: H\u00e6c dicit Dominus: Filius meus primogenitus Isra\u00ebl.\n23 Dixi tibi: Dimitte filium meum ut serviat mihi; et noluisti dimittere eum: ecce ego interficiam filium tuum primogenitum.\n24 Cumque esset in itinere, in diversorio occurrit ei Dominus, et volebat occidere eum.\n25 Tulit idcirco Sephora acutissimam petram, et circumcidit pr\u00e6putium filii sui, tetigitque pedes ejus, et ait: Sponsus sanguinum tu mihi es.\n26 Et dimisit eum postquam dixerat: Sponsus sanguinum ob circumcisionem.\n27 Dixit autem Dominus ad Aaron: Vade in occursum Moysi in desertum. Qui perrexit obviam ei in montem Dei, et osculatus est eum.\n28 Narravitque Moyses Aaron omnia verba Domini quibus miserat eum, et signa qu\u00e6 mandaverat.\n29 Veneruntque simul, et congregaverunt cunctos seniores filiorum Isra\u00ebl.\n30 Locutusque est Aaron omnia verba qu\u00e6 dixerat Dominus ad Moysen: et fecit signa coram populo,\n31 et credidit populus. Audieruntque quod visitasset Dominus filios Isra\u00ebl, et respexisset afflictionem illorum: et proni adoraverunt.","title":"Vulgate: Exodus: Exodus Chapter 4","type":"page"}