{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo006.htm","path":"bib/vul/exo006.htm","source_url":"https://sacred-texts.com/bib/vul/exo006.htm","text":"1 Dixitque Dominus ad Moysen: Nunc videbis qu\u00e6 facturus sim Pharaoni: per manum enim fortem dimittet eos, et in manu robusta ejiciet illos de terra sua.\n2 Locutusque est Dominus ad Moysen dicens: Ego Dominus\n3 qui apparui Abraham, Isaac et Jacob in Deo omnipotente: et nomen meum Adonai non indicavi eis.\n4 Pepigique f\u0153dus cum eis, ut darem eis terram Chanaan, terram peregrinationis eorum, in qua fuerunt adven\u00e6.\n5 Ego audivi gemitum filiorum Isra\u00ebl, quo \u00c6gyptii oppresserunt eos: et recordatus sum pacti mei.\n6 Ideo dic filiis Isra\u00ebl: Ego Dominus qui educam vos de ergastulo \u00c6gyptiorum, et eruam de servitute, ac redimam in brachio excelso et judiciis magnis.\n7 Et assumam vos mihi in populum, et ero vester Deus: et scietis quod ego sum Dominus Deus vester qui eduxerim vos de ergastulo \u00c6gyptiorum,\n8\u00a0et induxerim in terram, super quam levavi manum meam ut darem eam Abraham, Isaac et Jacob: daboque illam vobis possidendam. Ego Dominus.\n \n9 Narravit ergo Moyses omnia filiis Isra\u00ebl: qui non acquieverunt ei propter angustiam spiritus, et opus durissimum.\n10 Locutusque est Dominus ad Moysen, dicens:\n11 Ingredere, et loquere ad Pharaonem regem \u00c6gypti, ut dimittat filios Isra\u00ebl de terra sua.\n12 Respondit Moyses coram Domino: Ecce filii Isra\u00ebl non audiunt me: et quomodo audiet Pharao, pr\u00e6sertim cum incircumcisus sim labiis?\n13\u00a0Locutusque est Dominus ad Moysen et Aaron, et dedit mandatum ad filios Isra\u00ebl, et ad Pharaonem regem \u00c6gypti ut educerent filios Isra\u00ebl de terra \u00c6gypti.\n \n14 Isti sunt principes domorum per familias suas. Filii Ruben primogeniti Isra\u00eblis: Henoch et Phallu, Hesron et Charmi:\n15 h\u00e6 cognationes Ruben. Filii Simeon: Jamuel, et Jamin, et Ahod, et Jachin, et Soar, et Saul filius Chananitidis: h\u00e6 progenies Simeon.\n16 Et h\u00e6c nomina filiorum Levi per cognationes suas: Gerson, et Caath, et Merari. Anni autem vit\u00e6 Levi fuerunt centum triginta septem.\n17 Filii Gerson: Lobni et Semei, per cognationes suas.\n18 Filii Caath: Amram, et Isaar, et Hebron, et Oziel; anni quoque vit\u00e6 Caath, centum triginta tres.\n19 Filii Merari: Moholi et Musi: h\u00e6 cognationes Levi per familias suas.\n20 Accepit autem Amram uxorem Jochabed patruelem suam: qu\u00e6 peperit ei Aaron et Moysen. Fueruntque anni vit\u00e6 Amram, centum triginta septem.\n21 Filii quoque Isaar: Core, et Nepheg, et Zechri.\n22 Filii quoque Oziel: Misa\u00ebl, et Elisaphan, et Sethri.\n23 Accepit autem Aaron uxorem Elisabeth filiam Aminadab, sororem Nahason, qu\u00e6 peperit ei Nadab, et Abiu, et Eleazar, et Ithamar.\n24 Filii quoque Core: Aser, et Elcana, et Abiasaph: h\u00e6 sunt cognationes Coritarum.\n25 At vero Eleazar filius Aaron accepit uxorem de filiabus Phutiel: qu\u00e6 peperit ei Phinees. Hi sunt principes familiarum Leviticarum per cognationes suas.\n26 Iste est Aaron et Moyses, quibus pr\u00e6cepit Dominus ut educerent filios Isra\u00ebl de terra \u00c6gypti per turmas suas.\n27 Hi sunt, qui loquuntur ad Pharaonem regem \u00c6gypti, ut educant filios Isra\u00ebl de \u00c6gypto: iste est Moyses et Aaron,\n28\u00a0in die qua locutus est Dominus ad Moysen, in terra \u00c6gypti.\n \n29 Et locutus est Dominus ad Moysen, dicens: Ego Dominus: loquere ad Pharaonem regem \u00c6gypti, omnia qu\u00e6 ego loquor tibi.\n30 Et ait Moyses coram Domino: En incircumcisus labiis sum, quomodo audiet me Pharao?","title":"Vulgate: Exodus: Exodus Chapter 6","type":"page"}