{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo008.htm","path":"bib/vul/exo008.htm","source_url":"https://sacred-texts.com/bib/vul/exo008.htm","text":"1 Dixit quoque Dominus ad Moysen: Ingredere ad Pharaonem, et dices ad eum: H\u00e6c dicit Dominus: Dimitte populum meum, ut sacrificet mihi:\n2 sin autem nolueris dimittere, ecce ego percutiam omnes terminos tuos ranis,\n3 et ebulliet fluvius ranas: qu\u00e6 ascendent, et ingredientur domum tuam, et cubiculum lectuli tui, et super stratum tuum, et in domos servorum tuorum, et in populum tuum, et in furnos tuos, et in reliquias ciborum tuorum:\n4 et ad te, et ad populum tuum, et ad omnes servos tuos intrabunt ran\u00e6.\n5 Dixitque Dominus ad Moysen: Dic ad Aaron: Extende manum tuam super fluvios ac super rivos et paludes, et educ ranas super terram \u00c6gypti.\n6 Et extendit Aaron manum super aquas \u00c6gypti, et ascenderunt ran\u00e6, operueruntque terram \u00c6gypti.\n7 Fecerunt autem et malefici per incantationes suas similiter, eduxeruntque ranas super terram \u00c6gypti.\n8 Vocavit autem Pharao Moysen et Aaron, et dixit eis: Orate Dominum ut auferat ranas a me et a populo meo, et dimittam populum ut sacrificet Domino.\n9 Dixitque Moyses ad Pharaonem: Constitue mihi quando deprecer pro te, et pro servis tuis, et pro populo tuo, ut abigantur ran\u00e6 a te, et a domo tua, et a servis tuis, et a populo tuo: et tantum in flumine remaneant.\n10 Qui respondit: Cras. At ille: Juxta, inquit, verbum tuum faciam: ut scias quoniam non est sicut Dominus Deus noster.\n11 Et recedent ran\u00e6 a te, et a domo tua, et a servis tuis, et a populo tuo: et tantum in flumine remanebunt.\n12 Egressique sunt Moyses et Aaron a Pharaone: et clamavit Moyses ad Dominum pro sponsione ranarum quam condixerat Pharaoni.\n13 Fecitque Dominus juxta verbum Moysi: et mortu\u00e6 sunt ran\u00e6 de domibus, et de villis, et de agris.\n14 Congregaveruntque eas in immensos aggeres, et computruit terra.\n15\u00a0Videns autem Pharao quod data esset requies, ingravavit cor suum, et non audivit eos, sicut pr\u00e6ceperat Dominus.\n \n16 Dixitque Dominus ad Moysen: Loquere ad Aaron: Extende virgam tuam, et percute pulverem terr\u00e6: et sint sciniphes in universa terra \u00c6gypti.\n17 Feceruntque ita. Et extendit Aaron manum, virgam tenens: percussitque pulverem terr\u00e6, et facti sunt sciniphes in hominibus, et in jumentis: omnis pulvis terr\u00e6 versus est in sciniphes per totam terram \u00c6gypti.\n18 Feceruntque similiter malefici incantationibus suis, ut educerent sciniphes, et non potuerunt: erantque sciniphes tam in hominibus quam in jumentis.\n19\u00a0Et dixerunt malefici ad Pharaonem: Digitus Dei est hic; induratumque est cor Pharaonis, et non audivit eos sicut pr\u00e6ceperat Dominus.\n \n20 Dixit quoque Dominus ad Moysen: Consurge diluculo, et sta coram Pharaone: egredietur enim ad aquas: et dices ad eum: H\u00e6c dicit Dominus: Dimitte populum meum ut sacrificet mihi.\n21 Quod si non dimiseris eum, ecce ego immittam in te, et in servos tuos, et in populum tuum, et in domos tuas, omne genus muscarum: et implebuntur domus \u00c6gyptiorum muscis diversi generis, et universa terra in qua fuerint.\n22 Faciamque mirabilem in die illa terram Gessen, in qua populus meus est, ut non sint ibi musc\u00e6: et scias quoniam ego Dominus in medio terr\u00e6.\n23 Ponamque divisionem inter populum meum et populum tuum: cras erit signum istud.\n24 Fecitque Dominus ita. Et venit musca gravissima in domos Pharaonis et servorum ejus, et in omnem terram \u00c6gypti: corruptaque est terra ab hujuscemodi muscis.\n25 Vocavitque Pharao Moysen et Aaron, et ait eis: Ite et sacrificate Deo vestro in terra hac.\n26 Et ait Moyses: Non potest ita fieri: abominationes enim \u00c6gyptiorum immolabimus Domino Deo nostro: quod si mactaverimus ea qu\u00e6 colunt \u00c6gyptii coram eis, lapidibus nos obruent.\n27 Viam trium dierum pergemus in solitudinem: et sacrificabimus Domino Deo nostro, sicut pr\u00e6cepit nobis.\n28 Dixitque Pharao: Ego dimittam vos ut sacrificetis Domino Deo vestro in deserto: verumtamen longius ne abeatis, rogate pro me.\n29 At ait Moyses: Egressus a te, orabo Dominum: et recedet musca a Pharaone, et a servis suis, et a populo ejus cras: verumtamen noli ultra fallere, ut non dimittas populum sacrificare Domino.\n30 Egressusque Moyses a Pharaone, oravit Dominum.\n31 Qui fecit juxta verbum illius, et abstulit muscas a Pharaone, et a servis suis, et a populo ejus: non superfuit ne una quidem.\n32 Et ingravatum est cor Pharaonis, ita ut nec hac quidem vice dimitteret populum.","title":"Vulgate: Exodus: Exodus Chapter 8","type":"page"}