{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo022.htm","path":"bib/vul/exo022.htm","source_url":"https://sacred-texts.com/bib/vul/exo022.htm","text":"1 Si quis furatus fuerit bovem aut ovem, et occiderit vel vendiderit: quinque boves pro uno bove restituet, et quatuor oves pro una ove.\n2 Si effringens fur domum sive suffodiens fuerit inventus, et accepto vulnere mortuus fuerit, percussor non erit reus sanguinis.\n3 Quod si orto sole hoc fecerit, homicidium perpetravit, et ipse morietur. Si non habuerit quod pro furto reddat, ipse venundabitur.\n4\u00a0Si inventum fuerit apud eum quod furatus est, vivens: sive bos, sive asinus, sive ovis, duplum restituet.\n \n5 Si l\u00e6serit quispiam agrum vel vineam, et dimiserit jumentum suum ut depascatur aliena: quidquid optimum habuerit in agro suo, vel in vinea, pro damni \u00e6stimatione restituet.\n6 Si egressus ignis invenerit spinas, et comprehenderit acervos frugum, sive stantes segetes in agris, reddet damnum qui ignem succenderit.\n7 Si quis commendaverit amico pecuniam aut vas in custodiam, et ab eo, qui susceperat, furto ablata fuerint: si invenitur fur, duplum reddet:\n8 si latet fur, dominus domus applicabitur ad deos, et jurabit quod non extenderit manum in rem proximi sui,\n9 ad perpetrandam fraudem, tam in bove quam in asino, et ove ac vestimento, et quidquid damnum inferre potest: ad deos utriusque causa perveniet, et si illi judicaverit, duplum restituet proximo suo.\n10 Si quis commendaverit proximo suo asinum, bovem, ovem, et omne jumentum ad custodiam, et mortuum fuerit, aut debilitatum, vel captum ab hostibus, nullusque hoc viderit:\n11 jusjurandum erit in medio, quod non extenderit manum ad rem proximi sui: suscipietque dominus juramentum, et ille reddere non cogetur.\n12 Quod si furto ablatum fuerit, restituet damnum domino;\n13 si comestum a bestia, deferat ad eum quod occisum est, et non restituet.\n14 Qui a proximo suo quidquam horum mutuo postulaverit, et debilitatum aut mortuum fuerit domino non pr\u00e6sente, reddere compelletur.\n15\u00a0Quod si impr\u00e6sentiarum dominus fuerit, non restituet, maxime si conductum venerat pro mercede operis sui.\n \n16 Si seduxerit quis virginem necdum desponsatam, dormieritque cum ea: dotabit eam, et habebit eam uxorem.\n17 Si pater virginis dare noluerit, reddet pecuniam juxta modum dotis, quam virgines accipere consueverunt.\n18 Maleficos non patieris vivere.\n19 Qui coierit cum jumento, morte moriatur.\n20\u00a0Qui immolat diis, occidetur, pr\u00e6terquam Domino soli.\n \n21 Advenam non contristabis, neque affliges eum: adven\u00e6 enim et ipsi fuistis in terra \u00c6gypti.\n22 Vidu\u00e6 et pupillo non nocebitis.\n23 Si l\u00e6seritis eos, vociferabuntur ad me, et ego audiam clamorem eorum:\n24 et indignabitur furor meus, percutiamque vos gladio, et erunt uxores vestr\u00e6 vidu\u00e6, et filii vestri pupilli.\n25 Si pecuniam mutuam dederis populo meo pauperi qui habitat tecum, non urgebis eum quasi exactor, nec usuris opprimes.\n26 Si pignus a proximo tuo acceperis vestimentum, ante solis occasum reddes ei.\n27 Ipsum enim est solum, quo operitur, indumentum carnis ejus, nec habet aliud in quo dormiat: si clamaverit ad me, exaudiam eum, quia misericors sum.\n28\u00a0Diis non detrahes, et principi populi tui non maledices.\n \n29 Decimas tuas et primitias tuas non tardabis reddere: primogenitum filiorum tuorum dabis mihi.\n30 De bobus quoque, et ovibus similiter facies: septem diebus sit cum matre sua, die octava reddes illum mihi.\n31 Viri sancti eritis mihi: carnem, qu\u00e6 a bestiis fuerit pr\u00e6gustata, non comedetis, sed projicietis canibus.","title":"Vulgate: Exodus: Exodus Chapter 22","type":"page"}