{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo030.htm","path":"bib/vul/exo030.htm","source_url":"https://sacred-texts.com/bib/vul/exo030.htm","text":"1 Facies quoque altare ad adolendum thymiama, de lignis setim,\n2 habens cubitum longitudinis, et alterum latitudinis, id est, quadrangulum, et duos cubitos in altitudine. Cornua ex ipso procedent.\n3 Vestiesque illud auro purissimo, tam craticulam ejus, quam parietes per circuitum, et cornua. Faciesque ei coronam aureolam per gyrum,\n4 et duos annulos aureos sub corona per singula latera, ut mittantur in eos vectes, et altare portetur.\n5 Ipsos quoque vectes facies de lignis setim, et inaurabis.\n6 Ponesque altare contra velum, quod ante arcum pendet testimonii coram propitiatorio quo tegitur testimonium, ubi loquar tibi.\n7 Et adolebit incensum super eo Aaron, suave fragrans, mane. Quando componet lucernas, incendet illud:\n8 et quando collocabit eas ad vesperum, uret thymiama sempiternum coram Domino in generationes vestras.\n9 Non offeretis super eo thymiama compositionis alterius, nec oblationem, et victimam, nec libabitis libamina.\n10\u00a0Et deprecabitur Aaron super cornua ejus semel per annum, in sanguine quod oblatum est pro peccato, et placabit super eo in generationibus vestris. Sanctum sanctorum erit Domino.\n \n11 Locutusque est Dominus ad Moysen, dicens:\n12 Quando tuleris summam filiorum Isra\u00ebl juxta numerum, dabunt singuli pretium pro animabus suis Domino, et non erit plaga in eis, cum fuerint recensiti.\n13 Hoc autem dabit omnis qui transit ad nomen, dimidium sicli juxta mensuram templi (siclus viginti obolos habet); media pars sicli offeretur Domino.\n14 Qui habetur in numero, a viginti annis et supra, dabit pretium.\n15 Dives non addet ad medium sicli, et pauper nihil minuet.\n16\u00a0Susceptamque pecuniam, qu\u00e6 collata est a filiis Isra\u00ebl, trades in usus tabernaculi testimonii, ut sit monimentum eorum coram Domino, et propitietur animabus eorum.\n \n17 Locutusque est Dominus ad Moysen, dicens:\n18 Facies et labrum \u00e6neum cum basi sua ad lavandum: ponesque illud inter tabernaculum testimonii et altare. Et missa aqua,\n19 lavabunt in ea Aaron et filii ejus manus suas ac pedes,\n20 quando ingressuri sunt tabernaculum testimonii, et quando accessuri sunt ad altare, ut offerant in eo thymiama Domino,\n21\u00a0ne forte moriantur; legitimum sempiternum erit ipsi, et semini ejus per successiones.\n \n22 Locutusque est Dominus ad Moysen,\n23 dicens: Sume tibi aromata, prim\u00e6 myrrh\u00e6 et elect\u00e6 quingentos siclos, et cinnamomi medium, id est, ducentos quinquaginta siclos, calami similiter ducentos quinquaginta,\n24 casi\u00e6 autem quingentos siclos, in pondere sanctuarii, olei de olivetis mensuram hin:\n25 faciesque unctionis oleum sanctum, unguentum compositum opere unguentarii,\n26 et unges ex eo tabernaculum testimonii, et arcam testamenti,\n27 mensamque cum vasis suis, et candelabrum, et utensilia ejus, altaria thymiamatis,\n28 et holocausti, et universam supellectilem qu\u00e6 ad cultum eorum pertinet.\n29 Sanctificabisque omnia, et erunt Sancta sanctorum; qui tetigerit ea, sanctificabitur.\n30 Aaron et filios ejus unges, sanctificabisque eos, ut sacerdotio fungantur mihi.\n31 Filiis quoque Isra\u00ebl dices: Hoc oleum unctionis sanctum erit mihi in generationes vestras.\n32 Caro hominis non ungetur ex eo, et juxta compositionem ejus non facietis aliud, quia sanctificatum est, et sanctum erit vobis.\n33 Homo quicumque tale composuerit, et dederit ex eo alieno, exterminabitur de populo suo.\n34 Dixitque Dominus ad Moysen: Sume tibi aromata, stacten et onycha, galbanum boni odoris, et thus lucidissimum; \u00e6qualis ponderis erunt omnia:\n35 faciesque thymiama compositum opere unguentarii, mistum diligenter, et purum, et sanctificatione dignissimum.\n36 Cumque in tenuissimum pulverem universa contuderis, pones ex eo coram tabernaculo testimonii, in quo loco apparebo tibi. Sanctum sanctorum erit vobis thymiama.\n37 Talem compositionem non facietis in usus vestros, quia sanctum est Domino.\n38 Homo quicumque fecerit simile, ut odore illius perfruatur, peribit de populis suis.","title":"Vulgate: Exodus: Exodus Chapter 30","type":"page"}