{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo031.htm","path":"bib/vul/exo031.htm","source_url":"https://sacred-texts.com/bib/vul/exo031.htm","text":"1 Locutusque est Dominus ad Moysen, dicens:\n2 Ecce, vocavi ex nomine Beseleel filium Uri filii Hur de tribu Juda,\n3 et implevi spiritu Dei, sapientia, et intelligentia et scientia in omni opere,\n4 ad excogitandum quidquid fabrefieri potest ex auro, et argento, et \u00e6re,\n5 marmore, et gemmis, et diversitate lignorum.\n6 Dedique ei socium Ooliab filium Achisamech de tribu Dan. Et in corde omnis eruditi posui sapientiam: ut faciant cuncta qu\u00e6 pr\u00e6cepi tibi,\n7 tabernaculum f\u0153deris, et arcam testimonii, et propitiatorium, quod super eam est, et cuncta vasa tabernaculi,\n8 mensamque et vasa ejus, candelabrum purissimum cum vasis suis, et altaris thymiamatis,\n9 et holocausti, et omnia vasa eorum, labrum cum basi sua,\n10 vestes sanctas in ministerio Aaron sacerdoti, et filiis ejus, ut fungantur officio suo in sacris:\n11\u00a0oleum unctionis, et thymiama aromatum in sanctuario, omnia qu\u00e6 pr\u00e6cepi tibi, facient.\n \n12 Et locutus est Dominus ad Moysen, dicens:\n13 Loquere filiis Isra\u00ebl, et dices ad eos: Videte ut sabbatum meum custodiatis: quia signum est inter me et vos in generationibus vestris: ut sciatis quia ego Dominus, qui sanctifico vos.\n14 Custodite sabbatum meum, sanctum est enim vobis: qui polluerit illud, morte morietur; qui fecerit in eo opus, peribit anima illius de medio populi sui.\n15 Sex diebus facietis opus: in die septimo sabbatum est, requies sancta Domino; omnis qui fecerit opus in hac die, morietur.\n16 Custodiant filii Isra\u00ebl sabbatum, et celebrent illud in generationibus suis. Pactum est sempiternum\n17 inter me et filios Isra\u00ebl, signumque perpetuum; sex enim diebus fecit Dominus c\u00e6lum et terram, et in septimo ab opere cessavit.\n18 Deditque Dominus Moysi, completis hujuscemodi sermonibus in monte Sinai, duas tabulas testimonii lapideas, scriptas digito Dei.","title":"Vulgate: Exodus: Exodus Chapter 31","type":"page"}