{"collection":"Bible & Christianity","html_url":"https://unchartedknowledge.5gfusion.net/browse/bib/vul/exo038.htm","path":"bib/vul/exo038.htm","source_url":"https://sacred-texts.com/bib/vul/exo038.htm","text":"1 Fecit et altare holocausti de lignis setim, quinque cubitorum per quadrum, et trium in altitudine:\n2 cujus cornua de angulis procedebant, operuitque illum laminis \u00e6neis.\n3 Et in usus ejus paravit ex \u00e6re vasa diversa, lebetes, forcipes, fuscinulas, uncinos, et ignium receptacula.\n4 Craticulamque ejus in modum retis fecit \u00e6neam, et subter eam in altaris medio arulam,\n5 fusis quatuor annulis per totidem retiaculi summitates, ad immittendos vectes ad portandum:\n6 quos et ipsos fecit de lignis setim, et operuit laminis \u00e6neis:\n7\u00a0induxitque in circulos, qui in lateribus altaris eminebant. Ipsum autem altare non erat solidum, sed cavum ex tabulis, et intus vacuum.\n \n8 Fecit et labrum \u00e6neum cum basi sua de speculis mulierum, qu\u00e6 excubabant in ostio tabernaculi.\n9 Fecit et atrium, in cujus australi plaga erant tentoria de bysso retorta, cubitorum centum,\n10 column\u00e6 \u00e6ne\u00e6 viginti cum basibus suis, capita columnarum, et tota operis c\u00e6latura, argentea.\n11 \u00c6que ad septentrionalem plagam tentoria column\u00e6, basesque et capita columnarum ejusdem mensur\u00e6, et operis ac metalli, erant.\n12 In ea vero plaga, qu\u00e6 ad occidentem respicit, fuerunt tentoria cubitorum quinquaginta, column\u00e6 decem cum basibus suis \u00e6ne\u00e6, et capita columnarum, et tota operis c\u00e6latura, argentea.\n13 Porro contra orientem quinquaginta cubitorum paravit tentoria:\n14 e quibus, quindecim cubitos columnarum trium, cum basibus suis, unum tenebat latus:\n15 et in parte altera (quia inter utraque introitum tabernaculi fecit) quindecim \u00e6que cubitorum erant tentoria, column\u00e6que tres, et bases totidem.\n16 Cuncta atrii tentoria byssus retorta texuerat.\n17 Bases columnarum fuere \u00e6ne\u00e6, capita autem earum cum cunctis c\u00e6laturis suis argentea: sed et ipsas columnas atrii vestivit argento.\n18 Et in introitu ejus opere plumario fecit tentorium ex hyacintho, purpura, vermiculo, ac bysso retorta, quod habebat viginti cubitos in longitudine, altitudo vero quinque cubitorum erat juxta mensuram, quam cuncta atrii tentoria habebant.\n19 Column\u00e6 autem in ingressu fuere quatuor cum basibus \u00e6neis, capitaque earum et c\u00e6latur\u00e6 argente\u00e6.\n20\u00a0Paxillos quoque tabernaculi et atrii per gyrum fecit \u00e6neos.\n \n21 H\u00e6c sunt instrumenta tabernaculi testimonii, qu\u00e6 enumerata sunt juxta pr\u00e6ceptum Moysi in c\u00e6remoniis Levitarum per manum Ithamar filii Aaron sacerdotis:\n22 qu\u00e6 Beseleel filius Uri filii Hur de tribu Juda, Domino per Moysen jubente, compleverat,\n23 juncto sibi socio Ooliab filio Achisamech de tribu Dan: qui et ipse artifex lignorum egregius fuit, et polymitarius atque plumarius ex hyacintho, purpura, vermiculo et bysso.\n24 Omne aurum quod expensum est in opere sanctuarii, et quod oblatum est in donariis, viginti novem talentorum fuit, et septingentorum triginta siclorum ad mensuram sanctuarii.\n25 Oblatum est autem ab his qui transierunt ad numerum a viginti annis et supra, de sexcentis tribus millibus et quingentis quinquaginta armatorum.\n26 Fuerunt pr\u00e6terea centum talenta argenti e quibus conflat\u00e6 sunt bases sanctuarii, et introitus, ubi velum pendet.\n27 Centum bases fact\u00e6 sunt de talentis centum, singulis talentis per bases singulas supputatis.\n28 De mille autem septingentis et septuaginta quinque, fecit capita columnarum, quas et ipsas vestivit argento.\n29 \u00c6ris quoque oblata sunt talenta septuaginta duo millia, et quadringenti supra sicli,\n30 ex quibus fus\u00e6 sunt bases in introitu tabernaculi testimonii, et altare \u00e6neum cum craticula sua, omniaque vasa qu\u00e6 ad usum ejus pertinent,\n31 et bases atrii tam in circuitu quam in ingressu ejus, et paxilli tabernaculi atque atrii per gyrum.","title":"Vulgate: Exodus: Exodus Chapter 38","type":"page"}