{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze001.htm","path":"bib/vul/eze001.htm","source_url":"https://sacred-texts.com/bib/vul/eze001.htm","text":"1 Et factum est in trigesimo anno, in quarto, in quinta mensis, cum essem in medio captivorum juxta fluvium Chobar, aperti sunt c\u00e6li, et vidi visiones Dei.\n2 In quinta mensis, ipse est annus quintus transmigrationis regis Joachim,\n3 factum est verbum Domini ad Ezechielem filium Buzi sacerdotem, in terra Chald\u00e6orum, secus flumen Chobar: et facta est super eum ibi manus Domini.\n4 Et vidi, et ecce ventus turbinis veniebat ab aquilone, et nubes magna, et ignis involvens, et splendor in circuitu ejus: et de medio ejus, quasi species electri, id est, de medio ignis:\n5 et in medio ejus similitudo quatuor animalium. Et hic aspectus eorum, similitudo hominis in eis.\n6 Quatuor facies uni, et quatuor penn\u00e6 uni.\n7 Pedes eorum, pedes recti, et planta pedis eorum quasi planta pedis vituli: et scintill\u00e6 quasi aspectus \u00e6ris candentis.\n8 Et manus hominis sub pennis eorum, in quatuor partibus: et facies et pennas per quatuor partes habebant.\n9 Junct\u00e6que erant penn\u00e6 eorum alterius ad alterum: non revertebantur cum incederent, sed unumquodque ante faciem suam gradiebatur.\n10 Similitudo autem vultus eorum, facies hominis et facies leonis a dextris ipsorum quatuor, facies autem bovis a sinistris ipsorum quatuor, et facies aquil\u00e6 desuper ipsorum quatuor.\n11\u00a0Facies eorum et penn\u00e6 eorum extent\u00e6 desuper: du\u00e6 penn\u00e6 singulorum jungebantur, et du\u00e6 tegebant corpora eorum.\n \n12 Et unumquodque eorum coram facie sua ambulabat: ubi erat impetus spiritus, illuc gradiebantur, nec revertebantur cum ambularent.\n13 Et similitudo animalium, aspectus eorum quasi carbonum ignis ardentium, et quasi aspectus lampadarum: h\u00e6c erat visio discurrens in medio animalium, splendor ignis, et de igne fulgur egrediens.\n14 Et animalia ibant et revertebantur, in similitudinem fulguris coruscantis.\n15 Cumque aspicerem animalia, apparuit rota una super terram juxta animalia, habens quatuor facies.\n16 Et aspectus rotarum et opus earum quasi visio maris: et una similitudo ipsarum quatuor: et aspectus earum et opera quasi sit rota in medio rot\u00e6.\n17 Per quatuor partes earum euntes ibant, et non revertebantur cum ambularent.\n18 Statura quoque erat rotis, et altitudo, et horribilis aspectus: et totum corpus oculis plenum in circuitu ipsarum quatuor.\n19 Cumque ambularent animalia, ambulabant pariter et rot\u00e6 juxta ea: et cum elevarentur animalia de terra, elevabantur simul et rot\u00e6.\n20 Quocumque ibat spiritus, illuc, eunte spiritu, et rot\u00e6 pariter elevabantur sequentes eum: spiritus enim vit\u00e6 erat in rotis.\n21\u00a0Cum euntibus ibant, et cum stantibus stabant: et cum elevatis a terra, pariter elevabantur et rot\u00e6 sequentes ea, quia spiritus vit\u00e6 erat in rotis.\n \n22 Et similitudo super capita animalium firmamenti, quasi aspectus crystalli horribilis, et extenti super capita eorum desuper.\n23 Sub firmamento autem penn\u00e6 eorum rect\u00e6 alterius ad alterum: unumquodque duabus alis velabat corpus suum, et alterum similiter velabatur.\n24 Et audiebam sonum alarum, quasi sonum aquarum multarum, quasi sonum sublimis Dei: cum ambularent, quasi sonus erat multitudinis ut sonus castrorum: cumque starent, demittebantur penn\u00e6 eorum.\n25 Nam cum fieret vox super firmamentum quod erat super caput eorum, stabant, et submittebant alas suas.\n26 Et super firmamentum quod erat imminens capiti eorum, quasi aspectus lapidis sapphiri similitudo throni: et super similitudinem throni similitudo quasi aspectus hominis desuper.\n27 Et vidi quasi speciem electri, velut aspectum ignis, intrinsecus ejus per circuitum: a lumbis ejus et desuper, et a lumbis ejus usque deorsum, vidi quasi speciem ignis splendentis in circuitu,\n28 velut aspectum arcus cum fuerit in nube in die pluvi\u00e6. Hic erat aspectus splendoris per gyrum.","title":"Vulgate: Ezekiel: Ezekiel Chapter 1","type":"page"}