{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze004.htm","path":"bib/vul/eze004.htm","source_url":"https://sacred-texts.com/bib/vul/eze004.htm","text":"1 Et tu, fili hominis, sume tibi laterem, et pones eum coram te, et describes in eo civitatem Jerusalem.\n2 Et ordinabis adversus eam obsidionem, et \u00e6dificabis munitiones, et comportabis aggerem, et dabis contra eam castra, et pones arietes in gyro.\n3\u00a0Et tu sume tibi sartaginem ferream, et pones eam in murum ferreum inter te et inter civitatem: et obfirmabis faciem tuam ad eam, et erit in obsidionem, et circumdabis eam: signum est domui Isra\u00ebl.\n \n4 Et tu dormies super latus tuum sinistrum, et pones iniquitates domus Isra\u00ebl super eo, numero dierum quibus dormies super illud: et assumes iniquitatem eorum.\n5 Ego autem dedi tibi annos iniquitatis eorum, numero dierum trecentos et nonaginta dies: et portabis iniquitatem domus Isra\u00ebl.\n6 Et cum compleveris h\u00e6c, dormies super latus tuum dexterum secundo, et assumes iniquitatem domus Juda quadraginta diebus: diem pro anno, diem, inquam, pro anno, dedi tibi.\n7 Et ad obsidionem Jerusalem convertes faciem tuam, et brachium tuum erit extentum: et prophetabis adversus eam.\n8 Ecce circumdedi te vinculis: et non te convertes a latere tuo in latus aliud, donec compleas dies obsidionis tu\u00e6.\n9 Et tu, sume tibi frumentum, et hordeum, et fabam, et lentem, et milium, et viciam: et mittes ea in vas unum, et facies tibi panes numero dierum quibus dormies super latus tuum: trecentis et nonaginta diebus comedes illud.\n10 Cibus autem tuus, quo vesceris, erit in pondere viginti stateres in die: a tempore usque ad tempus comedes illud.\n11 Et aquam in mensura bibes, sextam partem hin: a tempore usque ad tempus bibes illud.\n12 Et quasi subcinericium hordeaceum comedes illud, et stercore quod egreditur de homine operies illud in oculis eorum.\n13 Et dixit Dominus: Sic comedent filii Isra\u00ebl panem suum pollutum inter gentes ad quas ejiciam eos. Et dixi:\n14 A, a, a, Domine Deus, ecce anima mea non est polluta: et morticinum, et laceratum a bestiis non comedi ab infantia mea usque nunc, et non est ingressa in os meum omnis caro immunda.\n15 Et dixit ad me: Ecce dedi tibi fimum boum pro stercoribus humanis, et facies panem tuum in eo.\n16 Et dixit ad me: Fili hominis, ecce ego conteram baculum panis in Jerusalem, et comedent panem in pondere et in sollicitudine, et aquam in mensura et in angustia bibent,\n17 ut deficientibus pane et aqua, corruat unusquisque ad fratrem suum, et contabescant in iniquitatibus suis.","title":"Vulgate: Ezekiel: Ezekiel Chapter 4","type":"page"}