{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze006.htm","path":"bib/vul/eze006.htm","source_url":"https://sacred-texts.com/bib/vul/eze006.htm","text":"1 Et factus est sermo Domini ad me, dicens:\n2 Fili hominis, pone faciem tuam ad montes Isra\u00ebl, et prophetabis ad eos,\n3\u00a0et dices: [Montes Isra\u00ebl,\n audite verbum Domini Dei.\n H\u00e6c dicit Dominus Deus\n montibus et collibus,\n rupibus et vallibus:\n Ecce ego inducam super vos gladium,\n et disperdam excelsa vestra,\n4\u00a0et demoliar aras vestras,\n et confringentur simulacra vestra,\n et dejiciam interfectos vestros\n ante idola vestra:\n5\u00a0et dabo cadavera filiorum Isra\u00ebl\n ante faciem simulacrorum vestrorum,\n et dispergam ossa vestra\n circum aras vestras:\n6\u00a0in omnibus habitationibus vestris\n urbes desert\u00e6 erunt,\n et excelsa demolientur et dissipabuntur:\n et interibunt ar\u00e6 vestr\u00e6, et confringentur,\n et cessabunt idola vestra,\n et conterentur delubra vestra,\n et delebuntur opera vestra:\n7\u00a0et cadet interfectus in medio vestri,\n et scietis quia ego sum Dominus.\n8\u00a0Et relinquam in vobis eos\n qui fugerint gladium in gentibus,\n cum dispersero vos in terris:\n9\u00a0et recordabuntur mei liberati vestri in gentibus\n ad quas captivi ducti sunt:\n quia contrivi cor eorum\n fornicans et recedens a me,\n et oculos eorum fornicantes post idola sua:\n et displicebunt sibimet super malis\n qu\u00e6 fecerunt in universis abominationibus suis.\n10\u00a0Et scient quia ego Dominus non frustra locutus sum,\n ut facerem eis malum hoc.\n11\u00a0H\u00e6c dicit Dominus Deus:\n Percute manum tuam\n et allide pedem tuum,\n et dic: Heu! ad omnes abominationes malorum domus Isra\u00ebl:\n quia gladio, fame et peste ruituri sunt.\n12\u00a0Qui longe est, peste morietur:\n qui autem prope, gladio corruet:\n et qui relictus fuerit et obsessus, fame morietur:\n et complebo indignationem meam in eis.\n13\u00a0Et scietis quia ego Dominus,\n cum fuerint interfecti vestri in medio idolorum vestrorum,\n in circuitu ararum vestrarum,\n in omni colle excelso,\n et in cunctis summitatibus montium,\n et subtus omne lignum nemorosum,\n et subtus universam quercum frondosam,\n locum ubi accenderunt thura redolentia universis idolis suis.\n14\u00a0Et extendam manum meam super eos:\n et faciam terram desolatam et destitutam,\n a deserto Deblatha, in omnibus habitationibus eorum:\n et scient quia ego Dominus.]","title":"Vulgate: Ezekiel: Ezekiel Chapter 6","type":"page"}