{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze007.htm","path":"bib/vul/eze007.htm","source_url":"https://sacred-texts.com/bib/vul/eze007.htm","text":"1 Et factus est sermo Domini ad me, dicens:\n2\u00a0Et tu, fili hominis, h\u00e6c dicit Dominus Deus terr\u00e6 Isra\u00ebl: [Finis venit: venit finis super quatuor plagas terr\u00e6.\n3\u00a0Nunc finis super te, et immittam furorem meum in te:\n et judicabo te juxta vias tuas,\n et ponam contra te omnes abominationes tuas.\n4\u00a0Et non parcet oculus meus super te, et non miserebor:\n sed vias tuas ponam super te, et abominationes tu\u00e6 in medio tui erunt,\n et scietis quia ego Dominus.\n5\u00a0H\u00e6c dicit Dominus Deus:\n Afflictio una, afflictio ecce venit.\n6\u00a0Finis venit, venit finis:\n evigilavit adversum te, ecce venit.\n7\u00a0Venit contritio super te, qui habitas in terra:\n venit tempus, prope est dies occisionis,\n et non glori\u00e6 montium.\n8\u00a0Nunc de propinquo effundam iram meam super te,\n et complebo furorem meum in te:\n et judicabo te juxta vias tuas,\n et imponam tibi omnia scelera tua,\n9\u00a0et non parcet oculus meus,\n nec miserebor:\n sed vias tuas imponam tibi,\n et abominationes tu\u00e6 in medio tui erunt,\n et scietis quia ego sum Dominus percutiens.\n10\u00a0Ecce dies, ecce venit:\n egressa est contritio,\n floruit virga, germinavit superbia,\n11\u00a0iniquitas surrexit in virga impietatis:\n non ex eis, et non ex populo,\n neque ex sonitu eorum:\n et non erit requies in eis.\n12\u00a0Venit tempus, appropinquavit dies:\n qui emit, non l\u00e6tetur,\n et qui vendit, non lugeat:\n quia ira super omnem populum ejus.\n13\u00a0Quia qui vendit, ad id quod vendidit non revertetur:\n et adhuc in viventibus vita eorum:\n visio enim ad omnem multitudinem ejus non regredietur,\n et vir in iniquitate vit\u00e6 su\u00e6 non confortabitur.]\n \n14\u00a0[Canite tuba, pr\u00e6parentur omnes:\n et non est qui vadat ad pr\u00e6lium:\n ira enim mea super universum populum ejus.\n15\u00a0Gladium foris, et pestis et fames intrinsecus:\n qui in agro est, gladio morietur,\n et qui in civitate, pestilentia et fame devorabuntur.\n16\u00a0Et salvabuntur qui fugerint ex eis:\n et erunt in montibus quasi columb\u00e6 convallium omnes trepidi,\n unusquisque in iniquitate sua.\n17\u00a0Omnes manus dissolventur,\n et omnia genua fluent aquis.\n18\u00a0Et accingent se ciliciis,\n et operiet eos formido:\n et in omni facie confusio,\n et in universis capitibus eorum calvitium.\n19\u00a0Argentum eorum foras projicietur,\n et aurum eorum in sterquilinium erit:\n argentum eorum et aurum eorum\n non valebit liberare eos in die furoris Domini:\n animam suam non saturabunt,\n et ventres eorum non implebuntur,\n quia scandalum iniquitatis eorum factum est.\n20\u00a0Et ornamentum monilium suorum in superbiam posuerunt,\n et imagines abominationum suarum et simulacrorum fecerunt ex eo:\n propter hoc dedi eis illud in immunditiam.\n21\u00a0Et dabo illud in manus alienorum ad diripiendum,\n et impiis terr\u00e6 in pr\u00e6dam,\n et contaminabunt illud.\n22\u00a0Et avertam faciem meam ab eis,\n et violabunt arcanum meum:\n et introibunt in illud emissarii,\n et contaminabunt illud.\n23\u00a0Fac conclusionem,\n quoniam terra plena est judicio sanguinum,\n et civitas plena iniquitate.\n24\u00a0Et adducam pessimos de gentibus,\n et possidebunt domos eorum:\n et quiescere faciam superbiam potentium,\n et possidebunt sanctuaria eorum.\n25\u00a0Angustia superveniente, requirent pacem,\n et non erit.\n26\u00a0Conturbatio super conturbationem veniet,\n et auditus super auditum:\n et qu\u00e6rent visionem de propheta,\n et lex peribit a sacerdote,\n et consilium a senioribus.\n27\u00a0Rex lugebit, et princeps induetur m\u0153rore,\n et manus populi terr\u00e6 conturbabuntur:\n secundum viam eorum faciam eis,\n et secundum judicia eorum judicabo eos,\n et scient quia ego Dominus.]","title":"Vulgate: Ezekiel: Ezekiel Chapter 7","type":"page"}