{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze008.htm","path":"bib/vul/eze008.htm","source_url":"https://sacred-texts.com/bib/vul/eze008.htm","text":"1 Et factum est in anno sexto, in sexto mense, in quinta mensis, ego sedebam in domo mea, et senes Juda sedebant coram me, et cecidit ibi super me manus Domini Dei.\n2 Et vidi: et ecce similitudo quasi aspectus ignis: ab aspectu lumborum ejus et deorsum, ignis: et a lumbis ejus et sursum, quasi aspectus splendoris, ut visio electri.\n3 Et emissa similitudo manus apprehendit me in cincinno capitis mei, et elevavit me spiritus inter terram et c\u00e6lum: et adduxit me in Jerusalem, in visione Dei, juxta ostium interius quod respiciebat ad aquilonem, ubi erat statutum idolum zeli ad provocandam \u00e6mulationem.\n4 Et ecce ibi gloria Dei Isra\u00ebl, secundum visionem quam videram in campo.\n5 Et dixit ad me: Fili hominis, leva oculos tuos ad viam aquilonis. Et levavi oculos meos ad viam aquilonis, et ecce ab aquilone port\u00e6 altaris idolum zeli in ipso introitu.\n6 Et dixit ad me: Fili hominis, putasne vides tu quid isti faciunt, abominationes magnas quas domus Isra\u00ebl facit hic, ut procul recedam a sanctuario meo? et adhuc conversus videbis abominationes majores.\n7 Et introduxit me ad ostium atrii, et vidi, et ecce foramen unum in pariete.\n8 Et dixit ad me: Fili hominis, fode parietem. Et cum fodissem parietem, apparuit ostium unum.\n9 Et dixit ad me: Ingredere, et vide abominationes pessimas quas isti faciunt hic.\n10 Et ingressus vidi, et ecce omnis similitudo reptilium et animalium, abominatio, et universa idola domus Isra\u00ebl, depicta erant in pariete in circuitu per totum:\n11 et septuaginta viri de senioribus domus Isra\u00ebl: et Jezonias filius Saphan stabat in medio eorum stantium ante picturas: et unusquisque habebat thuribulum in manu sua, et vapor nebul\u00e6 de thure consurgebat.\n12 Et dixit ad me: Certe vides, fili hominis, qu\u00e6 seniores domus Isra\u00ebl faciunt in tenebris, unusquisque in abscondito cubiculi sui: dicunt enim: Non videt Dominus nos; dereliquit Dominus terram.\n13 Et dixit ad me: Adhuc conversus videbis abominationes majores, quas isti faciunt.\n14 Et introduxit me per ostium port\u00e6 domus Domini quod respiciebat ad aquilonem, et ecce ibi mulieres sedebant plangentes Adonidem.\n15 Et dixit ad me: Certe vidisti, fili hominis: adhuc conversus videbis abominationes majores his.\n16 Et introduxit me in atrium domus Domini interius, et ecce in ostio templi Domini, inter vestibulum et altare, quasi viginti quinque viri dorsa habentes contra templum Domini, et facies ad orientem: et adorabant ad ortum solis.\n17 Et dixit ad me: Certe vidisti, fili hominis: numquid leve est hoc domui Juda, ut facerent abominationes istas quas fecerunt hic, quia replentes terram iniquitate, conversi sunt ad irritandum me? et ecce applicant ramum ad nares suas.\n18 Ergo et ego faciam in furore: non parcet oculus meus, nec miserebor: et cum clamaverint ad aures meas voce magna, non exaudiam eos.","title":"Vulgate: Ezekiel: Ezekiel Chapter 8","type":"page"}