{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze009.htm","path":"bib/vul/eze009.htm","source_url":"https://sacred-texts.com/bib/vul/eze009.htm","text":"1 Et clamavit in auribus meis voce magna, dicens: Appropinquaverunt visitationes urbis, et unusquisque vas interfectionis habet in manu sua.\n2 Et ecce sex viri veniebant de via port\u00e6 superioris, qu\u00e6 respicit ad aquilonem, et uniuscujusque vas interitus in manu ejus: vir quoque unus in medio eorum vestitus erat lineis, et atramentarium scriptoris ad renes ejus: et ingressi sunt, et steterunt juxta altare \u00e6reum.\n3 Et gloria Domini Isra\u00ebl assumpta est de cherub, qu\u00e6 erat super eum ad limen domus: et vocavit virum qui indutus erat lineis, et atramentarium scriptoris habebat in lumbis suis:\n4 et dixit Dominus ad eum: Transi per mediam civitatem, in medio Jerusalem, et signa thau super frontes virorum gementium et dolentium super cunctis abominationibus qu\u00e6 fiunt in medio ejus.\n5 Et illis dixit, audiente me: Transite per civitatem sequentes eum, et percutite: non parcat oculus vester, neque misereamini:\n6 senem, adolescentulum et virginem, parvulum et mulieres interficite usque ad internecionem: omnem autem super quem videritis thau, ne occidatis: et a sanctuario meo incipite. C\u0153perunt ergo a viris senioribus, qui erant ante faciem domus.\n7 Et dixit ad eos: Contaminate domum, et implete atria interfectis; egredimini. Et egressi sunt, et percutiebant eos qui erant in civitate.\n8 Et c\u00e6de completa, remansi ego, ruique super faciem meam, et clamans aio: Heu! heu! heu! Domine Deus: ergone disperdes omnes reliquias Isra\u00ebl, effundens furorem tuum super Jerusalem?\n9 Et dixit ad me: Iniquitas domus Isra\u00ebl et Juda magna est nimis valde, et repleta est terra sanguinibus, et civitas repleta est aversione: dixerunt enim: Dereliquit Dominus terram, et Dominus non videt.\n10 Igitur et meus non parcet oculus, neque miserebor: viam eorum super caput eorum reddam.\n11 Et ecce vir qui erat indutus lineis, qui habebat atramentarium in dorso suo, respondit verbum, dicens: Feci sicut pr\u00e6cepisti mihi.","title":"Vulgate: Ezekiel: Ezekiel Chapter 9","type":"page"}