{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze011.htm","path":"bib/vul/eze011.htm","source_url":"https://sacred-texts.com/bib/vul/eze011.htm","text":"1 Et elevavit me spiritus, et introduxit me ad portam domus Domini orientalem, qu\u00e6 respicit ad solis ortum: et ecce in introitu port\u00e6 viginti quinque viri: et vidi in medio eorum Jezoniam filium Azur, et Pheltiam filium Banai\u00e6, principes populi.\n2 Dixitque ad me: Fili hominis, hi sunt viri qui cogitant iniquitatem, et tractant consilium pessimum in urbe ista,\n3 dicentes: Nonne dudum \u00e6dificat\u00e6 sunt domus? h\u00e6c est lebes, nos autem carnes.\n4 Idcirco vaticinare de eis, vaticinare, fili hominis.\n5 Et irruit in me spiritus Domini, et dixit ad me: Loquere: H\u00e6c dicit Dominus: Sic locuti estis, domus Isra\u00ebl, et cogitationes cordis vestri ego novi.\n6 Plurimos occidistis in urbe hac, et implestis vias ejus interfectis.\n7 Propterea h\u00e6c dicit Dominus Deus: Interfecti vestri, quos posuistis in medio ejus, hi sunt carnes, et h\u00e6c est lebes: et educam vos de medio ejus.\n8 Gladium metuistis, et gladium inducam super vos, ait Dominus Deus.\n9 Et ejiciam vos de medio ejus, daboque vos in manu hostium, et faciam in vobis judicia.\n10 Gladio cadetis: in finibus Isra\u00ebl judicabo vos, et scietis quia ego Dominus.\n11 H\u00e6c non erit vobis in lebetem, et vos non eritis in medio ejus in carnes: in finibus Isra\u00ebl judicabo vos,\n12 et scietis quia ego Dominus: quia in pr\u00e6ceptis meis non ambulastis, et judicia mea non fecistis, sed juxta judicia gentium qu\u00e6 in circuitu vestro sunt estis operati.\n13\u00a0Et factum est cum prophetarem, Pheltias filius Banai\u00e6 mortuus est: et cecidi in faciem meam clamans voce magna, et dixi: Heu! heu! heu! Domine Deus, consummationem tu facis reliquiarum Isra\u00ebl?\n \n14 Et factum est verbum Domini ad me, dicens:\n15 Fili hominis, fratres tui, fratres tui, viri propinqui tui, et omnis domus Isra\u00ebl, universi quibus dixerunt habitatores Jerusalem: Longe recedite a Domino: nobis data est terra in possessionem.\n16 Propterea h\u00e6c dicit Dominus Deus: Quia longe feci eos in gentibus, et quia dispersi eos in terris: ero eis in sanctificationem modicam in terris ad quas venerunt.\n17 Propterea loquere: H\u00e6c dicit Dominus Deus: Congregabo vos de populis, et adunabo de terris in quibus dispersi estis, daboque vobis humum Isra\u00ebl.\n18 Et ingredientur illuc, et auferent omnes offensiones, cunctasque abominationes ejus de illa.\n19 Et dabo eis cor unum, et spiritum novum tribuam in visceribus eorum: et auferam cor lapideum de carne eorum, et dabo eis cor carneum,\n20 ut in pr\u00e6ceptis meis ambulent, et judicia mea custodiant, faciantque ea, et sint mihi in populum, et ego sim eis in Deum.\n21 Quorum cor post offendicula et abominationes suas ambulat, horum viam in capite suo ponam, dicit Dominus Deus.\n22 Et elevaverunt cherubim alas suas, et rot\u00e6 cum eis, et gloria Dei Isra\u00ebl erat super ea:\n23 et ascendit gloria Domini de medio civitatis, stetitque super montem qui est ad orientem urbis.\n24 Et spiritus levavit me, adduxitque in Chald\u00e6am ad transmigrationem, in visione, in spiritu Dei: et sublata est a me visio quam videram.\n25 Et locutus sum ad transmigrationem omnia verba Domini qu\u00e6 ostenderat mihi.","title":"Vulgate: Ezekiel: Ezekiel Chapter 11","type":"page"}