{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze013.htm","path":"bib/vul/eze013.htm","source_url":"https://sacred-texts.com/bib/vul/eze013.htm","text":"1 Et factus est sermo Domini ad me, dicens:\n2\u00a0Fili hominis, vaticinare ad prophetas Isra\u00ebl qui prophetant, et dices prophetantibus de corde suo: [Audite verbum Domini.\n3\u00a0H\u00e6c dicit Dominus Deus:\n V\u00e6 prophetis insipientibus,\n qui sequuntur spiritum suum,\n et nihil vident!\n4\u00a0Quasi vulpes in desertis prophet\u00e6 tui, Isra\u00ebl, erant.\n5\u00a0Non ascendistis ex adverso,\n neque opposuistis murum pro domo Isra\u00ebl,\n ut staretis in pr\u00e6lio in die Domini.\n6\u00a0Vident vana, et divinant mendacium,\n dicentes: Ait Dominus,\n cum Dominus non miserit eos:\n et perseveraverunt confirmare sermonem.\n7\u00a0Numquid non visionem cassam vidistis,\n et divinationem mendacem locuti estis,\n et dicitis: Ait Dominus,\n cum ego non sim locutus?\n8\u00a0Propterea h\u00e6c dicit Dominus Deus:\n Quia locuti estis vana, et vidistis mendacium,\n ideo ecce ego ad vos, dicit Dominus Deus.\n9\u00a0Et erit manus mea super prophetas\n qui vident vana, et divinant mendacium:\n in consilio populi mei non erunt,\n et in scriptura domus Isra\u00ebl non scribentur,\n nec in terram Isra\u00ebl ingredientur,\n et scietis quia ego Dominus Deus:\n10\u00a0eo quod deceperint populum meum,\n dicentes: Pax, et non est pax:\n et ipse \u00e6dificabat parietem,\n illi autem liniebant eum luto absque paleis.\n11\u00a0Dic ad eos qui liniunt absque temperatura, quod casurus sit:\n erit enim imber inundans,\n et dabo lapides pr\u00e6grandes desuper irruentes,\n et ventum procell\u00e6 dissipantem.\n12\u00a0Siquidem ecce cecidit paries:\n numquid non dicetur vobis:\n Ubi est litura quam linistis?\n13\u00a0Propterea h\u00e6c dicit Dominus Deus:\n Et erumpere faciam spiritum tempestatum in indignatione mea,\n et imber inundans in furore meo erit,\n et lapides grandes in ira in consumptionem.\n14\u00a0Et destruam parietem quem linistis absque temperamento,\n et ad\u00e6quabo eum terr\u00e6,\n et revelabitur fundamentum ejus:\n et cadet, et consumetur in medio ejus,\n et scietis quia ego sum Dominus.\n15\u00a0Et complebo indignationem meam in pariete,\n et in his qui liniunt eum absque temperamento:\n dicamque vobis: Non est paries,\n et non sunt qui liniunt eum:\n16\u00a0prophet\u00e6 Isra\u00ebl, qui prophetant ad Jerusalem,\n et vident ei visionem pacis, et non est pax,\n ait Dominus Deus.]\n \n17 Et tu, fili hominis, pone faciem tuam contra filias populi tui qu\u00e6 prophetant de corde suo: et vaticinare super eas,\n18\u00a0et dic: [H\u00e6c dicit Dominus Deus:\n V\u00e6 qu\u00e6 consuunt pulvillos sub omni cubito manus,\n et faciunt cervicalia sub capite univers\u00e6 \u00e6tatis\n ad capiendas animas:\n et cum caperent animas populi mei,\n vivificabant animas eorum!\n19\u00a0Et violabant me ad populum meum\n propter pugillum hordei, et fragmen panis,\n ut interficerent animas qu\u00e6 non moriuntur,\n et vivificarent animas qu\u00e6 non vivunt,\n mentientes populo meo credenti mendaciis.\n20\u00a0Propter hoc h\u00e6c dicit Dominus Deus:\n Ecce ego ad pulvillos vestros,\n quibus vos capitis animas volantes:\n et dirumpam eos de brachiis vestris,\n et dimittam animas quas vos capitis,\n animas ad volandum.\n21\u00a0Et dirumpam cervicalia vestra,\n et liberabo populum meum de manu vestra,\n neque erunt ultra in manibus vestris ad pr\u00e6dandum:\n et scietis quia ego Dominus.\n22\u00a0Pro eo quod m\u0153rere fecistis cor justi mendaciter,\n quem ego non contristavi,\n et confortastis manus impii,\n ut non reverteretur a via sua mala, et viveret:\n23\u00a0propterea vana non videbitis,\n et divinationes non divinabitis amplius,\n et eruam populum meum de manu vestra:\n et scietis quia ego Dominus.]","title":"Vulgate: Ezekiel: Ezekiel Chapter 13","type":"page"}