{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze014.htm","path":"bib/vul/eze014.htm","source_url":"https://sacred-texts.com/bib/vul/eze014.htm","text":"1 Et venerunt ad me viri seniorum Isra\u00ebl, et sederunt coram me.\n2 Et factus est sermo Domini ad me, dicens:\n3 Fili hominis, viri isti posuerunt immunditias suas in cordibus suis, et scandalum iniquitatis su\u00e6 statuerunt contra faciem suam: numquid interrogatus respondebo eis?\n4 Propter hoc loquere eis, et dices ad eos: H\u00e6c dicit Dominus Deus: Homo, homo de domo Isra\u00ebl, qui posuerit immunditias suas in corde suo, et scandalum iniquitatis su\u00e6 statuerit contra faciem suam, et venerit ad prophetam interrogans per eum me: ego Dominus respondebo ei in multitudine immunditiarum suarum,\n5 ut capiatur domus Isra\u00ebl in corde suo, quo recesserunt a me in cunctis idolis suis.\n6 Propterea dic ad domum Isra\u00ebl: H\u00e6c dicit Dominus Deus: Convertimini, et recedite ab idolis vestris, et ab universis contaminationibus vestris avertite facies vestras.\n7 Quia homo, homo de domo Isra\u00ebl, et de proselytis quicumque advena fuerit in Isra\u00ebl, si alienatus fuerit a me, et posuerit idola sua in corde suo, et scandalum iniquitatis su\u00e6 statuerit contra faciem suam, et venerit ad prophetam ut interroget per eum me: ego Dominus respondebo ei per me:\n8 et ponam faciem meam super hominem illum, et faciam eum in exemplum et in proverbium, et disperdam eum de medio populi mei: et scietis quia ego Dominus.\n9 Et propheta cum erraverit, et locutus fuerit verbum, ego Dominus decepi prophetam illum, et extendam manum meam super illum, et delebo eum de medio populi mei Isra\u00ebl.\n10 Et portabunt iniquitatem suam: juxta iniquitatem interrogantis, sic iniquitas prophet\u00e6 erit:\n11\u00a0ut non erret ultra domus Isra\u00ebl a me, neque polluatur in universis pr\u00e6varicationibus suis: sed sint mihi in populum, et ego sim eis in Deum, ait Dominus exercituum.\n \n12 Et factus est sermo Domini ad me, dicens:\n13\u00a0[Fili hominis, terra cum peccaverit mihi,\n ut pr\u00e6varicetur pr\u00e6varicans,\n extendam manum meam super eam,\n et conteram virgam panis ejus,\n et immittam in eam famem,\n et interficiam de ea hominem et jumentum.\n14\u00a0Et si fuerint tres viri isti in medio ejus,\n No\u00eb, Daniel, et Job,\n ipsi justitia sua liberabunt animas suas,\n ait Dominus exercituum.\n15\u00a0Quod si et bestias pessimas induxero super terram\n ut vastem eam, et fuerit invia,\n eo quod non sit pertransiens propter bestias:\n16\u00a0tres viri isti si fuerint in ea,\n vivo ego, dicit Dominus Deus,\n quia nec filios nec filias liberabunt,\n sed ipsi soli liberabuntur,\n terra autem desolabitur.\n17\u00a0Vel si gladium induxero super terram illam,\n et dixero gladio: Transi per terram:\n et interfecero de ea hominem et jumentum,\n18\u00a0et tres viri isti fuerint in medio ejus:\n vivo ego, dicit Dominus Deus,\n non liberabunt filios neque filias,\n sed ipsi soli liberabuntur.\n19\u00a0Si autem et pestilentiam immisero super terram illam,\n et effudero indignationem meam super eam in sanguine,\n ut auferam ex ea hominem et jumentum,\n20\u00a0et No\u00eb, et Daniel, et Job fuerint in medio ejus:\n vivo ego, dicit Dominus Deus,\n quia filium et filiam non liberabunt,\n sed ipsi justitia sua liberabunt animas suas.\n21\u00a0Quoniam h\u00e6c dicit Dominus Deus:\n Quod etsi quatuor judicia mea pessima,\n gladium, et famem, ac bestias malas, et pestilentiam,\n immisero in Jerusalem,\n ut interficiam de ea hominem et pecus,\n22\u00a0tamen relinquetur in ea salvatio educentium filios et filias:\n ecce ipsi ingredientur ad vos,\n et videbitis viam eorum et adinventiones eorum,\n et consolabimini super malo quod induxi in Jerusalem,\n in omnibus qu\u00e6 importavi super eam.\n23\u00a0Et consolabuntur vos,\n cum videritis viam eorum\n et adinventiones eorum:\n et cognoscetis quod non frustra fecerim omnia qu\u00e6 feci in ea,\n ait Dominus Deus.]","title":"Vulgate: Ezekiel: Ezekiel Chapter 14","type":"page"}