{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze016.htm","path":"bib/vul/eze016.htm","source_url":"https://sacred-texts.com/bib/vul/eze016.htm","text":"1 Et factus est sermo Domini ad me, dicens:\n2 Fili hominis, notas fac Jerusalem abominationes suas,\n3 et dices: H\u00e6c dicit Dominus Deus Jerusalem: Radix tua et generatio tua de terra Chanaan: pater tuus Amorrh\u00e6us, et mater tua Ceth\u00e6a.\n4 Et quando nata es, in die ortus tui non est pr\u00e6cisus umbilicus tuus, et aqua non es lota in salutem, nec sale salita, nec involuta pannis.\n5\u00a0Non pepercit super te oculus, ut faceret tibi unum de his, misertus tui: sed projecta es super faciem terr\u00e6 in abjectione anim\u00e6 tu\u00e6 in die qua nata es.\n \n6 Transiens autem per te, vidi te conculcari in sanguine tuo: et dixi tibi cum esses in sanguine tuo: Vive, dixi, inquam, tibi: in sanguine tuo vive.\n7 Multiplicatam quasi germen agri dedi te: et multiplicata es, et grandis effecta, et ingressa es, et pervenisti ad mundum muliebrem: ubera tua intumuerunt, et pilus tuus germinavit: et eras nuda, et confusione plena.\n8 Et transivi per te, et vidi te: et ecce tempus tuum, tempus amantium: et expandi amictum meum super te, et operui ignominiam tuam: et juravi tibi, et ingressus sum pactum tecum, ait Dominus Deus, et facta es mihi.\n9 Et lavi te aqua, et emundavi sanguinem tuum ex te, et unxi te oleo.\n10 Et vestivi te discoloribus, et calceavi te janthino, et cinxi te bysso, et indui te subtilibus:\n11 et ornavi te ornamento, et dedi armillas in manibus tuis, et torquem circa collum tuum:\n12 et dedi inaurem super os tuum, et circulos auribus tuis, et coronam decoris in capite tuo.\n13\u00a0Et ornata es auro et argento, et vestita es bysso et polymito et multicoloribus: similam, et mel, et oleum comedisti: et decora facta es vehementer nimis, et profecisti in regnum.\n \n14 Et egressum est nomen tuum in gentes propter speciem tuam, quia perfecta eras in decore meo quem posueram super te, dicit Dominus Deus.\n15 Et habens fiduciam in pulchritudine tua, fornicata es in nomine tuo: et exposuisti fornicationem tuam omni transeunti, et ejus fieres.\n16 Et sumens de vestimentis tuis, fecisti tibi excelsa hinc inde consuta, et fornicata es super eis sicut non est factum, neque futurum est.\n17 Et tulisti vasa decoris tui de auro meo atque argento meo, qu\u00e6 dedi tibi, et fecisti tibi imagines masculinas, et fornicata es in eis.\n18 Et sumpsisti vestimenta tua multicoloria, et operuisti illas, et oleum meum et thymiama meum posuisti coram eis.\n19 Et panem meum quem dedi tibi, similam, et oleum, et mel, quibus enutrivi te, posuisti in conspectu eorum in odorem suavitatis: et factum est, ait Dominus Deus.\n20 Et tulisti filios tuos et filias tuas quas generasti mihi, et immolasti eis ad devorandum. Numquid parva est fornicatio tua?\n21 Immolasti filios meos, et dedisti, illos consecrans, eis.\n22 Et post omnes abominationes tuas et fornicationes, non es recordata dierum adolescenti\u00e6 tu\u00e6, quando eras nuda et confusione plena, conculcata in sanguine tuo.\n23 Et accidit post omnem malitiam tuam (v\u00e6, v\u00e6 tibi! ait Dominus Deus),\n24 et \u00e6dificasti tibi lupanar, et fecisti tibi prostibulum in cunctis plateis.\n25 Ad omne caput vi\u00e6 \u00e6dificasti signum prostitutionis tu\u00e6, et abominabilem fecisti decorem tuum: et divisisti pedes tuos omni transeunti, et multiplicasti fornicationes tuas:\n26 et fornicata es cum filiis \u00c6gypti, vicinis tuis, magnarum carnium: et multiplicasti fornicationem tuam ad irritandum me.\n27 Ecce ego extendam manum meam super te, et auferam justificationem tuam, et dabo te in animas odientium te filiarum Pal\u00e6stinarum, qu\u00e6 erubescunt in via tua scelerata.\n28 Et fornicata es in filiis Assyriorum eo quod necdum fueris expleta: et postquam fornicata es, nec sic es satiata:\n29\u00a0et multiplicasti fornicationem tuam in terra Chanaan cum Chald\u00e6is, et nec sic satiata es.\n \n30 In quo mundabo cor tuum, ait Dominus Deus, cum facias omnia h\u00e6c opera mulieris meretricis et procacis?\n31 Quia fabricasti lupanar tuum in capite omnis vi\u00e6, et excelsum tuum fecisti in omni platea: nec facta es quasi meretrix fastidio augens pretium,\n32 sed quasi mulier adultera, qu\u00e6 super virum suum inducit alienos.\n33 Omnibus meretricibus dantur mercedes: tu autem dedisti mercedes cunctis amatoribus tuis, et dona donabas eis, ut intrarent ad te undique ad fornicandum tecum.\n34\u00a0Factumque est in te contra consuetudinem mulierum in fornicationibus tuis, et post te non erit fornicatio: in eo enim quod dedisti mercedes, et mercedes non accepisti, factum est in te contrarium.\n \n35 Propterea, meretrix, audi verbum Domini.\n36 H\u00e6c dicit Dominus Deus: Quia effusum est \u00e6s tuum et revelata est ignominia tua in fornicationibus tuis super amatores tuos, et super idola abominationum tuarum, in sanguine filiorum tuorum quos dedisti eis,\n37 ecce ego congregabo omnes amatores tuos quibus commista es, et omnes quos dilexisti, cum universis quos oderas: et congregabo eos super te undique, et nudabo ignominiam tuam coram eis, et videbunt omnem turpitudinem tuam.\n38 Et judicabo te judiciis adulterarum, et effundentium sanguinem: et dabo te in sanguinem furoris et zeli.\n39 Et dabo te in manus eorum, et destruent lupanar tuum, et demolientur prostibulum tuum: et denudabunt te vestimentis tuis, et auferent vasa decoris tui, et derelinquent te nudam, plenamque ignominia:\n40 et adducent super te multitudinem, et lapidabunt te lapidibus, et trucidabunt te gladiis suis:\n41 et comburent domos tuas igni, et facient in te judicia in oculis mulierum plurimarum. Et desines fornicari, et mercedes ultra non dabis:\n42 et requiescet indignatio mea in te, et auferetur zelus meus a te: et quiescam, nec irascar amplius.\n43 Eo quod non fueris recordata dierum adolescenti\u00e6 tu\u00e6, et provocasti me in omnibus his, quapropter et ego vias tuas in capite tuo dedi, ait Dominus Deus, et non feci juxta scelera tua in omnibus abominationibus tuis.\n44 Ecce omnis qui dicit vulgo proverbium, in te assumet illud, dicens: Sicut mater, ita et filia ejus.\n45 Filia matris tu\u00e6 es tu, qu\u00e6 projecit virum suum et filios suos: et soror sororum tuarum es tu, qu\u00e6 projecerunt viros suos et filios suos: mater vestra Ceth\u00e6a, et pater vester Amorrh\u00e6us.\n46 Et soror tua major, Samaria, ipsa et fili\u00e6 ejus, qu\u00e6 habitant ad sinistram tuam: soror autem tua minor te, qu\u00e6 habitat a dextris tuis, Sodoma, et fili\u00e6 ejus.\n47\u00a0Sed nec in viis earum ambulasti, neque secundum scelera earum fecisti pauxillum minus: pene sceleratiora fecisti illis in omnibus viis tuis.\n \n48 Vivo ego, dicit Dominus Deus, quia non fecit Sodoma soror tua, ipsa et fili\u00e6 ejus, sicut fecisti tu et fili\u00e6 tu\u00e6.\n49 Ecce h\u00e6c fuit iniquitas Sodom\u00e6 sororis tu\u00e6: superbia, saturitas panis et abundantia, et otium ipsius et filiarum ejus: et manum egeno et pauperi non porrigebant:\n50 et elevat\u00e6 sunt, et fecerunt abominationes coram me: et abstuli eas sicut vidisti.\n51 Et Samaria dimidium peccatorum tuorum non peccavit: sed vicisti eas sceleribus tuis, et justificasti sorores tuas in omnibus abominationibus tuis quas operata es.\n52\u00a0Ergo et tu porta confusionem tuam, qu\u00e6 vicisti sorores tuas peccatis tuis, sceleratius agens ab eis: justificat\u00e6 sunt enim a te: ergo et tu confundere, et porta ignominiam tuam, qu\u00e6 justificasti sorores tuas.\n \n53 Et convertam restituens eas conversione Sodomorum cum filiabus suis, et conversione Samari\u00e6 et filiarum ejus, et convertam reversionem tuam in medio earum,\n54 ut portes ignominiam tuam, et confundaris in omnibus qu\u00e6 fecisti consolans eas.\n55 Et soror tua Sodoma et fili\u00e6 ejus revertentur ad antiquitatem suam, et Samaria et fili\u00e6 ejus revertentur ad antiquitatem suam, et tu et fili\u00e6 tu\u00e6 revertemini ad antiquitatem vestram.\n56 Non fuit autem Sodoma soror tua audita in ore tuo in die superbi\u00e6 tu\u00e6,\n57 antequam revelaretur malitia tua, sicut hoc tempore in opprobrium filiarum Syri\u00e6, et cunctarum in circuitu tuo filiarum Pal\u00e6stinarum qu\u00e6 ambiunt te per gyrum.\n58\u00a0Scelus tuum et ignominiam tuam tu portasti, ait Dominus Deus.\n \n59 Quia h\u00e6c dicit Dominus Deus: Et faciam tibi sicut despexisti juramentum, ut irritum faceres pactum:\n60 et recordabor ego pacti mei tecum in diebus adolescenti\u00e6 tu\u00e6, et suscitabo tibi pactum sempiternum.\n61 Et recordaberis viarum tuarum, et confunderis, cum receperis sorores tuas te majores cum minoribus tuis: et dabo eas tibi in filias, sed non ex pacto tuo.\n62 Et suscitabo ego pactum meum tecum, et scies quia ego Dominus:\n63 ut recorderis, et confundaris, et non sit tibi ultra aperire os pr\u00e6 confusione tua, cum placatus tibi fuero in omnibus qu\u00e6 fecisti, ait Dominus Deus.","title":"Vulgate: Ezekiel: Ezekiel Chapter 16","type":"page"}