{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze019.htm","path":"bib/vul/eze019.htm","source_url":"https://sacred-texts.com/bib/vul/eze019.htm","text":"1 Et tu assume planctum super principes Isra\u00ebl,\n2\u00a0et dices: [Quare mater tua le\u00e6na inter leones cubavit?\n in medio leunculorum enutrivit catulos suos?\n3\u00a0Et eduxit unum de leunculis suis,\n et leo factus est:\n et didicit capere pr\u00e6dam,\n hominemque comedere.\n4\u00a0Et audierunt de eo gentes:\n et non absque vulneribus suis ceperunt eum,\n et adduxerunt eum in catenis in terram \u00c6gypti.\n5\u00a0Qu\u00e6 cum vidisset quoniam infirmata est,\n et periit exspectatio ejus,\n tulit unum de leunculis suis;\n leonem constituit eum.\n6\u00a0Qui incedebat inter leones,\n et factus est leo:\n et didicit pr\u00e6dam capere,\n et homines devorare:\n7\u00a0didicit viduas facere,\n et civitates earum in desertum adducere:\n et desolata est terra et plenitudo ejus a voce rugitus illius.\n8\u00a0Et convenerunt adversus eum gentes undique de provinciis,\n et expanderunt super eum rete suum:\n in vulneribus earum captus est,\n9\u00a0et miserunt eum in caveam:\n in catenis adduxerunt eum ad regem Babylonis,\n miseruntque eum in carcerem,\n ne audiretur vox ejus ultra super montes Isra\u00ebl.\n10\u00a0Mater tua quasi vinea in sanguine tuo super aquam plantata est:\n fructus ejus et frondes ejus creverunt ex aquis multis.\n11\u00a0Et fact\u00e6 sunt ei virg\u00e6 solid\u00e6 in sceptra dominantium,\n et exaltata est statura ejus inter frondes,\n et vidit altitudinem suam in multitudine palmitum suorum.\n12\u00a0Et evulsa est in ira, in terramque projecta,\n et ventus urens siccavit fructum ejus:\n marcuerunt et arefact\u00e6 sunt virg\u00e6 roboris ejus:\n ignis comedit eam.\n13\u00a0Et nunc transplantata est in desertum,\n in terra invia et sitienti.\n14\u00a0Et egressus est ignis de virga ramorum ejus,\n qui fructum ejus comedit:\n et non fuit in ea virga fortis,\n sceptrum dominantium.] Planctus est, et erit in planctum.","title":"Vulgate: Ezekiel: Ezekiel Chapter 19","type":"page"}