{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze020.htm","path":"bib/vul/eze020.htm","source_url":"https://sacred-texts.com/bib/vul/eze020.htm","text":"1 Et factum est in anno septimo, in quinto, in decima mensis, venerunt viri de senioribus Isra\u00ebl ut interrogarent Dominum, et sederunt coram me.\n2 Et factus est sermo Domini ad me, dicens:\n3 Fili hominis, loquere senioribus Isra\u00ebl, et dices ad eos: H\u00e6c dicit Dominus Deus: Numquid ad interrogandum me vos venistis? vivo ego quia non respondebo vobis, ait Dominus Deus.\n4 Si judicas eos, si judicas, fili hominis, abominationes patrum eorum ostende eis.\n5 Et dices ad eos: H\u00e6c dicit Dominus Deus: In die qua elegi Isra\u00ebl, et levavi manum meam pro stirpe domus Jacob, et apparui eis in terra \u00c6gypti, et levavi manum meam pro eis, dicens: Ego Dominus Deus vester:\n6 in die illa levavi manum meam pro eis ut educerem eos de terra \u00c6gypti, in terram quam provideram eis, fluentem lacte et melle, qu\u00e6 est egregia inter omnes terras.\n7 Et dixi ad eos: Unusquisque offensiones oculorum suorum abjiciat, et in idolis \u00c6gypti nolite pollui: ego Dominus Deus vester.\n8 Et irritaverunt me, nolueruntque me audire: unusquisque abominationes oculorum suorum non projecit, nec idola \u00c6gypti reliquerunt. Et dixi ut effunderem indignationem meam super eos, et implerem iram meam in eis, in medio terr\u00e6 \u00c6gypti.\n9 Et feci propter nomen meum, ut non violaretur coram gentibus in quarum medio erant, et inter quas apparui eis ut educerem eos de terra \u00c6gypti.\n10 Ejeci ergo eos de terra \u00c6gypti, et eduxi eos in desertum.\n11 Et dedi eis pr\u00e6cepta mea, et judicia mea ostendi eis, qu\u00e6 faciens homo vivet in eis.\n12 Insuper et sabbata mea dedi eis, ut essent signum inter me et eos, et scirent quia ego Dominus sanctificans eos.\n13 Et irritaverunt me domus Isra\u00ebl in deserto: in pr\u00e6ceptis meis non ambulaverunt, et judicia mea projecerunt, qu\u00e6 faciens homo vivet in eis, et sabbata mea violaverunt vehementer. Dixi ergo ut effunderem furorem meum super eos in deserto, et consumerem eos:\n14 et feci propter nomen meum, ne violaretur coram gentibus de quibus ejeci eos in conspectu earum.\n15 Ego igitur levavi manum meam super eos in deserto, ne inducerem eos in terram quam dedi eis, fluentem lacte et melle, pr\u00e6cipuam terrarum omnium:\n16 quia judicia mea projecerunt, et in pr\u00e6ceptis meis non ambulaverunt, et sabbata mea violaverunt: post idola enim cor eorum gradiebatur.\n17 Et pepercit oculus meus super eos, ut non interficerem eos: nec consumpsi eos in deserto.\n18 Dixi autem ad filios eorum in solitudine: In pr\u00e6ceptis patrum vestrorum nolite incedere, nec judicia eorum custodiatis, nec in idolis eorum polluamini.\n19 Ego Dominus Deus vester: in pr\u00e6ceptis meis ambulate: judicia mea custodite, et facite ea,\n20 et sabbata mea sanctificate, ut sint signum inter me et vos, et sciatis quia ego sum Dominus Deus vester.\n21 Et exacerbaverunt me filii: in pr\u00e6ceptis meis non ambulaverunt, et judicia mea non custodierunt ut facerent ea, qu\u00e6 cum fecerit homo, vivet in eis, et sabbata mea violaverunt. Et comminatus sum ut effunderem furorem meum super eos, et implerem iram meam in eis in deserto.\n22 Averti autem manum meam, et feci propter nomen meum, ut non violaretur coram gentibus de quibus ejeci eos in oculis earum.\n23 Iterum levavi manum meam in eos in solitudine, ut dispergerem illos in nationes, et ventilarem in terras,\n24 eo quod judicia mea non fecissent, et pr\u00e6cepta mea reprobassent, et sabbata mea violassent, et post idola patrum suorum fuissent oculi eorum.\n25 Ergo et ego dedi eis pr\u00e6cepta non bona, et judicia in quibus non vivent.\n26 Et pollui eos in muneribus suis, cum offerrent omne quod aperit vulvam, propter delicta sua: et scient quia ego Dominus.\n27 Quam ob rem loquere ad domum Isra\u00ebl, fili hominis, et dices ad eos: H\u00e6c dicit Dominus Deus: Adhuc et in hoc blasphemaverunt me patres vestri, cum sprevissent me contemnentes,\n28 et induxissem eos in terram super quam levavi manum meam ut darem eis: viderunt omnem collem excelsum, et omne lignum nemorosum, et immolaverunt ibi victimas suas, et dederunt ibi irritationem oblationis su\u00e6, et posuerunt ibi odorem suavitatis su\u00e6, et libaverunt libationes suas.\n29 Et dixi ad eos: Quid est excelsum, ad quod vos ingredimini? et vocatum est nomen ejus Excelsum usque ad hanc diem.\n30 Propterea dic ad domum Isra\u00ebl: H\u00e6c dicit Dominus Deus: Certe in via patrum vestrorum vos polluimini, et post offendicula eorum vos fornicamini:\n31 et in oblatione donorum vestrorum, cum traducitis filios vestros per ignem, vos polluimini in omnibus idolis vestris usque hodie: et ego respondebo vobis, domus Isra\u00ebl? Vivo ego, dicit Dominus Deus, quia non respondebo vobis.\n32\u00a0Neque cogitatio mentis vestr\u00e6 fiet, dicentium: Erimus sicut gentes et sicut cognationes terr\u00e6, ut colamus ligna et lapides.\n \n33 Vivo ego, dicit Dominus Deus, quoniam in manu forti, et in brachio extento, et in furore effuso, regnabo super vos.\n34 Et educam vos de populis, et congregabo vos de terris in quibus dispersi estis: in manu valida, et in brachio extento, et in furore effuso, regnabo super vos.\n35 Et adducam vos in desertum populorum, et judicabor vobiscum ibi facie ad faciem.\n36 Sicut judicio contendi adversum patres vestros in deserto terr\u00e6 \u00c6gypti, sic judicabo vos, dicit Dominus Deus.\n37 Et subjiciam vos sceptro meo, et inducam vos in vinculis f\u0153deris.\n38 Et eligam de vobis transgressores et impios, et de terra incolatus eorum educam eos, et in terram Isra\u00ebl non ingredientur: et scietis quia ego Dominus.\n39 Et vos, domus Isra\u00ebl, h\u00e6c dicit Dominus Deus: Singuli post idola vestra ambulate, et servite eis. Quod si et in hoc non audieritis me, et nomen meum sanctum pollueritis ultra in muneribus vestris et in idolis vestris:\n40 in monte sancto meo, in monte excelso Isra\u00ebl, ait Dominus Deus, ibi serviet mihi omnis domus Isra\u00ebl: omnes, inquam, in terra in qua placebunt mihi: et ibi qu\u00e6ram primitias vestras, et initium decimarum vestrarum, in omnibus sanctificationibus vestris.\n41 In odorem suavitatis suscipiam vos, cum eduxero vos de populis, et congregavero vos de terris in quas dispersi estis: et sanctificabor in vobis in oculis nationum.\n42 Et scietis quia ego Dominus, cum induxero vos ad terram Isra\u00ebl, in terram pro qua levavi manum meam ut darem eam patribus vestris.\n43 Et recordabimini ibi viarum vestrarum, et omnium scelerum vestrorum, quibus polluti estis in eis: et displicebitis vobis in conspectu vestro, in omnibus malitiis vestris quas fecistis.\n44\u00a0Et scietis quia ego Dominus, cum benefecero vobis propter nomen meum, et non secundum vias vestras malas, neque secundum scelera vestra pessima, domus Isra\u00ebl, ait Dominus Deus.\n \n45 Et factus est sermo Domini ad me, dicens:\n46\u00a0[Fili hominis, pone faciem tuam contra viam austri,\n et stilla ad africum,\n et propheta ad saltum agri meridiani.\n47\u00a0Et dices saltui meridiano:\n Audi verbum Domini:\n H\u00e6c dicit Dominus Deus:\n Ecce ego succendam in te ignem,\n et comburam in te omne lignum viride,\n et omne lignum aridum:\n non extinguetur flamma succensionis:\n et comburetur in ea omnis facies\n ab austro usque ad aquilonem,\n48\u00a0et videbit universa caro quia ego Dominus succendi eam,\n nec extinguetur.]\n49 Et dixi: A, a, a, Domine Deus: ipsi dicunt de me: Numquid non per parabolas loquitur iste?","title":"Vulgate: Ezekiel: Ezekiel Chapter 20","type":"page"}