{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze022.htm","path":"bib/vul/eze022.htm","source_url":"https://sacred-texts.com/bib/vul/eze022.htm","text":"1 Et factum est verbum Domini ad me, dicens:\n2 Et tu, fili hominis, nonne judicas, nonne judicas civitatem sanguinum?\n3 Et ostendes ei omnes abominationes suas, et dices: H\u00e6c dicit Dominus Deus: Civitas effundens sanguinem in medio sui, ut veniat tempus ejus: et qu\u00e6 fecit idola contra semetipsam, ut pollueretur.\n4 In sanguine tuo, qui a te effusus est, deliquisti, et in idolis tuis, qu\u00e6 fecisti, polluta es: et appropinquare fecisti dies tuos, et adduxisti tempus annorum tuorum: propterea dedi te opprobrium gentibus, et irrisionem universis terris.\n5 Qu\u00e6 juxta sunt, et qu\u00e6 procul a te, triumphabunt de te, sordida, nobilis, grandis interitu.\n6 Ecce principes Isra\u00ebl singuli in brachio suo fuerunt in te, ad effundendum sanguinem.\n7 Patrem et matrem contumeliis affecerunt: in te advenam calumniati sunt in medio tui: pupillum et viduam contristaverunt apud te.\n8 Sanctuaria mea sprevisti, et sabbata mea polluisti.\n9 Viri detractores fuerunt in te ad effundendum sanguinem, et super montes comederunt in te: scelus operati sunt in medio tui.\n10 Verecundiora patris discooperuerunt in te; immunditiam menstruat\u00e6 humiliaverunt in te:\n11 et unusquisque in uxorem proximi sui operatus est abominationem, et socer nurum suam polluit nefarie: frater sororem suam, filiam patris sui, oppressit in te.\n12 Munera acceperunt apud te ad effundendum sanguinem: usuram et superabundantiam accepisti, et avare proximos tuos calumniabaris: meique oblita es, ait Dominus Deus.\n13 Ecce complosi manus meas super avaritiam tuam quam fecisti, et super sanguinem qui effusus est in medio tui.\n14 Numquid sustinebit cor tuum, aut pr\u00e6valebunt manus tu\u00e6, in diebus quos ego faciam tibi? Ego Dominus locutus sum, et faciam.\n15 Et dispergam te in nationes, et ventilabo te in terras, et deficere faciam immunditiam tuam a te.\n16\u00a0Et possidebo te in conspectu gentium: et scies quia ego Dominus.\n \n17 Et factum est verbum Domini ad me, dicens:\n18 Fili hominis, versa est mihi domus Isra\u00ebl in scoriam: omnes isti \u00e6s, et stannum, et ferrum, et plumbum in medio fornacis: scoria argenti facti sunt.\n19 Propterea h\u00e6c dicit Dominus Deus: Eo quod versi estis omnes in scoriam, propterea ecce ego congregabo vos in medio Jerusalem,\n20 congregatione argenti, et \u00e6ris, et stanni, et ferri, et plumbi, in medio fornacis, ut succendam in ea ignem ad conflandum. Sic congregabo in furore meo, et in ira mea: et requiescam, et conflabo vos.\n21 Et congregabo vos, et succendam vos in igne furoris mei, et conflabimini in medio ejus.\n22\u00a0Ut conflatur argentum in medio fornacis, sic eritis in medio ejus: et scietis quia ego Dominus cum effuderim indignationem meam super vos.\n \n23 Et factum est verbum Domini ad me, dicens:\n24 Fili hominis, dic ei: Tu es terra immunda, et non compluta in die furoris.\n25 Conjuratio prophetarum in medio ejus: sicut leo rugiens, rapiensque pr\u00e6dam, animas devoraverunt: opes et pretium acceperunt: viduas ejus multiplicaverunt in medio illius.\n26 Sacerdotes ejus contempserunt legem meam, et polluerunt sanctuaria mea: inter sanctum et profanum non habuerunt distantiam, et inter pollutum et mundum non intellexerunt: et a sabbatis meis averterunt oculos suos, et coinquinabar in medio eorum.\n27 Principes ejus in medio illius quasi lupi rapientes pr\u00e6dam ad effundendum sanguinem, et ad perdendas animas, et avare ad sectanda lucra.\n28 Prophet\u00e6 autem ejus liniebant eos absque temperamento, videntes vana, et divinantes eis mendacium, dicentes: H\u00e6c dicit Dominus Deus: cum Dominus non sit locutus.\n29 Populi terr\u00e6 calumniabantur calumniam, et rapiebant violenter: egenum et pauperem affligebant, et advenam opprimebant calumnia absque judicio.\n30 Et qu\u00e6sivi de eis virum qui interponeret sepem, et staret oppositus contra me pro terra, ne dissiparem eam: et non inveni.\n31 Et effudi super eos indignationem meam; in igne ir\u00e6 me\u00e6 consumpsi eos: viam eorum in caput eorum reddidi, ait Dominus Deus.","title":"Vulgate: Ezekiel: Ezekiel Chapter 22","type":"page"}