{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze027.htm","path":"bib/vul/eze027.htm","source_url":"https://sacred-texts.com/bib/vul/eze027.htm","text":"1 Et factum est verbum Domini ad me, dicens:\n2 Tu ergo, fili hominis, assume super Tyrum lamentum:\n3\u00a0et dices Tyro, qu\u00e6 habitat in introitu maris, negotiationi populorum ad insulas multas: [H\u00e6c dicit Dominus Deus:\n O Tyre, tu dixisti: Perfecti decoris ego sum,\n4\u00a0et in corde maris sita.\n Finitimi tui qui te \u00e6dificaverunt, impleverunt decorem tuum:\n5\u00a0abietibus de Sanir exstruxerunt te cum omnibus tabulatis maris:\n cedrum de Libano tulerunt ut facerent tibi malum.\n6\u00a0Quercus de Basan dolaverunt in remos tuos,\n et transtra tua fecerunt tibi ex ebore indico,\n et pr\u00e6toriola de insulis Itali\u00e6.\n7\u00a0Byssus varia de \u00c6gypto texta est tibi in velum\n ut poneretur in malo:\n hyacinthus et purpura de insulis Elisa\n facta sunt operimentum tuum.\n8\u00a0Habitatores Sidonis et Aradii fuerunt remiges tui:\n sapientes tui, Tyre, facti sunt gubernatores tui.\n9\u00a0Senes Giblii et prudentes ejus\n habuerunt nautas ad ministerium vari\u00e6 supellectilis tu\u00e6:\n omnes naves maris, et naut\u00e6 earum,\n fuerunt in populo negotiationis tu\u00e6.\n10\u00a0Pers\u00e6, et Lydii, et Libyes erant in exercitu tuo\n viri bellatores tui:\n clypeum et galeam suspenderunt in te pro ornatu tuo.\n11\u00a0Filii Aradii cum exercitu tuo erant super muros tuos in circuitu:\n sed et Pigm\u00e6i qui erant in turribus tuis,\n pharetras suas suspenderunt in muris tuis per gyrum:\n ipsi compleverunt pulchritudinem tuam.\n12\u00a0Carthaginenses negotiatores tui,\n a multitudine cunctarum divitiarum,\n argento, ferro, stanno, plumboque\n repleverunt nundinas tuas.\n13\u00a0Gr\u00e6cia, Thubal, et Mosoch, ipsi institores tui:\n mancipia, et vasa \u00e6rea advexerunt populo tuo.\n14\u00a0De domo Thogorma, equos, et equites, et mulos\n adduxerunt ad forum tuum.\n15\u00a0Filii Dedan negotiatores tui;\n insul\u00e6 mult\u00e6, negotiatio manus tu\u00e6:\n dentes eburneos et hebeninos commutaverunt in pretio tuo.\n16\u00a0Syrus negotiator tuus propter multitudinem operum tuorum:\n gemmam, et purpuram, et scutulata,\n et byssum, et sericum, et chodchod\n proposuerunt in mercatu tuo.\n17\u00a0Juda et terra Isra\u00ebl, ipsi institores tui in frumento primo:\n balsamum, et mel, et oleum, et resinam\n proposuerunt in nundinis tuis.\n18\u00a0Damascenus negotiator tuus in multitudine operum tuorum,\n in multitudine diversarum opum,\n in vino pingui, in lanis coloris optimi.\n19\u00a0Dan, et Gr\u00e6cia, et Mosel,\n in nundinis tuis proposuerunt ferrum fabrefactum:\n stacte et calamus in negotiatione tua.\n20\u00a0Dedan institores tui in tapetibus ad sedendum.\n21\u00a0Arabia et universi principes Cedar,\n ipsi negotiatores manus tu\u00e6:\n cum agnis, et arietibus, et h\u00e6dis,\n venerunt ad te negotiatores tui.\n22\u00a0Venditores Saba et Reema, ipsi negotiatores tui:\n cum universis primis aromatibus, et lapide pretioso, et auro,\n quod proposuerunt in mercatu tuo.\n23\u00a0Haran, et Chene, et Eden, negotiatores tui;\n Saba, Assur, et Chelmad venditores tui.\n24\u00a0Ipsi negotiatores tui multifariam,\n involucris hyacinthi, et polymitorum,\n gazarumque pretiosarum,\n qu\u00e6 obvolut\u00e6 et astrict\u00e6 erant funibus:\n cedros quoque habebant in negotiationibus tuis.\n25\u00a0Naves maris, principes tui in negotiatione tua:\n et repleta es, et glorificata nimis in corde maris.]\n \n26\u00a0[In aquis multis adduxerunt te remiges tui:\n ventus auster contrivit te in corde maris.\n27\u00a0Diviti\u00e6 tu\u00e6, et thesauri tui,\n et multiplex instrumentum tuum:\n naut\u00e6 tui et gubernatores tui,\n qui tenebant supellectilem tuam,\n et populo tuo pr\u00e6erant:\n viri quoque bellatores tui, qui erant in te,\n cum universa multitudine tua qu\u00e6 est in medio tui,\n cadent in corde maris in die ruin\u00e6 tu\u00e6:\n28\u00a0a sonitu clamoris gubernatorum tuorum conturbabuntur classes.\n29\u00a0Et descendent de navibus suis omnes qui tenebant remum:\n naut\u00e6 et universi gubernatores maris in terra stabunt.\n30\u00a0Et ejulabunt super te voce magna:\n et clamabunt amare,\n et superjacient pulverem capitibus suis,\n et cinere conspergentur.\n31\u00a0Et radent super te calvitium,\n et accingentur ciliciis:\n et plorabunt te in amaritudine anim\u00e6, ploratu amarissimo.\n32\u00a0Et assument super te carmen lugubre,\n et plangent te:\n Qu\u00e6 est ut Tyrus, qu\u00e6 obmutuit in medio maris?\n33\u00a0Qu\u00e6 in exitu negotiationum tuarum de mari\n implesti populos multos:\n in multitudine divitiarum tuarum, et populorum tuorum,\n ditasti reges terr\u00e6.\n34\u00a0Nunc contrita es a mari:\n in profundis aquarum opes tu\u00e6,\n et omnis multitudo tua qu\u00e6 erat in medio tui, ceciderunt.\n35\u00a0Universi habitatores insularum obstupuerunt super te,\n et reges earum omnes tempestate perculsi mutaverunt vultus.\n36\u00a0Negotiatores populorum sibilaverunt super te:\n ad nihilum deducta es,\n et non eris usque in perpetuum.]","title":"Vulgate: Ezekiel: Ezekiel Chapter 27","type":"page"}