{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze028.htm","path":"bib/vul/eze028.htm","source_url":"https://sacred-texts.com/bib/vul/eze028.htm","text":"1 Et factus est sermo Domini ad me, dicens:\n2\u00a0Fili hominis, dic principi Tyri: [H\u00e6c dicit Dominus Deus:\n Eo quod elevatum est cor tuum,\n et dixisti: Deus ego sum,\n et in cathedra Dei sedi in corde maris,\n cum sis homo, et non deus:\n et dedisti cor tuum quasi cor Dei:\n3\u00a0ecce sapientior es tu Daniele:\n omne secretum non est absconditum a te:\n4\u00a0in sapientia et prudentia tua fecisti tibi fortitudinem,\n et acquisisti aurum et argentum in thesauris tuis:\n5\u00a0in multitudine sapienti\u00e6 tu\u00e6,\n et in negotiatione tua multiplicasti tibi fortitudinem,\n et elevatum est cor tuum in robore tuo:\n6\u00a0propterea h\u00e6c dicit Dominus Deus:\n Eo quod elevatum est cor tuum quasi cor dei,\n7\u00a0idcirco ecce ego adducam super te alienos,\n robustissimos gentium:\n et nudabunt gladios suos super pulchritudinem sapienti\u00e6 tu\u00e6,\n et polluent decorem tuum.\n8\u00a0Interficient, et detrahent te:\n et morieris in interitu occisorum in corde maris.\n9\u00a0Numquid dicens loqueris: Deus ego sum,\n coram interficientibus te,\n cum sis homo, et non deus,\n in manu occidentium te?\n10\u00a0Morte incircumcisorum morieris in manu alienorum,\n quia ego locutus sum, ait Dominus Deus.]\n \n11 Et factus est sermo Domini ad me, dicens: Fili hominis, leva planctum super regem Tyri,\n12\u00a0et dices ei: [H\u00e6c dicit Dominus Deus:\n Tu signaculum similitudinis,\n plenus sapientia, et perfectus decore.\n13\u00a0In deliciis paradisi Dei fuisti:\n omnis lapis pretiosus operimentum tuum,\n sardius, topazius, et jaspis,\n chrysolithus, et onyx, et beryllus,\n sapphirus, et carbunculus, et smaragdus:\n aurum, opus decoris tui:\n et foramina tua, in die qua conditus es, pr\u00e6parata sunt.\n14\u00a0Tu cherub extentus, et protegens,\n et posui te in monte sancto Dei:\n in medio lapidum ignitorum ambulasti,\n15\u00a0perfectus in viis tuis a die conditionis tu\u00e6,\n donec inventa est iniquitas in te.\n16\u00a0In multitudine negotiationis tu\u00e6\n repleta sunt interiora tua iniquitate, et peccasti:\n et ejeci te de monte Dei,\n et perdidi te, o cherub protegens, de medio lapidum ignitorum.\n17\u00a0Et elevatum est cor tuum in decore tuo;\n perdidisti sapientiam tuam in decore tuo:\n in terram projeci te;\n ante faciem regum dedi te ut cernerent te.\n18\u00a0In multitudine iniquitatum tuarum,\n et iniquitate negotiationis tu\u00e6,\n polluisti sanctificationem tuam:\n producam ergo ignem de medio tui, qui comedat te,\n et dabo te in cinerem super terram,\n in conspectu omnium videntium te.\n19\u00a0Omnes qui viderint te in gentibus, obstupescent super te:\n nihili factus es, et non eris in perpetuum.]\n \n20 Et factus est sermo Domini ad me, dicens:\n21 Fili hominis, pone faciem tuam contra Sidonem, et prophetabis de ea:\n22\u00a0et dices: [H\u00e6c dicit Dominus Deus:\n Ecce ego ad te, Sidon,\n et glorificabor in medio tui:\n et scient quia ego Dominus,\n cum fecero in ea judicia,\n et sanctificatus fuero in ea.\n23\u00a0Et immittam ei pestilentiam,\n et sanguinem in plateis ejus:\n et corruent interfecti in medio ejus gladio per circuitum,\n et scient quia ego Dominus.\n24\u00a0Et non erit ultra domui Isra\u00ebl offendiculum amaritudinis,\n et spina dolorem inferens undique\n per circuitum eorum qui adversantur eis:\n et scient quia ego Dominus Deus.\n25\u00a0H\u00e6c dicit Dominus Deus:\n Quando congregavero domum Isra\u00ebl\n de populis in quibus dispersi sunt,\n sanctificabor in eis coram gentibus:\n et habitabunt in terra sua,\n quam dedi servo meo Jacob:\n26\u00a0et habitabunt in ea securi,\n et \u00e6dificabunt domos, et plantabunt vineas,\n et habitabunt confidenter,\n cum fecero judicia in omnibus qui adversantur eis per circuitum:\n et scient quia ego Dominus Deus eorum.]","title":"Vulgate: Ezekiel: Ezekiel Chapter 28","type":"page"}