{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze029.htm","path":"bib/vul/eze029.htm","source_url":"https://sacred-texts.com/bib/vul/eze029.htm","text":"1 In anno decimo, decimo mense, undecima die mensis, factum est verbum Domini ad me, dicens:\n2 Fili hominis, pone faciem tuam contra Pharaonem regem \u00c6gypti, et prophetabis de eo, et de \u00c6gypto universa.\n3\u00a0Loquere, et dices: [H\u00e6c dicit Dominus Deus:\n Ecce ego ad te, Pharao rex \u00c6gypti, draco magne,\n qui cubas in medio fluminum tuorum, et dicis:\n Meus est fluvius, et ego feci memetipsum.\n4\u00a0Et ponam frenum in maxillis tuis,\n et agglutinabo pisces fluminum tuorum squamis tuis,\n et extraham te de medio fluminum tuorum,\n et universi pisces tui squamis tuis adh\u00e6rebunt.\n5\u00a0Et projiciam te in desertum,\n et omnes pisces fluminis tui:\n super faciem terr\u00e6 cades;\n non colligeris, neque congregaberis:\n bestiis terr\u00e6 et volatilibus c\u00e6li dedi te ad devorandum.\n6\u00a0Et scient omnes habitatores \u00c6gypti quia ego Dominus,\n pro eo quod fuisti baculus arundineus domui Isra\u00ebl:\n7\u00a0quando apprehenderunt te manu, et confractus es,\n et lacerasti omnem humerum eorum:\n et innitentibus eis super te comminutus es,\n et dissolvisti omnes renes eorum.\n8\u00a0Propterea h\u00e6c dicit Dominus Deus:\n Ecce ego adducam super te gladium,\n et interficiam de te hominem et jumentum.\n9\u00a0Et erit terra \u00c6gypti in desertum et in solitudinem:\n et scient quia ego Dominus,\n pro eo quod dixeris: Fluvius meus est, et ego feci eum.\n10\u00a0Idcirco ecce ego ad te, et ad flumina tua:\n daboque terram \u00c6gypti in solitudines,\n gladio dissipatam,\n a turre Syenes usque ad terminos \u00c6thiopi\u00e6.\n11\u00a0Non pertransibit eam pes hominis,\n neque pes jumenti gradietur in ea,\n et non habitabitur quadraginta annis.\n12\u00a0Daboque terram \u00c6gypti desertam in medio terrarum desertarum,\n et civitates ejus in medio urbium subversarum,\n et erunt desolat\u00e6 quadraginta annis:\n et dispergam \u00c6gyptios in nationes,\n et ventilabo eos in terras.\n13\u00a0Quia h\u00e6c dicit Dominus Deus:\n Post finem quadraginta annorum congregabo \u00c6gyptum\n de populis in quibus dispersi fuerant.\n14\u00a0Et reducam captivitatem \u00c6gypti,\n et collocabo eos in terra Phathures,\n in terra nativitatis su\u00e6,\n et erunt ibi in regnum humile.\n15\u00a0Inter cetera regna erit humillima,\n et non elevabitur ultra super nationes,\n et imminuam eos ne imperent gentibus.\n16\u00a0Neque erunt ultra domui Isra\u00ebl in confidentia,\n docentes iniquitatem ut fugiant, et sequantur eos:\n et scient quia ego Dominus Deus.]\n \n17 Et factum est in vigesimo et septimo anno, in primo, in una mensis: factum est verbum Domini ad me, dicens:\n18\u00a0[Fili hominis, Nabuchodonosor rex Babylonis\n servire fecit exercitum suum servitute magna adversum Tyrum:\n omne caput decalvatum, et omnis humerus depilatus est:\n et merces non est reddita ei, neque exercitui ejus, de Tyro,\n pro servitute qua servivit mihi adversus eam.\n19\u00a0Propterea h\u00e6c dicit Dominus Deus:\n Ecce ego dabo Nabuchodonosor regem Babylonis in terra \u00c6gypti:\n et accipiet multitudinem ejus,\n et depr\u00e6dabitur manubias ejus,\n et diripiet spolia ejus:\n et erit merces exercitui illius,\n20\u00a0et operi quo servivit adversus eam:\n dedi ei terram \u00c6gypti pro eo quod laboraverit mihi,\n ait Dominus Deus.\n21\u00a0In die illo pullulabit cornu domui Isra\u00ebl,\n et tibi dabo apertum os in medio eorum,\n et scient quia ego Dominus.]","title":"Vulgate: Ezekiel: Ezekiel Chapter 29","type":"page"}