{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze030.htm","path":"bib/vul/eze030.htm","source_url":"https://sacred-texts.com/bib/vul/eze030.htm","text":"1 Et factum est verbum Domini ad me, dicens:\n2\u00a0Fili hominis, propheta, et dic: [H\u00e6c dicit Dominus Deus:\n Ululate: V\u00e6, v\u00e6 diei!\n3\u00a0quia juxta est dies,\n et appropinquat dies Domini, dies nubis:\n tempus gentium erit.\n4\u00a0Et veniet gladius in \u00c6gyptum,\n et erit pavor in \u00c6thiopia,\n cum ceciderint vulnerati in \u00c6gypto,\n et ablata fuerit multitudo illius,\n et destructa fundamenta ejus.\n5\u00a0\u00c6thiopia, et Libya, et Lydi,\n et omne reliquum vulgus,\n et Chub, et filii terr\u00e6 f\u0153deris,\n cum eis gladio cadent.\n6\u00a0H\u00e6c dicit Dominus Deus:\n Et corruent fulcientes \u00c6gyptum,\n et destruetur superbia imperii ejus:\n a turre Syenes gladio cadent in ea,\n ait Dominus Deus exercituum.\n7\u00a0Et dissipabuntur in medio terrarum desolatarum,\n et urbes ejus in medio civitatum desertarum erunt:\n8\u00a0et scient quia ego Dominus,\n cum dedero ignem in \u00c6gypto,\n et attriti fuerint omnes auxiliatores ejus.\n9\u00a0In die illa egredientur nuntii a facie mea in trieribus\n ad conterendam \u00c6thiopi\u00e6 confidentiam:\n et erit pavor in eis in die \u00c6gypti,\n quia absque dubio veniet.\n10\u00a0H\u00e6c dicit Dominus Deus:\n Cessare faciam multitudinem \u00c6gypti\n in manu Nabuchodonosor regis Babylonis.\n11\u00a0Ipse et populus ejus cum eo, fortissimi gentium,\n adducentur ad disperdendam terram:\n et evaginabunt gladios suos super \u00c6gyptum,\n et implebunt terram interfectis.\n12\u00a0Et faciam alveos fluminum aridos,\n et tradam terram in manus pessimorum:\n et dissipabo terram et plenitudinem ejus\n manu alienorum:\n ego Dominus locutus sum.\n13\u00a0H\u00e6c dicit Dominus Deus:\n Et disperdam simulacra,\n et cessare faciam idola de Memphis:\n et dux de terra \u00c6gypti non erit amplius,\n et dabo terrorem in terra \u00c6gypti.\n14\u00a0Et disperdam terram Phathures,\n et dabo ignem in Taphnis,\n et faciam judicia in Alexandria.\n15\u00a0Et effundam indignationem meam super Pelusium, robur \u00c6gypti,\n et interficiam multitudinem Alexandri\u00e6.\n16\u00a0Et dabo ignem in \u00c6gypto:\n quasi parturiens dolebit Pelusium,\n et Alexandria erit dissipata,\n et in Memphis angusti\u00e6 quotidian\u00e6.\n17\u00a0Juvenes Heliopoleos et Bubasti gladio cadent,\n et ips\u00e6 captiv\u00e6 ducentur.\n18\u00a0Et in Taphnis nigrescet dies,\n cum contrivero ibi sceptra \u00c6gypti,\n et defecerit in ea superbia potenti\u00e6 ejus:\n ipsam nubes operiet,\n fili\u00e6 autem ejus in captivitatem ducentur.\n19\u00a0Et judicia faciam in \u00c6gypto:\n et scient quia ego Dominus.]\n \n20 Et factum est in undecimo anno, in primo mense, in septima mensis: factum est verbum Domini ad me, dicens:\n21\u00a0[Fili hominis, brachium Pharaonis regis \u00c6gypti confregi,\n et ecce non est obvolutum ut restitueretur ei sanitas,\n ut ligaretur pannis, et fasciaretur linteolis,\n ut recepto robore posset tenere gladium.\n22\u00a0Propterea h\u00e6c dicit Dominus Deus:\n Ecce ego ad Pharaonem regem \u00c6gypti,\n et comminuam brachium ejus forte, sed confractum:\n et dejiciam gladium de manu ejus,\n23\u00a0et dispergam \u00c6gyptum in gentibus,\n et ventilabo eos in terris.\n24\u00a0Et confortabo brachia regis Babylonis,\n daboque gladium meum in manu ejus,\n et confringam brachia Pharaonis,\n et gement gemitibus interfecti coram facie ejus.\n25\u00a0Et confortabo brachia regis Babylonis,\n et brachia Pharaonis concident:\n et scient quia ego Dominus,\n cum dedero gladium meum in manu regis Babylonis,\n et extenderit eum super terram \u00c6gypti.\n26\u00a0Et dispergam \u00c6gyptum in nationes,\n et ventilabo eos in terras:\n et scient quia ego Dominus.]","title":"Vulgate: Ezekiel: Ezekiel Chapter 30","type":"page"}