{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze031.htm","path":"bib/vul/eze031.htm","source_url":"https://sacred-texts.com/bib/vul/eze031.htm","text":"1 Et factum est in anno undecimo, tertio mense, una mensis: factum est verbum Domini ad me, dicens:\n2\u00a0Fili hominis, dic Pharaoni regi \u00c6gypti et populo ejus: [Cui similis factus es in magnitudine tua?\n3\u00a0ecce Assur quasi cedrus in Libano,\n pulcher ramis, et frondibus nemorosus, excelsusque altitudine,\n et inter condensas frondes elevatum est cacumen ejus.\n4\u00a0Aqu\u00e6 nutrierunt illum;\n abyssus exaltavit illum:\n flumina ejus manabant in circuitu radicum ejus,\n et rivos suos emisit ad universa ligna regionis.\n5\u00a0Propterea elevata est altitudo ejus super omnia ligna regionis,\n et multiplicata sunt arbusta ejus,\n et elevati sunt rami ejus pr\u00e6 aquis multis.\n6\u00a0Cumque extendisset umbram suam,\n in ramis ejus fecerunt nidos omnia volatilia c\u00e6li:\n et sub frondibus ejus genuerunt omnes besti\u00e6 saltuum,\n et sub umbraculo illius habitabat c\u0153tus gentium plurimarum.\n7\u00a0Eratque pulcherrimus in magnitudine sua,\n et in dilatatione arbustorum suorum:\n erat enim radix illius juxta aquas multas.\n8\u00a0Cedri non fuerunt altiores illo in paradiso Dei;\n abietes non ad\u00e6quaverunt summitatem ejus,\n et platani non fuerunt \u00e6qu\u00e6 frondibus illius:\n omne lignum paradisi Dei non est assimilatum illi,\n et pulchritudini ejus.\n9\u00a0Quoniam speciosum feci eum,\n et multis condensisque frondibus,\n et \u00e6mulata sunt eum omnia ligna voluptatis\n qu\u00e6 erant in paradiso Dei.]\n \n10\u00a0[Propterea h\u00e6c dicit Dominus Deus:\n Pro eo quod sublimatus est in altitudine,\n et dedit summitatem suam virentem atque condensam,\n et elevatum est cor ejus in altitudine sua:\n11\u00a0tradidi eum in manu fortissimi gentium:\n faciens faciet ei:\n juxta impietatem ejus ejeci eum.\n12\u00a0Et succident eum alieni,\n et crudelissimi nationum,\n et projicient eum super montes:\n et in cunctis convallibus corruent rami ejus,\n et confringentur arbusta ejus in universis rupibus terr\u00e6:\n et recedent de umbraculo ejus omnes populi terr\u00e6,\n et relinquent eum.\n13\u00a0In ruina ejus habitaverunt omnia volatilia c\u00e6li,\n et in ramis ejus fuerunt univers\u00e6 besti\u00e6 regionis.\n14\u00a0Quam ob rem non elevabuntur in altitudine sua omnia ligna aquarum,\n nec ponent sublimitatem suam inter nemorosa atque frondosa,\n nec stabunt in sublimitate sua omnia qu\u00e6 irrigantur aquis:\n quia omnes traditi sunt in mortem ad terram ultimam,\n in medio filiorum hominum,\n ad eos qui descendunt in lacum.\n15\u00a0H\u00e6c dicit Dominus Deus:\n In die quando descendit ad inferos, induxi luctum:\n operui eum abysso,\n et prohibui flumina ejus,\n et co\u00ebrcui aquas multas:\n contristatus est super eum Libanus,\n et omnia ligna agri concussa sunt.\n16\u00a0A sonitu ruin\u00e6 ejus commovi gentes\n cum deducerem eum ad infernum\n cum his qui descendebant in lacum:\n et consolata sunt in terra infima\n omnia ligna voluptatis egregia atque pr\u00e6clara in Libano,\n universa qu\u00e6 irrigabantur aquis.\n17\u00a0Nam et ipsi cum eo descendent in infernum ad interfectos gladio:\n et brachium uniuscujusque sedebit sub umbraculo ejus\n in medio nationum.\n18\u00a0Cui assimilatus es, o inclyte atque sublimis inter ligna voluptatis?\n ecce deductus es cum lignis voluptatis ad terram ultimam:\n in medio incircumcisorum dormies,\n cum eis qui interfecti sunt gladio:\n ipse est Pharao, et omnis multitudo ejus,\n dicit Dominus Deus.]","title":"Vulgate: Ezekiel: Ezekiel Chapter 31","type":"page"}