{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze032.htm","path":"bib/vul/eze032.htm","source_url":"https://sacred-texts.com/bib/vul/eze032.htm","text":"1 Et factum est, duodecimo anno, in mense duodecimo, in una mensis: factum est verbum Domini ad me, dicens:\n2\u00a0Fili hominis, assume lamentum super Pharaonem regem \u00c6gypti, et dices ad eum: [Leoni gentium assimilatus es,\n et draconi qui est in mari:\n et ventilabas cornu in fluminibus tuis,\n et conturbabas aquas pedibus tuis,\n et conculcabas flumina earum.\n3\u00a0Propterea h\u00e6c dicit Dominus Deus:\n Expandam super te rete meum in multitudine populorum multorum,\n et extraham te in sagena mea.\n4\u00a0Et projiciam te in terram;\n super faciem agri abjiciam te:\n et habitare faciam super te omnia volatilia c\u00e6li,\n et saturabo de te bestias univers\u00e6 terr\u00e6.\n5\u00a0Et dabo carnes tuas super montes,\n et implebo colles tuos sanie tua.\n6\u00a0Et irrigabo terram f\u0153tore sanguinis tui super montes,\n et valles implebuntur ex te.\n7\u00a0Et operiam, cum extinctus fueris, c\u00e6lum,\n et nigrescere faciam stellas ejus:\n solem nube tegam,\n et luna non dabit lumen suum.\n8\u00a0Omnia luminaria c\u00e6li m\u0153rere faciam super te,\n et dabo tenebras super terram tuam,\n dicit Dominus Deus,\n cum ceciderint vulnerati tui in medio terr\u00e6,\n ait Dominus Deus.\n9\u00a0Et irritabo cor populorum multorum,\n cum induxero contritionem tuam in gentibus super terras quas nescis.\n10\u00a0Et stupescere faciam super te populos multos,\n et reges eorum horrore nimio formidabunt super te,\n cum volare c\u0153perit gladius meus super facies eorum:\n et obstupescent repente singuli pro anima sua in die ruin\u00e6 tu\u00e6.\n11\u00a0Quia h\u00e6c dicit Dominus Deus:\n Gladius regis Babylonis veniet tibi.\n12\u00a0In gladiis fortium dejiciam multitudinem tuam:\n inexpugnabiles omnes gentes h\u00e6,\n et vastabunt superbiam \u00c6gypti,\n et dissipabitur multitudo ejus.\n13\u00a0Et perdam omnia jumenta ejus,\n qu\u00e6 erant super aquas plurimas:\n et non conturbabit eas pes hominis ultra,\n neque ungula jumentorum turbabit eas.\n14\u00a0Tunc purissimas reddam aquas eorum,\n et flumina eorum quasi oleum adducam,\n ait Dominus Deus,\n15\u00a0cum dedero terram \u00c6gypti desolatam:\n deseretur autem terra a plenitudine sua\n quando percussero omnes habitatores ejus:\n et scient quia ego Dominus.\n16\u00a0Planctus est, et plangent eum:\n fili\u00e6 gentium plangent eum:\n super \u00c6gyptum et super multitudinem ejus plangent eum,\n ait Dominus Deus.]\n \n17 Et factum est in duodecimo anno, in quintadecima mensis: factum est verbum Domini ad me, dicens:\n18\u00a0[Fili hominis, cane lugubre super multitudinem \u00c6gypti:\n et detrahe eam ipsam, et filias gentium robustarum, ad terram ultimam,\n cum his qui descendunt in lacum.\n19\u00a0Quo pulchrior es?\n descende, et dormi cum incircumcisis.\n20\u00a0In medio interfectorum gladio cadent;\n gladius datus est:\n attraxerunt eam et omnes populos ejus.\n21\u00a0Loquentur ei potentissimi robustorum de medio inferni,\n qui cum auxiliatoribus ejus descenderunt,\n et dormierunt incircumcisi interfecti gladio.\n22\u00a0Ibi Assur, et omnis multitudo ejus:\n in circuitu illius sepulchra ejus,\n omnes interfecti, et qui ceciderunt gladio.\n23\u00a0Quorum data sunt sepulchra in novissimis laci,\n et facta est multitudo ejus per gyrum sepulchri ejus:\n universi interfecti, cadentesque gladio,\n qui dederant quondam formidinem in terra viventium.\n24\u00a0Ibi \u00c6lam, et omnis multitudo ejus per gyrum sepulchri sui:\n omnes hi interfecti, ruentesque gladio,\n qui descenderunt incircumcisi ad terram ultimam;\n qui posuerunt terrorem suum in terra viventium,\n et portaverunt ignominiam suam cum his qui descendunt in lacum.\n25\u00a0In medio interfectorum\n posuerunt cubile ejus in universis populis ejus:\n in circuitu ejus sepulchrum illius:\n omnes hi incircumcisi, interfectique gladio.\n Dederunt enim terrorem suum in terra viventium,\n et portaverunt ignominiam suam cum his qui descendunt in lacum:\n in medio interfectorum positi sunt.\n26\u00a0Ibi Mosoch et Thubal, et omnis multitudo ejus:\n in circuitu ejus sepulchra illius:\n omnes hi incircumcisi, interfectique et cadentes gladio,\n quia dederunt formidinem suam in terra viventium.\n27\u00a0Et non dormient cum fortibus,\n cadentibusque, et incircumcisis,\n qui descenderunt ad infernum cum armis suis,\n et posuerunt gladios suos sub capitibus suis,\n et fuerunt iniquitates eorum in ossibus eorum:\n quia terror fortium facti sunt in terra viventium.\n28\u00a0Et tu ergo in medio incircumcisorum contereris,\n et dormies cum interfectis gladio.\n29\u00a0Ibi Idum\u00e6a, et reges ejus, et omnes duces ejus,\n qui dati sunt cum exercitu suo cum interfectis gladio,\n et qui cum incircumcisis dormierunt,\n et cum his qui descendunt in lacum.\n30\u00a0Ibi principes aquilonis omnes, et universi venatores,\n qui deducti sunt cum interfectis, paventes,\n et in sua fortitudine confusi:\n qui dormierunt incircumcisi\n cum interfectis gladio,\n et portaverunt confusionem suam\n cum his qui descendunt in lacum.\n31\u00a0Vidit eos Pharao, et consolatus est\n super universa multitudine sua,\n qu\u00e6 interfecta est gladio:\n Pharao, et omnis exercitus ejus,\n ait Dominus Deus.\n32\u00a0Quia dedi terrorem meum in terra viventium,\n et dormivit in medio incircumcisorum cum interfectis gladio:\n Pharao, et omnis multitudo ejus,\n ait Dominus Deus.]","title":"Vulgate: Ezekiel: Ezekiel Chapter 32","type":"page"}