{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze038.htm","path":"bib/vul/eze038.htm","source_url":"https://sacred-texts.com/bib/vul/eze038.htm","text":"1 Et factus est sermo Domini ad me, dicens:\n2 Fili hominis, pone faciem tuam contra Gog, terram Magog, principem capitis Mosoch et Thubal, et vaticinare de eo.\n3\u00a0Et dices ad eum: [H\u00e6c dicit Dominus Deus:\n Ecce ego ad te, Gog, principem capitis Mosoch et Thubal.\n4\u00a0Et circumagam te, et ponam frenum in maxillis tuis:\n et educam te, et omnem exercitum tuum,\n equos et equites vestitos loricis universos,\n multitudinem magnam, hastam et clypeum arripientium et gladium.\n5\u00a0Pers\u00e6, \u00c6thiopes, et Libyes cum eis,\n omnes scutati et galeati.\n6\u00a0Gomer et universa agmina ejus,\n domus Thogorma, latera aquilonis,\n et totum robur ejus, populique multi tecum.\n7\u00a0Pr\u00e6para et instrue te,\n et omnem multitudinem tuam qu\u00e6 coacervata est ad te:\n et esto eis in pr\u00e6ceptum.\n8\u00a0Post dies multos visitaberis:\n in novissimo annorum venies ad terram qu\u00e6 reversa est a gladio,\n et congregata est de populis multis ad montes Isra\u00ebl,\n qui fuerunt deserti jugiter:\n h\u00e6c de populis educta est,\n et habitabunt in ea confidenter universi.\n9\u00a0Ascendens autem quasi tempestas venies,\n et quasi nubes, ut operias terram:\n tu et omnia agmina tua,\n et populi multi tecum.]\n \n10\u00a0[H\u00e6c dicit Dominus Deus:\n In die illa, ascendent sermones super cor tuum,\n et cogitabis cogitationem pessimam:\n11\u00a0et dices: Ascendam ad terram absque muro:\n veniam ad quiescentes habitantesque secure:\n hi omnes habitant sine muro;\n vectes et port\u00e6 non sunt eis:\n12\u00a0ut diripias spolia, et invadas pr\u00e6dam;\n ut inferas manum tuam super eos qui deserti fuerant, et postea restituti,\n et super populum qui est congregatus ex gentibus,\n qui possidere c\u0153pit et esse habitator umbilici terr\u00e6.\n13\u00a0Saba, et Dedan, et negotiatores Tharsis,\n et omnes leones ejus, dicent tibi:\n Numquid ad sumenda spolia tu venis?\n ecce ad diripiendam pr\u00e6dam congregasti multitudinem tuam,\n ut tollas argentum et aurum,\n et auferas supellectilem atque substantiam,\n et diripias manubias infinitas.\n14\u00a0Propterea vaticinare, fili hominis, et dices ad Gog:\n H\u00e6c dicit Dominus Deus:\n Numquid non in die illo,\n cum habitaverit populus meus Isra\u00ebl confidenter,\n scies?\n15\u00a0Et venies de loco tuo a lateribus aquilonis,\n tu et populi multi tecum,\n ascensores equorum universi:\n c\u0153tus magnus, et exercitus vehemens.\n16\u00a0Et ascendes super populum meum Isra\u00ebl\n quasi nubes, ut operias terram.\n In novissimis diebus erit,\n et adducam te super terram meam:\n ut sciant gentes me\n cum sanctificatus fuero in te in oculis eorum, o Gog!]\n \n17\u00a0[H\u00e6c dicit Dominus Deus:\n Tu ergo ille es, de quo locutus sum in diebus antiquis\n in manu servorum meorum prophetarum Isra\u00ebl,\n qui prophetaverunt in diebus illorum temporum,\n ut adducerem te super eos.\n18\u00a0Et erit in die illa,\n in die adventus Gog super terram Isra\u00ebl,\n ait Dominus Deus,\n ascendet indignatio mea in furore meo.\n19\u00a0Et in zelo meo, in igne ir\u00e6 me\u00e6 locutus sum,\n quia in die illa erit commotio magna super terram Isra\u00ebl:\n20\u00a0et commovebuntur a facie mea pisces maris,\n et volucres c\u00e6li, et besti\u00e6 agri,\n et omne reptile quod movetur super humum,\n cunctique homines qui sunt super faciem terr\u00e6:\n et subvertentur montes, et cadent sepes,\n et omnis murus corruet in terram.\n21\u00a0Et convocabo adversus eum in cunctis montibus meis gladium,\n ait Dominus Deus:\n gladius uniuscujusque in fratrem suum dirigetur.\n22\u00a0Et judicabo eum peste, et sanguine,\n et imbre vehementi, et lapidibus immensis:\n ignem et sulphur pluam super eum,\n et super exercitum ejus,\n et super populos multos qui sunt cum eo.\n23\u00a0Et magnificabor, et sanctificabor,\n et notus ero in oculis multarum gentium:\n et scient quia ego Dominus.]","title":"Vulgate: Ezekiel: Ezekiel Chapter 38","type":"page"}