{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze041.htm","path":"bib/vul/eze041.htm","source_url":"https://sacred-texts.com/bib/vul/eze041.htm","text":"1 Et introduxit me in templum, et mensus est frontes: sex cubitos latitudinis hinc, et sex cubitos latitudinis inde, latitudinem tabernaculi.\n2 Et latitudo port\u00e6 decem cubitorum erat: et latera port\u00e6, quinque cubitis hinc, et quinque cubitis inde: et mensus est longitudinem ejus quadraginta cubitorum, et latitudinem viginti cubitorum.\n3 Et introgressus intrinsecus, mensus est in fronte port\u00e6 duos cubitos: et portam, sex cubitorum: et latitudinem port\u00e6 septem cubitorum.\n4 Et mensus est longitudinem ejus viginti cubitorum, et latitudinem ejus viginti cubitorum, ante faciem templi. Et dixit ad me: Hoc est Sanctum sanctorum.\n5 Et mensus est parietem domus sex cubitorum: et latitudinem lateris quatuor cubitorum undique per circuitum domus.\n6\u00a0Latera autem, latus ad latus, bis triginta tria: et erant eminentia, qu\u00e6 ingrederentur per parietem domus, in lateribus per circuitum, ut continerent, et non attingerent parietem templi.\n \n7 Et platea erat in rotundum, ascendens sursum per cochleam, et in c\u0153naculum templi deferebat per gyrum: idcirco latius erat templum in superioribus: et sic de inferioribus ascendebatur ad superiora in medium.\n8 Et vidi in domo altitudinem per circuitum, fundata latera ad mensuram calami sex cubitorum spatio:\n9 et latitudinem per parietem lateris forinsecus quinque cubitorum: et erat interior domus in lateribus domus.\n10 Et inter gazophylacia latitudinem viginti cubitorum in circuitu domus undique,\n11 et ostium lateris ad orationem: ostium unum ad viam aquilonis, et ostium unum ad viam australem: et latitudinem loci ad orationem, quinque cubitorum in circuitu.\n12\u00a0Et \u00e6dificium, quod erat separatum, versumque ad viam respicientem ad mare, latitudinis septuaginta cubitorum: paries autem \u00e6dificii, quinque cubitorum latitudinis per circuitum: et longitudo ejus nonaginta cubitorum.\n \n13 Et mensus est domus longitudinem, centum cubitorum: et quod separatum erat \u00e6dificium, et parietes ejus, longitudinis centum cubitorum.\n14 Latitudo autem ante faciem domus, et ejus quod erat separatum contra orientem, centum cubitorum.\n15 Et mensus est longitudinem \u00e6dificii contra faciem ejus, quod erat separatum ad dorsum: ethecas ex utraque parte centum cubitorum: et templum interius, et vestibula atrii.\n16 Limina, et fenestras obliquas, et ethecas in circuitu per tres partes, contra uniuscujusque limen, stratumque ligno per gyrum in circuitu: terra autem usque ad fenestras, et fenestr\u00e6 claus\u00e6 super ostia.\n17 Et usque ad domum interiorem, et forinsecus per omnem parietem in circuitu, intrinsecus et forinsecus, ad mensuram.\n18 Et fabrefacta cherubim et palm\u00e6: et palma inter cherub et cherub, duasque facies habebat cherub.\n19 Faciem hominis juxta palmam ex hac parte, et faciem leonis juxta palmam ex alia parte: expressam per omnem domum in circuitu.\n20 De terra usque ad superiora port\u00e6, cherubim et palm\u00e6 c\u00e6lat\u00e6 erant in pariete templi.\n21 Limen quadrangulum, et facies sanctuarii, aspectus contra aspectum.\n22 Altaris lignei trium cubitorum altitudo, et longitudo ejus duorum cubitorum: et anguli ejus, et longitudo ejus, et parietes ejus lignei. Et locutus est ad me: H\u00e6c est mensa coram Domino.\n23 Et duo ostia erant in templo et in sanctuario.\n24 Et in duobus ostiis ex utraque parte bina erant ostiola qu\u00e6 in se invicem plicabantur: bina enim ostia erant ex utraque parte ostiorum.\n25 Et c\u00e6lata erant in ipsis ostiis templi cherubim, et sculptur\u00e6 palmarum, sicut in parietibus quoque express\u00e6 erant: quam ob rem et grossiora erant ligna in vestibuli fronte forinsecus.\n26 Super qu\u00e6 fenestr\u00e6 obliqu\u00e6, et similitudo palmarum hinc atque inde in humerulis vestibuli, secundum latera domus, latitudinemque parietum.","title":"Vulgate: Ezekiel: Ezekiel Chapter 41","type":"page"}