{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze043.htm","path":"bib/vul/eze043.htm","source_url":"https://sacred-texts.com/bib/vul/eze043.htm","text":"1 Et duxit me ad portam qu\u00e6 respiciebat ad viam orientalem.\n2 Et ecce gloria Dei Isra\u00ebl ingrediebatur per viam orientalem: et vox erat ei quasi vox aquarum multarum, et terra splendebat a majestate ejus.\n3 Et vidi visionem secundum speciem quam videram quando venit ut disperderet civitatem, et species secundum aspectum quem videram juxta fluvium Chobar: et cecidi super faciem meam.\n4 Et majestas Domini ingressa est templum per viam port\u00e6 qu\u00e6 respiciebat ad orientem.\n5 Et elevavit me spiritus, et introduxit me in atrium interius: et ecce repleta erat gloria Domini domus.\n6 Et audivi loquentem ad me de domo: et vir qui stabat juxta me\n7 dixit ad me: Fili hominis, locus solii mei, et locus vestigiorum pedum meorum, ubi habito in medio filiorum Isra\u00ebl in \u00e6ternum: et non polluent ultra domus Isra\u00ebl nomen sanctum meum, ipsi et reges eorum, in fornicationibus suis, et in ruinis regum suorum, et in excelsis.\n8 Qui fabricati sunt limen suum juxta limen meum, et postes suos juxta postes meos, et murus erat inter me et eos: et polluerunt nomen sanctum meum in abominationibus quas fecerunt: propter quod consumpsi eos in ira mea.\n9 Nunc ergo repellant procul fornicationem suam et ruinas regum suorum a me, et habitabo in medio eorum semper.\n10 Tu autem, fili hominis, ostende domui Isra\u00ebl templum, et confundantur ab iniquitatibus suis, et metiantur fabricam,\n11 et erubescant ex omnibus qu\u00e6 fecerunt. Figuram domus, et fabric\u00e6 ejus, exitus et introitus, et omnem descriptionem ejus, et universa pr\u00e6cepta ejus, cunctumque ordinem ejus, et omnes leges ejus ostende eis, et scribes in oculis eorum, ut custodiant omnes descriptiones ejus, et pr\u00e6cepta illius, et faciant ea.\n12\u00a0Ista est lex domus in summitate montis: omnis finis ejus in circuitu, Sanctum sanctorum est. H\u00e6c est ergo lex domus.\n \n13 Ist\u00e6 autem mensur\u00e6 altaris in cubito verissimo, qui habebat cubitum et palmum: in sinu ejus erat cubitus, et cubitus in latitudine: et definitio ejus usque ad labium ejus, et in circuitu palmus unus: h\u00e6c quoque erat fossa altaris.\n14 Et de sinu terr\u00e6 usque ad crepidinem novissimam duo cubiti, et latitudo cubiti unius: et a crepidine minore usque ad crepidinem majorem quatuor cubiti, et latitudo cubiti unius.\n15 Ipse autem ariel quatuor cubitorum, et ab ariel usque ad sursum cornua quatuor.\n16 Et ariel duodecim cubitorum in longitudine per duodecim cubitos latitudinis, quadrangulatum \u00e6quis lateribus.\n17\u00a0Et crepido quatuordecim cubitorum longitudinis per quatuordecim cubitos latitudinis in quatuor angulis ejus: et corona in circuitu ejus dimidii cubiti, et sinus ejus unius cubiti per circuitum: gradus autem ejus versi ad orientem.\n \n18 Et dixit ad me: Fili hominis, h\u00e6c dicit Dominus Deus: Hi sunt ritus altaris, in quacumque die fuerit fabricatum, ut offeratur super illud holocaustum, et effundatur sanguis.\n19 Et dabis sacerdotibus et Levitis qui sunt de semine Sadoc, qui accedunt ad me, ait Dominus Deus, ut offerant mihi vitulum de armento pro peccato.\n20 Et assumens de sanguine ejus, pones super quatuor cornua ejus, et super quatuor angulos crepidinis, et super coronam in circuitu: et mundabis illud et expiabis.\n21 Et tolles vitulum qui oblatus fuerit pro peccato, et combures eum in separato loco domus, extra sanctuarium.\n22 Et in die secunda offeres hircum caprarum immaculatum pro peccato: et expiabunt altare sicut expiaverunt in vitulo.\n23 Cumque compleveris expians illud, offeres vitulum de armento immaculatum, et arietem de grege immaculatum.\n24 Et offeres eos in conspectu Domini: et mittent sacerdotes super eos sal, et offerent eos holocaustum Domino.\n25 Septem diebus facies hircum pro peccato quotidie: et vitulum de armento, et arietem de pecoribus immaculatos offerent.\n26 Septem diebus expiabunt altare et mundabunt illud, et implebunt manum ejus.\n27 Expletis autem diebus, in die octava et ultra, facient sacerdotes super altare holocausta vestra, et qu\u00e6 pro pace offerunt: et placatus ero vobis, ait Dominus Deus.","title":"Vulgate: Ezekiel: Ezekiel Chapter 43","type":"page"}