{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze044.htm","path":"bib/vul/eze044.htm","source_url":"https://sacred-texts.com/bib/vul/eze044.htm","text":"1 Et convertit me ad viam port\u00e6 sanctuarii exterioris, qu\u00e6 respiciebat ad orientem: et erat clausa.\n2 Et dixit Dominus ad me: Porta h\u00e6c clausa erit: non aperietur, et vir non transibit per eam, quoniam Dominus Deus Isra\u00ebl ingressus est per eam: eritque clausa\n3 principi. Princeps ipse sedebit in ea, ut comedat panem coram Domino: per viam port\u00e6 vestibuli ingredietur, et per viam ejus egredietur.\n4 Et adduxit me per viam port\u00e6 aquilonis in conspectu domus: et vidi, et ecce implevit gloria Domini domum Domini: et cecidi in faciem meam.\n5 Et dixit ad me Dominus: Fili hominis, pone cor tuum, et vide oculis tuis, et auribus tuis audi omnia qu\u00e6 ego loquor ad te de universis c\u00e6remoniis domus Domini, et de cunctis legibus ejus: et pones cor tuum in viis templi per omnes exitus sanctuarii.\n6 Et dices ad exasperantem me domum Isra\u00ebl: H\u00e6c dicit Dominus Deus: Sufficiant vobis omnia scelera vestra, domus Isra\u00ebl:\n7 eo quod inducitis filios alienos incircumcisos corde, et incircumcisos carne, ut sint in sanctuario meo, et polluant domum meam: et offertis panes meos, adipem et sanguinem, et dissolvitis pactum meum in omnibus sceleribus vestris.\n8 Et non servastis pr\u00e6cepta sanctuarii mei, et posuistis custodes observationum mearum in sanctuario meo vobismetipsis.\n9\u00a0H\u00e6c dicit Dominus Deus: Omnis alienigena incircumcisus corde, et incircumcisus carne, non ingredietur sanctuarium meum: omnis filius alienus qui est in medio filiorum Isra\u00ebl.\n \n10 Sed et Levit\u00e6 qui longe recesserunt a me in errore filiorum Isra\u00ebl, et erraverunt a me post idola sua, et portaverunt iniquitatem suam,\n11 erunt in sanctuario meo \u00e6ditui, et janitores portarum domus, et ministri domus: ipsi mactabunt holocausta et victimas populi, et ipsi stabunt in conspectu eorum ut ministrent eis.\n12 Pro eo quod ministraverunt illis in conspectu idolorum suorum, et facti sunt domui Isra\u00ebl in offendiculum iniquitatis: idcirco levavi manum meam super eos, ait Dominus Deus, et portabunt iniquitatem suam.\n13 Et non appropinquabunt ad me ut sacerdotio fungantur mihi, neque accedent ad omne sanctuarium meum juxta Sancta sanctorum: sed portabunt confusionem suam, et scelera sua qu\u00e6 fecerunt.\n14\u00a0Et dabo eos janitores domus in omni ministerio ejus, et in universis qu\u00e6 fient in ea.\n \n15 Sacerdotes autem et Levit\u00e6, filii Sadoc, qui custodierunt c\u00e6remonias sanctuarii mei, cum errarent filii Isra\u00ebl a me, ipsi accedent ad me ut ministrent mihi: et stabunt in conspectu meo, ut offerant mihi adipem et sanguinem, ait Dominus Deus.\n16 Ipsi ingredientur sanctuarium meum, et ipsi accedent ad mensam meam, ut ministrent mihi, et custodiant c\u00e6remonias meas.\n17 Cumque ingredientur portas atrii interioris, vestibus lineis induentur: nec ascendet super eos quidquam laneum, quando ministrant in portis atrii interioris et intrinsecus.\n18 Vitt\u00e6 line\u00e6 erunt in capitibus eorum, et feminalia linea erunt in lumbis eorum, et non accingentur in sudore.\n19 Cumque egredientur atrium exterius ad populum, exuent se vestimentis suis in quibus ministraverant, et reponent ea in gazophylacio sanctuarii: et vestient se vestimentis aliis, et non sanctificabunt populum in vestibus suis.\n20 Caput autem suum non radent, neque comam nutrient: sed tondentes attondent capita sua.\n21 Et vinum non bibet omnis sacerdos, quando ingressurus est atrium interius.\n22 Et viduam et repudiatam non accipient uxores, sed virgines de semine domus Isra\u00ebl: sed et viduam qu\u00e6 fuerit vidua a sacerdote, accipient.\n23 Et populum meum docebunt quid sit inter sanctum et pollutum, et inter mundum et immundum ostendent eis.\n24 Et cum fuerit controversia, stabunt in judiciis meis, et judicabunt: leges meas et pr\u00e6cepta mea in omnibus solemnitatibus meis custodient, et sabbata mea sanctificabunt.\n25 Et ad mortuum hominem non ingredientur, ne polluantur, nisi ad patrem et matrem, et filium et filiam, et fratrem, et sororem qu\u00e6 alterum virum non habuerit: in quibus contaminabuntur.\n26 Et postquam fuerit emundatus, septem dies numerabuntur ei.\n27 Et in die introitus sui in sanctuarium ad atrium interius, ut ministret mihi in sanctuario, offeret pro peccato suo, ait Dominus Deus.\n28 Non erit autem eis h\u00e6reditas: ego h\u00e6reditas eorum. Et possessionem non dabitis eis in Isra\u00ebl: ego enim possessio eorum.\n29 Victimam et pro peccato et pro delicto ipsi comedent, et omne votum in Isra\u00ebl ipsorum erit.\n30 Et primitiva omnium primogenitorum, et omnia libamenta ex omnibus qu\u00e6 offeruntur, sacerdotum erunt: et primitiva ciborum vestrorum dabitis sacerdoti, ut reponat benedictionem domui tu\u00e6.\n31 Omne morticinum, et captum a bestia, de avibus et de pecoribus, non comedent sacerdotes.","title":"Vulgate: Ezekiel: Ezekiel Chapter 44","type":"page"}