{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze045.htm","path":"bib/vul/eze045.htm","source_url":"https://sacred-texts.com/bib/vul/eze045.htm","text":"1 Cumque c\u0153peritis terram dividere sortito, separate primitias Domino, sanctificatum de terra, longitudine viginti quinque millia, et latitudine decem millia: sanctificatum erit in omni termino ejus per circuitum.\n2 Et erit ex omni parte sanctificatum quingentos per quingentos, quadrifariam per circuitum, et quinquaginta cubitis in suburbana ejus per gyrum.\n3 Et a mensura ista mensurabis longitudinem viginti quinque millium, et latitudinem decem millium: et in ipso erit templum, Sanctumque sanctorum.\n4 Sanctificatum de terra erit sacerdotibus ministris sanctuarii, qui accedunt ad ministerium Domini: et erit eis locus in domos, et in sanctuarium sanctitatis.\n5 Viginti quinque autem millia longitudinis, et decem millia latitudinis erunt Levitis qui ministrant domui: ipsi possidebunt viginti gazophylacia.\n6 Et possessionem civitatis dabitis quinque millia latitudinis, et longitudinis viginti quinque millia, secundum separationem sanctuarii, omni domui Isra\u00ebl.\n7 Principi quoque hinc et inde in separationem sanctuarii, et in possessionem civitatis, contra faciem separationis sanctuarii, et contra faciem possessionis urbis, a latere maris usque ad mare, et a latere orientis usque ad orientem: longitudinis autem juxta unamquamque partem, a termino occidentali usque ad terminum orientalem.\n8 De terra erit ei possessio in Isra\u00ebl, et non depopulabuntur ultra principes populum meum: sed terram dabunt domui Isra\u00ebl secundum tribus eorum.\n9 H\u00e6c dicit Dominus Deus: Sufficiat vobis, principes Isra\u00ebl: iniquitatem et rapinas intermittite, et judicium et justitiam facite: separate confinia vestra a populo meo, ait Dominus Deus.\n10 Statera justa, et ephi justum, et batus justus erit vobis.\n11 Ephi et batus \u00e6qualia et unius mensur\u00e6 erunt, ut capiat decimam partem cori batus, et decimam partem cori ephi: juxta mensuram cori erit \u00e6qua libratio eorum.\n12\u00a0Siclus autem viginti obolos habet: porro viginti sicli, et viginti quinque sicli, et quindecim sicli, mnam faciunt.\n \n13 Et h\u00e6c sunt primiti\u00e6 quas tolletis: sextam partem ephi de coro frumenti, et sextam partem ephi de coro hordei.\n14 Mensura quoque olei, batus olei, decima pars cori est: et decem bati corum faciunt, quia decem bati implent corum.\n15 Et arietem unum de grege ducentorum, de his qu\u00e6 nutriunt Isra\u00ebl, in sacrificium, et in holocaustum, et in pacifica, ad expiandum pro eis, ait Dominus Deus.\n16 Omnis populus terr\u00e6 tenebitur primitiis his principi in Isra\u00ebl.\n17\u00a0Et super principem erunt holocausta, et sacrificium, et libamina, in solemnitatibus, et in calendis, et in sabbatis, et in universis solemnitatibus domus Isra\u00ebl: ipse faciet pro peccato sacrificium, et holocaustum, et pacifica, ad expiandum pro domo Isra\u00ebl.\n \n18 H\u00e6c dicit Dominus Deus: In primo mense, una mensis, sumes vitulum de armento immaculatum, et expiabis sanctuarium.\n19 Et tollet sacerdos de sanguine quod erit pro peccato, et ponet in postibus domus, et in quatuor angulis crepidinis altaris, et in postibus port\u00e6 atrii interioris.\n20 Et sic facies in septima mensis, pro unoquoque qui ignoravit, et errore deceptus est: et expiabis pro domo.\n21 In primo mense, quartadecima die mensis, erit vobis Pasch\u00e6 solemnitas: septem diebus azyma comedentur.\n22 Et faciet princeps in die illa, pro se et pro universo populo terr\u00e6, vitulum pro peccato.\n23 Et in septem dierum solemnitate faciet holocaustum Domino, septem vitulos et septem arietes immaculatos, quotidie septem diebus: et pro peccato hircum caprarum quotidie.\n24 Et sacrificium ephi per vitulum, et ephi per arietem faciet, et olei hin per singula ephi.\n25 Septimo mense, quintadecima die mensis, in solemnitate, faciet sicut supra dicta sunt per septem dies, tam pro peccato quam pro holocausto, et in sacrificio, et in oleo.","title":"Vulgate: Ezekiel: Ezekiel Chapter 45","type":"page"}