{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze047.htm","path":"bib/vul/eze047.htm","source_url":"https://sacred-texts.com/bib/vul/eze047.htm","text":"1 Et convertit me ad portam domus, et ecce aqu\u00e6 egrediebantur subter limen domus ad orientem: facies enim domus respiciebat ad orientem, aqu\u00e6 autem descendebant in latus templi dextrum, ad meridiem altaris.\n2 Et eduxit me per viam port\u00e6 aquilonis, et convertit me ad viam foras portam exteriorem, viam qu\u00e6 respiciebat ad orientem: et ecce aqu\u00e6 redundantes a latere dextro.\n3 Cum egrederetur vir ad orientem, qui habebat funiculum in manu sua, et mensus est mille cubitos, et traduxit me per aquam usque ad talos.\n4 Rursumque mensus est mille, et traduxit me per aquam usque ad genua.\n5 Et mensus est mille, et traduxit me per aquam usque ad renes. Et mensus est mille, torrentem quem non potui pertransire, quoniam intumuerant aqu\u00e6 profundi torrentis, qui non potest transvadari.\n6 Et dixit ad me: Certe vidisti, fili hominis. Et eduxit me, et convertit ad ripam torrentis.\n7 Cumque me convertissem, ecce in ripa torrentis ligna multa nimis ex utraque parte.\n8 Et ait ad me: Aqu\u00e6 ist\u00e6 qu\u00e6 egrediuntur ad tumulos sabuli orientalis, et descendunt ad plana deserti, intrabunt mare et exibunt: et sanabuntur aqu\u00e6.\n9 Et omnis anima vivens qu\u00e6 serpit quocumque venerit torrens, vivet: et erunt pisces multi satis, postquam venerint illuc aqu\u00e6 ist\u00e6: et sanabuntur et vivent omnia ad qu\u00e6 venerit torrens.\n10 Et stabunt super illas piscatores: ab Engaddi usque ad Engallim siccatio sagenarum erit: plurim\u00e6 species erunt piscium ejus, sicut pisces maris magni, multitudinis nimi\u00e6.\n11 In littoribus autem ejus et in palustribus, non sanabuntur, quia in salinas dabuntur.\n12\u00a0Et super torrentem orietur in ripis ejus, ex utraque parte, omne lignum pomiferum: non defluet folium ex eo, et non deficiet fructus ejus: per singulos menses afferet primitiva, quia aqu\u00e6 ejus de sanctuario egredientur: et erunt fructus ejus in cibum, et folia ejus ad medicinam.\n \n13 H\u00e6c dicit Dominus Deus: Hic est terminus in quo possidebitis terram in duodecim tribubus Isra\u00ebl: quia Joseph duplicem funiculum habet.\n14 Possidebitis autem eam singuli \u00e6que ut frater suus, super quam levavi manum meam ut darem patribus vestris: et cadet terra h\u00e6c vobis in possessionem.\n15 Hic est autem terminus terr\u00e6: ad plagam septentrionalem, a mari magno via Hethalon, venientibus Sedada,\n16 Emath, Berotha, Sabarim, qu\u00e6 est inter terminum Damasci et confinium Emath, domus Tichon, qu\u00e6 est juxta terminum Auran.\n17 Et erit terminus a mari usque ad atrium Enon, terminus Damasci: et ab aquilone ad aquilonem, terminus Emath plaga septentrionalis.\n18 Porro plaga orientalis de medio Auran, et de medio Damasci, et de medio Galaad, et de medio terr\u00e6 Isra\u00ebl, Jordanis disterminans ad mare orientale. Metiemini etiam plagam orientalem.\n19 Plaga autem australis meridiana, a Thamar usque ad aquas contradictionis Cades, et torrens usque ad mare magnum: et h\u00e6c est plaga ad meridiem australis.\n20\u00a0Et plaga maris, mare magnum a confinio per directum, donec venias Emath: h\u00e6c est plaga maris.\n \n21 Et dividetis terram istam vobis per tribus Isra\u00ebl:\n22 et mittetis eam in h\u00e6reditatem vobis, et advenis qui accesserint ad vos, qui genuerint filios in medio vestrum: et erunt vobis sicut indigen\u00e6 inter filios Isra\u00ebl: vobiscum divident possessionem in medio tribuum Isra\u00ebl.\n23 In tribu autem quacumque fuerit advena, ibi dabitis possessionem illi, ait Dominus Deus.","title":"Vulgate: Ezekiel: Ezekiel Chapter 47","type":"page"}