{"collection":"Bible & Christianity","html_url":"https://unchartedknowledge.5gfusion.net/browse/bib/vul/eze048.htm","path":"bib/vul/eze048.htm","source_url":"https://sacred-texts.com/bib/vul/eze048.htm","text":"1 Et h\u00e6c nomina tribuum a finibus aquilonis, juxta viam Hethalon, pergentibus Emath, atrium Enan terminus Damasci ad aquilonem, juxta viam Emath: et erit ei plaga orientalis mare, Dan una.\n2 Et super terminum Dan, a plaga orientali usque ad plagam maris, Aser una.\n3 Et super terminum Aser, a plaga orientali usque ad plagam maris, Nephthali una.\n4 Et super terminum Nephthali, a plaga orientali usque ad plagam maris, Manasse una.\n5 Et super terminum Manasse, a plaga orientali usque ad plagam maris, Ephraim una.\n6 Et super terminum Ephraim, a plaga orientali usque ad plagam maris, Ruben una.\n7\u00a0Et super terminum Ruben, a plaga orientali usque ad plagam maris, Juda una.\n \n8 Et super terminum Juda, a plaga orientali usque ad plagam maris, erunt primiti\u00e6 quas separabitis, viginti quinque millibus latitudinis et longitudinis, sicuti singul\u00e6 partes a plaga orientali usque ad plagam maris: et erit sanctuarium in medio ejus.\n9 Primiti\u00e6 quas separabitis Domino, longitudo viginti quinque millibus, et latitudo decem millibus.\n10 H\u00e6 autem erunt primiti\u00e6 sanctuarii sacerdotum, ad aquilonem longitudinis viginti quinque millia, et ad mare latitudinis decem millia, sed et ad orientem latitudinis decem millia, et ad meridiem longitudinis viginti quinque millia: et erit sanctuarium Domini in medio ejus.\n11 Sacerdotibus sanctuarium erit de filiis Sadoc, qui custodierunt c\u00e6remonias meas, et non erraverunt cum errarent filii Isra\u00ebl, sicut erraverunt et Levit\u00e6.\n12 Et erunt eis primiti\u00e6 de primitiis terr\u00e6 Sanctum sanctorum, juxta terminum Levitarum.\n13 Sed et Levitis similiter, juxta fines sacerdotum, viginti quinque millia longitudinis, et latitudinis decem millia. Omnis longitudo viginti et quinque millium, et latitudo decem millium.\n14\u00a0Et non venundabunt ex eo, neque mutabunt: neque transferentur primiti\u00e6 terr\u00e6, quia sanctificat\u00e6 sunt Domino.\n \n15 Quinque millia autem qu\u00e6 supersunt in latitudine per viginti quinque millia, profana erunt urbis in habitaculum et in suburbana: et erit civitas in medio ejus.\n16 Et h\u00e6 mensur\u00e6 ejus: ad plagam septentrionalem, quingenta et quatuor millia: et ad plagam meridianam, quingenta et quatuor millia: et ad plagam orientalem, quingenta et quatuor millia: et ad plagam occidentalem, quingenta et quatuor millia.\n17 Erunt autem suburbana civitatis ad aquilonem, ducenta quinquaginta: et ad meridiem, ducenta quinquaginta: et ad orientem, ducenta quinquaginta: et ad mare, ducenta quinquaginta.\n18 Quod autem reliquum fuerit in longitudine secundum primitias sanctuarii, decem millia in orientem, et decem millia in occidentem, erunt sicut primiti\u00e6 sanctuarii: et erunt fruges ejus in panes his qui serviunt civitati.\n19 Servientes autem civitati, operabuntur ex omnibus tribubus Isra\u00ebl.\n20\u00a0Omnes primiti\u00e6 viginti quinque millium, per viginti quinque millia in quadrum, separabuntur in primitias sanctuarii, et in possessionem civitatis.\n \n21 Quod autem reliquum fuerit, principis erit ex omni parte primitiarum sanctuarii, et possessionis civitatis e regione viginti quinque millium primitiarum usque ad terminum orientalem: sed et ad mare, e regione viginti quinque millium, usque ad terminum maris, similiter in partibus principis erit: et erunt primiti\u00e6 sanctuarii, et sanctuarium templi, in medio ejus.\n22\u00a0De possessione autem Levitarum, et de possessione civitatis in medio partium principis, erit inter terminum Juda et inter terminum Benjamin, et ad principem pertinebit.\n \n23 Et reliquis tribubus, a plaga orientali usque ad plagam occidentalem, Benjamin una.\n24 Et contra terminum Benjamin, a plaga orientali usque ad plagam occidentalem, Simeon una.\n25 Et super terminum Simeonis, a plaga orientali usque ad plagam occidentalem, Issachar una.\n26 Et super terminum Issachar, a plaga orientali usque ad plagam occidentalem, Zabulon una.\n27 Et super terminum Zabulon, a plaga orientali usque ad plagam maris, Gad una.\n28 Et super terminum Gad, ad plagam austri in meridie: et erit finis de Thamar usque ad aquas contradictionis Cades: h\u00e6reditas contra mare magnum.\n29\u00a0H\u00e6c est terra quam mittetis in sortem tribubus Isra\u00ebl, et h\u00e6 partitiones earum, ait Dominus Deus.\n \n30 Et hi egressus civitatis: a plaga septentrionali, quingentos et quatuor millibus mensurabis.\n31 Et port\u00e6 civitatis ex nominibus tribuum Isra\u00ebl: port\u00e6 tres a septentrione: porta Ruben una, porta Juda una, porta Levi una.\n32 Et ad plagam orientalem, quingentos et quatuor millia, et port\u00e6 tres: porta Joseph una, porta Benjamin una, porta Dan una.\n33 Et ad plagam meridianam, quingentos et quatuor millia metieris, et port\u00e6 tres: porta Simeonis una, porta Issachar una, porta Zabulon una.\n34 Et ad plagam occidentalem, quingentos et quatuor millia, et port\u00e6 eorum tres: porta Gad una, porta Aser una, porta Nephthali una.\n35 Per circuitum, decem et octo millia: et nomen civitatis ex illa die, Dominus ibidem.","title":"Vulgate: Ezekiel: Ezekiel Chapter 48","type":"page"}