{"collection":"Bible & Christianity","html_url":"https://unchartedknowledge.5gfusion.net/browse/bib/vul/ezr001.htm","path":"bib/vul/ezr001.htm","source_url":"https://sacred-texts.com/bib/vul/ezr001.htm","text":"1 In anno primo Cyri regis Persarum, ut compleretur verbum Domini ex ore Jeremi\u00e6, suscitavit Dominus spiritum Cyri regis Persarum: et traduxit vocem in omni regno suo, etiam per scripturam, dicens:\n2 H\u00e6c dicit Cyrus rex Persarum: Omnia regna terr\u00e6 dedit mihi Dominus Deus c\u00e6li, et ipse pr\u00e6cepit mihi ut \u00e6dificarem ei domum in Jerusalem, qu\u00e6 est in Jud\u00e6a.\n3 Quis est in vobis de universo populo ejus? Sit Deus illius cum ipso. Ascendat in Jerusalem, qu\u00e6 est in Jud\u00e6a, et \u00e6dificet domum Domini Dei Isra\u00ebl: ipse est Deus qui est in Jerusalem.\n4\u00a0Et omnes reliqui in cunctis locis ubicumque habitant, adjuvent eum viri de loco suo argento et auro, et substantia, et pecoribus, excepto quod voluntarie offerunt templo Dei, quod est in Jerusalem.\n \n5 Et surrexerunt principes patrum de Juda et Benjamin, et sacerdotes, et Levit\u00e6, et omnis cujus Deus suscitavit spiritum, ut ascenderent ad \u00e6dificandum templum Domini, quod erat in Jerusalem.\n6 Universique qui erant in circuitu, adjuverunt manus eorum in vasis argenteis et aureis, in substantia et jumentis, in supellectili, exceptis his qu\u00e6 sponte obtulerant.\n7 Rex quoque Cyrus protulit vasa templi Domini, qu\u00e6 tulerat Nabuchodonosor de Jerusalem, et posuerat ea in templo dei sui.\n8 Protulit autem ea Cyrus rex Persarum per manum Mithridatis filii Gazabar, et annumeravit ea Sassabasar principi Juda.\n9 Et hic est numerus eorum: phial\u00e6 aure\u00e6 triginta, phial\u00e6 argente\u00e6 mille, cultri viginti novem, scyphi aurei triginta,\n10 scyphi argentei secundi quadringenti decem, vasa alia mille.\n11 Omnia vasa aurea et argentea quinque millia quadringenta: universa tulit Sassabasar cum his qui ascendebant de transmigratione Babylonis in Jerusalem.","title":"Vulgate: Ezra: Ezra Chapter 1","type":"page"}