{"collection":"Bible & Christianity","html_url":"https://unchartedknowledge.5gfusion.net/browse/bib/vul/ezr005.htm","path":"bib/vul/ezr005.htm","source_url":"https://sacred-texts.com/bib/vul/ezr005.htm","text":"1 Prophetaverunt autem Agg\u00e6us propheta, et Zacharias filius Addo, prophetantes ad Jud\u00e6os qui erant in Jud\u00e6a et Jerusalem, in nomine Dei Isra\u00ebl.\n2 Tunc surrexerunt Zorobabel filius Salathiel, et Josue filius Josedec, et c\u0153perunt \u00e6dificare templum Dei in Jerusalem, et cum eis prophet\u00e6 Dei adjuvantes eos.\n3 In ipso autem tempore venit ad eos Thathanai, qui erat dux trans flumen, et Stharbuzanai, et consiliarii eorum: sicque dixerunt eis: Quis dedit vobis consilium ut domum hanc \u00e6dificaretis, et muros ejus instauraretis?\n4 Ad quod respondimus eis, qu\u00e6 essent nomina hominum auctorum \u00e6dificationis illius.\n5\u00a0Oculus autem Dei eorum factus est super senes Jud\u00e6orum, et non potuerunt inhibere eos. Placuitque ut res ad Darium referretur, et tunc satisfacerent adversus accusationem illam.\n \n6 Exemplar epistol\u00e6, quam misit Thathanai dux regionis trans flumen, et Stharbuzanai, et consiliatores ejus Arphasach\u00e6i, qui erant trans flumen, ad Darium regem.\n7 Sermo, quem miserant ei, sic scriptus erat: Dario regi pax omnis.\n8 Notum sit regi, isse nos ad Jud\u00e6am provinciam, ad domum Dei magni, qu\u00e6 \u00e6dificatur lapide impolito, et ligna ponuntur in parietibus: opusque illud diligenter exstruitur, et crescit in manibus eorum.\n9 Interrogavimus ergo senes illos, et ita diximus eis: Quis dedit vobis potestatem ut domum hanc \u00e6dificaretis, et muros hos instauraretis?\n10 Sed et nomina eorum qu\u00e6sivimus ab eis, ut nuntiaremus tibi: scripsimusque nomina eorum virorum, qui sunt principes in eis.\n11 Hujuscemodi autem sermonem responderunt nobis dicentes: Nos sumus servi Dei c\u00e6li et terr\u00e6, et \u00e6dificamus templum, quod erat exstructum ante hos annos multos, quodque rex Isra\u00ebl magnus \u00e6dificaverat, et exstruxerat.\n12 Postquam autem ad iracundiam provocaverunt patres nostri Deum c\u00e6li, tradidit eos in manus Nabuchodonosor regis Babylonis Chald\u00e6i, domum quoque hanc destruxit, et populum ejus transtulit in Babylonem.\n13 Anno autem primo Cyri regis Babylonis, Cyrus rex proposuit edictum ut domus Dei h\u00e6c \u00e6dificaretur.\n14 Nam et vasa templi Dei aurea et argentea, qu\u00e6 Nabuchodonosor tulerat de templo, quod erat in Jerusalem, et asportaverat ea in templum Babylonis, protulit Cyrus rex de templo Babylonis, et data sunt Sassabasar vocabulo, quem et principem constituit,\n15 dixitque ei: H\u00e6c vasa tolle, et vade, et pone ea in templo, quod est in Jerusalem, et domus Dei \u00e6dificetur in loco suo.\n16 Tunc itaque Sassabasar ille venit et posuit fundamenta templi Dei in Jerusalem, et ex eo tempore usque nunc \u00e6dificatur, et necdum completum est.\n17 Nunc ergo si videtur regi bonum, recenseat in bibliotheca regis, qu\u00e6 est in Babylone, utrumnam a Cyro rege jussum fuerit ut \u00e6dificaretur domus Dei in Jerusalem, et voluntatem regis super hac re mittat ad nos.","title":"Vulgate: Ezra: Ezra Chapter 5","type":"page"}