{"collection":"Bible & Christianity","html_url":"https://unchartedknowledge.5gfusion.net/browse/bib/vul/ezr007.htm","path":"bib/vul/ezr007.htm","source_url":"https://sacred-texts.com/bib/vul/ezr007.htm","text":"1 Post h\u00e6c autem verba in regno Artaxerxis regis Persarum, Esdras filius Sarai\u00e6, filii Azari\u00e6, filii Helci\u00e6,\n2 filii Sellum, filii Sadoc, filii Achitob,\n3 filii Amari\u00e6, filii Azari\u00e6, filii Maraioth,\n4 filii Zarahi\u00e6, filii Ozi, filii Bocci,\n5 filii Abisue, filii Phinees, filii Eleazar, filii Aaron sacerdotis ab initio.\n6 Ipse Esdras ascendit de Babylone, et ipse scriba velox in lege Moysi, quam Dominus Deus dedit Isra\u00ebl: et dedit ei rex secundum manum Domini Dei ejus super eum, omnem petitionem ejus.\n7 Et ascenderunt de filiis Isra\u00ebl, et de filiis sacerdotum, et de filiis Levitarum, et de cantoribus, et de janitoribus, et de Nathin\u00e6is, in Jerusalem, anno septimo Artaxerxis regis.\n8 Et venerunt in Jerusalem mense quinto, ipse est annus septimus regis.\n9 Quia in primo die mensis primi c\u0153pit ascendere de Babylone, et in primo die mensis quinti venit in Jerusalem, juxta manum Dei sui bonam super se.\n10\u00a0Esdras enim paravit cor suum, ut investigaret legem Domini, et faceret et doceret in Isra\u00ebl pr\u00e6ceptum et judicium.\n \n11 Hoc est autem exemplar epistol\u00e6 edicti, quod dedit rex Artaxerxes Esdr\u00e6 sacerdoti, scrib\u00e6 erudito in sermonibus et pr\u00e6ceptis Domini, et c\u00e6remoniis ejus in Isra\u00ebl.\n12 Artaxerxes rex regum Esdr\u00e6 sacerdoti scrib\u00e6 legis Dei c\u00e6li doctissimo, salutem.\n13 A me decretum est, ut cuicumque placuerit in regno meo de populo Isra\u00ebl, et de sacerdotibus ejus, et de Levitis, ire in Jerusalem, tecum vadat.\n14 A facie enim regis, et septem consiliatorum ejus, missus es, ut visites Jud\u00e6am et Jerusalem in lege Dei tui, qu\u00e6 est in manu tua:\n15 et ut feras argentum et aurum quod rex, et consiliatores ejus, sponte obtulerunt Deo Isra\u00ebl, cujus in Jerusalem tabernaculum est.\n16 Et omne argentum et aurum quodcumque inveneris in universa provincia Babylonis, et populus offerre voluerit, et de sacerdotibus qu\u00e6 sponte obtulerint domui Dei sui, qu\u00e6 est in Jerusalem,\n17 libere accipe, et studiose eme de hac pecunia vitulos, arietes, agnos, et sacrificia, et libamina eorum, et offer ea super altare templi Dei vestri, quod est in Jerusalem.\n18 Sed et si quid tibi et fratribus tuis placuerit de reliquo argento et auro ut faciatis, juxta voluntatem Dei vestri facite.\n19 Vasa quoque, qu\u00e6 dantur tibi in ministerium domus Dei tui, trade in conspectu Dei in Jerusalem.\n20 Sed et cetera, quibus opus fuerit in domum Dei tui, quantumcumque necesse est ut expendas, dabitur de thesauro, et de fisco regis,\n21 et a me. Ego Artaxerxes rex, statui atque decrevi omnibus custodibus arc\u00e6 public\u00e6, qui sunt trans flumen, ut quodcumque petierit a vobis Esdras sacerdos, scriba legis Dei c\u00e6li, absque mora detis,\n22 usque ad argenti talenta centum, et usque ad frumenti coros centum, et usque ad vini batos centum, et usque ad batos olei centum, sal vero absque mensura.\n23 Omne quod ad ritum Dei c\u00e6li pertinet, tribuatur diligenter in domo Dei c\u00e6li: ne forte irascatur contra regnum regis, et filiorum ejus.\n24 Vobis quoque notum facimus de universis sacerdotibus, et Levitis, et cantoribus, et janitoribus, Nathin\u00e6is, et ministris domus Dei hujus, ut vectigal, et tributum, et annonas non habeatis potestatem imponendi super eos.\n25 Tu autem Esdra, secundum sapientiam Dei tui, qu\u00e6 est in manu tua, constitue judices et pr\u00e6sides, ut judicent omni populo qui est trans flumen, his videlicet qui noverunt legem Dei tui: sed et imperitos docete libere.\n26\u00a0Et omnis qui non fecerit legem Dei tui, et legem regis, diligenter, judicium erit de eo sive in mortem, sive in exilium, sive in condemnationem substanti\u00e6 ejus, vel certe in carcerem.\n \n27 Benedictus Dominus Deus patrum nostrorum, qui dedit hoc in corde regis ut glorificaret domum Domini qu\u00e6 est in Jerusalem,\n28 et in me inclinavit misericordiam suam coram rege et consiliatoribus ejus, et universis principibus regis potentibus: et ego confortatus manu Domini Dei mei, qu\u00e6 erat in me, congregavi de Isra\u00ebl principes qui ascenderent mecum.","title":"Vulgate: Ezra: Ezra Chapter 7","type":"page"}