{"collection":"Bible & Christianity","html_url":"https://unchartedknowledge.5gfusion.net/browse/bib/vul/ezr008.htm","path":"bib/vul/ezr008.htm","source_url":"https://sacred-texts.com/bib/vul/ezr008.htm","text":"1 Hi sunt ergo principes familiarum, et genealogia eorum, qui ascenderunt mecum in regno Artaxerxis regis de Babylone.\n2 De filiis Phinees, Gersom. De filiis Ithamar, Daniel. De filiis David, Hattus.\n3 De filiis Secheni\u00e6, filiis Pharos, Zacharias: et cum eo numerati sunt viri centum quinquaginta.\n4 De filiis Phahath Moab, Elio\u00ebnai filius Zarehe, et cum eo ducenti viri.\n5 De filiis Secheni\u00e6, filius Ezechiel, et cum eo trecenti viri.\n6 De filiis Adan, Abed filius Jonathan, et cum eo quinquaginta viri.\n7 De filiis Alam, Isaias filius Athali\u00e6, et cum eo septuaginta viri.\n8 De filiis Saphati\u00e6, Zebedia filius Micha\u00ebl, et cum eo octoginta viri.\n9 De filiis Joab, Obedia filius Jahiel, et cum eo ducenti decem et octo viri.\n10 De filiis Selomith, filius Josphi\u00e6, et cum eo centum sexaginta viri.\n11 De filiis Bebai, Zacharias filius Bebai, et cum eo viginti octo viri.\n12 De filiis Azgad, Johanan filius Eccetan, et cum eo centum et decem viri.\n13 De filiis Adonicam, qui erant novissimi: et h\u00e6c nomina eorum: Elipheleth, et Jehiel, et Samaias, et cum eis sexaginta viri.\n14\u00a0De filii Begui, Uthai et Zachur, et cum eis septuaginta viri.\n \n15 Congregavi autem eos ad fluvium qui decurrit ad Ahava, et mansimus ibi tribus diebus: qu\u00e6sivique in populo et in sacerdotibus de filiis Levi, et non inveni ibi.\n16 Itaque misi Eliezer, et Ariel, et Semeiam, et Elnathan, et Jarib, et alterum Elnathan, et Nathan, et Zachariam, et Mosollam principes: et Jojarib, et Elnathan sapientes.\n17 Et misi eos ad Eddo, qui est primus in Chasphi\u00e6 loco, et posui in ore eorum verba, qu\u00e6 loquerentur ad Eddo, et fratres ejus Nathin\u00e6os in loco Chasphi\u00e6, ut adducerent nobis ministros domus Dei nostri.\n18 Et adduxerunt nobis per manum Dei nostri bonam super nos, virum doctissimum de filiis Moholi filii Levi, filii Isra\u00ebl, et Sarabiam et filios ejus et fratres ejus decem et octo,\n19 et Hasabiam, et cum eo Isaiam de filiis Merari, fratresque ejus, et filios ejus viginti:\n20 et de Nathin\u00e6is, quos dederat David et principes ad ministeria Levitarum, Nathin\u00e6os ducentos viginti: omnes hi suis nominibus vocabantur.\n21 Et pr\u00e6dicavi ibi jejunium juxta fluvium Ahava, ut affligeremur coram Domino Deo nostro, et peteremus ab eo viam rectam nobis et filiis nostris, univers\u00e6que substanti\u00e6 nostr\u00e6.\n22 Erubui enim petere a rege auxilium et equites, qui defenderent nos ab inimico in via: quia dixeramus regi: Manus Dei nostri est super omnes qui qu\u00e6runt eum in bonitate: et imperium ejus, et fortitudo ejus, et furor, super omnes qui derelinquunt eum.\n23 Jejunavimus autem, et rogavimus Deum nostrum per hoc: et evenit nobis prospere.\n24 Et separavi de principibus sacerdotum duodecim, Sarabiam, et Hasabiam, et cum eis de fratribus eorum decem:\n25 appendique eis argentum et aurum, et vasa consecrata domus Dei nostri, qu\u00e6 obtulerat rex et consiliatores ejus, et principes ejus, universusque Isra\u00ebl eorum qui inventi fuerant:\n26 et appendi in manibus eorum argenti talenta sexcenta quinquaginta, et vasa argentea centum, auri centum talenta:\n27 et crateres aureos viginti, qui habebant solidos millenos, et vasa \u00e6ris fulgentis optimi duo, pulchra ut aurum.\n28 Et dixi eis: Vos sancti Domini, et vasa sancta, et argentum et aurum, quod sponte oblatum est Domino Deo patrum nostrorum:\n29 vigilate et custodite, donec appendatis coram principibus sacerdotum, et Levitarum, et ducibus familiarum Isra\u00ebl in Jerusalem, in thesaurum domus Domini.\n30 Susceperunt autem sacerdotes et Levit\u00e6 pondus argenti, et auri, et vasorum, ut deferrent Jerusalem in domum Dei nostri.\n31\u00a0Promovimus ergo a flumine Ahava duodecimo die mensis primi ut pergeremus Jerusalem: et manus Dei nostri fuit super nos, et liberavit nos de manu inimici et insidiatoris in via.\n \n32 Et venimus Jerusalem, et mansimus ibi tribus diebus.\n33 Die autem quarta appensum est argentum, et aurum, et vasa in domo Dei nostri per manum Meremoth filii Uri\u00e6 sacerdotis, et cum eo Eleazar filius Phinees, cumque eis Jozabed filius Josue, et Noadaia filius Bennoi Levit\u00e6,\n34 juxta numerum et pondus omnium: descriptumque est omne pondus in tempore illo.\n35 Sed et qui venerant de captivitate filii transmigrationis, obtulerunt holocautomata Deo Isra\u00ebl, vitulos duodecim pro omni populo Isra\u00ebl, arietes nonaginta sex, agnos septuaginta septem, hircos pro peccato duodecim: omnia in holocaustum Domino.\n36 Dederunt autem edicta regis satrapis qui erant de conspectu regis, et ducibus trans flumen, et elevaverunt populum et domum Dei.","title":"Vulgate: Ezra: Ezra Chapter 8","type":"page"}