{"collection":"Bible & Christianity","html_url":"https://unchartedknowledge.5gfusion.net/browse/bib/vul/ezr010.htm","path":"bib/vul/ezr010.htm","source_url":"https://sacred-texts.com/bib/vul/ezr010.htm","text":"1 Sic ergo orante Esdra, et implorante eo et flente, et jacente ante templum Dei, collectus est ad eum de Isra\u00ebl c\u0153tus grandis nimis virorum et mulierum et puerorum, et flevit populus fletu multo.\n2 Et respondit Sechenias filius Jehiel de filiis \u00c6lam, et dixit Esdr\u00e6: Nos pr\u00e6varicati sumus in Deum nostrum, et duximus uxores alienigenas de populis terr\u00e6: et nunc, si est p\u0153nitentia in Isra\u00ebl super hoc,\n3 percutiamus f\u0153dus cum Domino Deo nostro, ut projiciamus universas uxores, et eos qui de his nati sunt, juxta voluntatem Domini, et eorum qui timent pr\u00e6ceptum Domini Dei nostri: secundum legem fiat.\n4 Surge, tuum est decernere, nosque erimus tecum: confortare, et fac.\n5 Surrexit ergo Esdras, et adjuravit principes sacerdotum et Levitarum, et omnem Isra\u00ebl, ut facerent secundum verbum hoc: et juraverunt.\n6 Et surrexit Esdras ante domum Dei, et abiit ad cubiculum Johanan filii Eliasib, et ingressus est illuc: panem non comedit, et aquam non bibit: lugebat enim transgressionem eorum, qui venerant de captivitate.\n7 Et missa est vox in Juda et in Jerusalem omnibus filiis transmigrationis, ut congregarentur in Jerusalem:\n8 et omnis qui non venerit in tribus diebus juxta consilium principum et seniorum, auferetur universa substantia ejus, et ipse abjicietur de c\u0153tu transmigrationis.\n9\u00a0Convenerunt igitur omnes viri Juda et Benjamin in Jerusalem tribus diebus: ipse est mensis nonus, vigesimo die mensis: et sedit omnis populus in platea domus Dei, trementes pro peccato, et pluviis.\n \n10 Et surrexit Esdras sacerdos, et dixit ad eos: Vos transgressi estis, et duxistis uxores alienigenas, ut adderetis super delictum Isra\u00ebl.\n11 Et nunc date confessionem Domino Deo patrum vestrorum, et facite placitum ejus, et separamini a populis terr\u00e6, et ab uxoribus alienigenis.\n12 Et respondit universa multitudo, dixitque voce magna: Juxta verbum tuum ad nos, sic fiat.\n13 Verumtamen quia populus multus est, et tempus pluvi\u00e6, et non sustinemus stare foris, et opus non est diei unius vel duorum (vehementer quippe peccavimus in sermone isto),\n14 constituantur principes in universa multitudine: et omnes in civitatibus nostris qui duxerunt uxores alienigenas veniant in temporibus statutis, et cum his seniores per civitatem et civitatem, et judices ejus, donec avertatur ira Dei nostri a nobis super peccato hoc.\n15 Igitur Jonathan filius Azahel, et Jaasia filius Thecue, steterunt super hoc, et Messollam et Sebethai Levites adjuverunt eos:\n16 feceruntque sic filii transmigrationis. Et abierunt Esdras sacerdos, et viri principes familiarum, in domos patrum suorum, et omnes per nomina sua, et sederunt in die primo mensis decimi ut qu\u00e6rerent rem.\n17\u00a0Et consummati sunt omnes viri, qui duxerant uxores alienigenas, usque ad diem primam mensis primi.\n \n18 Et inventi sunt de filiis sacerdotum qui duxerant uxores alienigenas. De filiis Josue filii Josedec, et fratres ejus, Maasia, et Eliezer, et Jarib, et Godolia.\n19 Et dederunt manus suas ut ejicerent uxores suas, et pro delicto suo arietem de ovibus offerrent.\n20 Et de filiis Emmer, Hanani, et Zebedia.\n21 Et de filiis Harim, Maasia, et Elia, et Semeia, et Jehiel, et Ozias.\n22 Et de filiis Pheshur, Elio\u00ebnai, Maasia, Isma\u00ebl, Nathana\u00ebl, Jozabed, et Elasa.\n23 Et de filiis Levitarum, Jozabed, et Semei, et Celaia, ipse est Calita, Phataia, Juda, et Eliezer.\n24 Et de cantoribus, Eliasib. Et de janitoribus, Sellum, et Telem, et Uri.\n25 Et ex Isra\u00ebl, de filiis Pharos, Remeia, et Jesia, et Melchia, et Miamin, et Eliezer, et Melchia, et Banea.\n26 Et de filiis \u00c6lam, Mathania, Zacharias, et Jehiel, et Abdi, et Jerimoth, et Elia.\n27 Et de filiis Zethua, Elio\u00ebnai, Eliasib, Mathania, et Jerimuth, et Zabad, et Aziza.\n28 Et de filiis Bebai, Johanan, Hanania, Zabbai, Athalai.\n29 Et de filiis Bani, Mosollam, et Melluch, et Adaia, Jasub, et Saal, et Ramoth.\n30 Et de filiis Phahath Moab, Edna, et Chalal, Banaias, et Maasias, Mathanias, Beseleel, Bennui, et Manasse.\n31 Et de filiis Herem, Eliezer, Josue, Melchias, Semeias, Simeon,\n32 Benjamin, Maloch, Samarias.\n33 Et de filiis Hasom, Mathanai, Mathatha, Zabad, Eliphelet, Jermai, Manasse, Semei.\n34 De filiis Bani, Maadi, Amram, et Vel,\n35 Baneas, et Badaias, Cheliau,\n36 Vania, Marimuth, et Eliasib,\n37 Mathanias, Mathanai, et Jasi,\n38 et Bani, et Bennui, Semei,\n39 et Salmias, et Nathan, et Adaias,\n40 et Mechnedebai, Sisai, Sarai,\n41 Ezrel, et Selemiau, Semeria,\n42 Sellum, Amaria, Joseph.\n43 De filiis Nebo, Jehiel, Mathathias, Zabad, Zabina, Jeddu, et Jo\u00ebl, et Banaia.\n44 Omnes hi acceperant uxores alienigenas, et fuerunt ex eis mulieres, qu\u00e6 pepererant filios.","title":"Vulgate: Ezra: Ezra Chapter 10","type":"page"}