{"collection":"Bible & Christianity","html_url":"https://unchartedknowledge.5gfusion.net/browse/bib/vul/gen015.htm","path":"bib/vul/gen015.htm","source_url":"https://sacred-texts.com/bib/vul/gen015.htm","text":"1 His itaque transactis, factus est sermo Domini ad Abram per visionem dicens: Noli timere, Abram: ego protector tuus sum, et merces tua magna nimis.\n2 Dixitque Abram: Domine Deus, quid dabis mihi? ego vadam absque liberis, et filius procuratoris domus me\u00e6 iste Damascus Eliezer.\n3 Addiditque Abram: Mihi autem non dedisti semen, et ecce vernaculus meus, h\u00e6res meus erit.\n4 Statimque sermo Domini factus est ad eum, dicens: Non erit hic h\u00e6res tuus, sed qui egredietur de utero tuo, ipsum habebis h\u00e6redem.\n5 Eduxitque eum foras, et ait illi: Suscipe c\u00e6lum, et numera stellas, si potes. Et dixit ei: Sic erit semen tuum.\n6 Credidit Abram Deo, et reputatum est illi ad justitiam.\n7 Dixitque ad eum: Ego Dominus qui eduxi te de Ur Chald\u00e6orum ut darem tibi terram istam, et possideres eam.\n8 At ille ait: Domine Deus, unde scire possum quod possessurus sim eam?\n9 Et respondens Dominus: Sume, inquit, mihi vaccam triennem, et capram trimam, et arietem annorum trium, turturem quoque et columbam.\n10 Qui tollens universa h\u00e6c, divisit ea per medium, et utrasque partes contra se altrinsecus posuit; aves autem non divisit.\n11 Descenderuntque volucres super cadavera, et abigebat eas Abram.\n12 Cumque sol occumberet, sopor irruit super Abram, et horror magnus et tenebrosus invasit eum.\n13 Dictumque est ad eum: Scito pr\u00e6noscens quod peregrinum futurum sit semen tuum in terra non sua, et subjicient eos servituti, et affligent quadringentis annis.\n14 Verumtamen gentem, cui servituri sunt, ego judicabo: et post h\u00e6c egredientur cum magna substantia.\n15 Tu autem ibis ad patres tuos in pace, sepultus in senectute bona.\n16 Generatione autem quarta revertentur huc: necdum enim complet\u00e6 sunt iniquitates Amorrh\u00e6orum usque ad pr\u00e6sens tempus.\n17 Cum ergo occubuisset sol, facta est caligo tenebrosa, et apparuit clibanus fumans, et lampas ignis transiens inter divisiones illas.\n18 In illo die pepigit Dominus f\u0153dus cum Abram, dicens: Semini tuo dabo terram hanc a fluvio \u00c6gypti usque ad fluvium magnum Euphraten,\n19 Cin\u00e6os, et Cenez\u00e6os, Cedmon\u00e6os,\n20 et Heth\u00e6os, et Pherez\u00e6os, Raphaim quoque,\n21 et Amorrh\u00e6os, et Chanan\u00e6os, et Gerges\u00e6os, et Jebus\u00e6os.","title":"Vulgate: Genesis: Genesis Chapter 15","type":"page"}