{"collection":"Bible & Christianity","html_url":"https://unchartedknowledge.5gfusion.net/browse/bib/vul/gen016.htm","path":"bib/vul/gen016.htm","source_url":"https://sacred-texts.com/bib/vul/gen016.htm","text":"1 Igitur Sarai, uxor Abram, non genuerat liberos: sed habens ancillam \u00e6gyptiam nomine Agar,\n2 dixit marito suo: Ecce, conclusit me Dominus, ne parerem. Ingredere ad ancillam meam, si forte saltem ex illa suscipiam filios. Cumque ille acquiesceret deprecanti,\n3 tulit Agar \u00e6gyptiam ancillam suam post annos decem quam habitare c\u0153perant in terra Chanaan: et dedit eam viro suo uxorem.\n4 Qui ingressus est ad eam. At illa concepisse se videns, despexit dominam suam.\n5 Dixitque Sarai ad Abram: Inique agis contra me: ego dedi ancillam meam in sinum tuum, qu\u00e6 videns quod conceperit, despectui me habet: judicet Dominus inter me et te.\n6 Cui respondens Abram: Ecce, ait, ancilla tua in manu tua est, utere ea ut libet. Affligente igitur eam Sarai, fugam iniit.\n7 Cumque invenisset eam angelus Domini juxta fontem aqu\u00e6 in solitudine, qui est in via Sur in deserto,\n8 dixit ad illam: Agar ancilla Sarai, unde venis? et quo vadis? Qu\u00e6 respondit: A facie Sarai domin\u00e6 me\u00e6 ego fugio.\n9 Dixitque ei angelus Domini: Revertere ad dominam tuam, et humiliare sub manu illius.\n10 Et rursum: Multiplicans, inquit, multiplicabo semen tuum, et non numerabitur pr\u00e6 multitudine.\n11 Ac deinceps: Ecce, ait, concepisti, et paries filium: vocabisque nomen ejus Isma\u00ebl, eo quod audierit Dominus afflictionem tuam.\n12 Hic erit ferus homo: manus ejus contra omnes, et manus omnium contra eum: et e regione universorum fratrum suorum figet tabernacula.\n13 Vocavit autem nomen Domini qui loquebatur ad eam: Tu Deus qui vidisti me. Dixit enim: Profecto hic vidi posteriora videntis me.\n14 Propterea appellavit puteum illum Puteum viventis et videntis me. Ipse est inter Cades et Barad.\n15 Peperitque Agar Abr\u00e6 filium: qui vocavit nomen ejus Isma\u00ebl.\n16 Octoginta et sex annorum erat Abram quando peperit ei Agar Isma\u00eblem.","title":"Vulgate: Genesis: Genesis Chapter 16","type":"page"}