{"collection":"Bible & Christianity","html_url":"https://unchartedknowledge.5gfusion.net/browse/bib/vul/gen023.htm","path":"bib/vul/gen023.htm","source_url":"https://sacred-texts.com/bib/vul/gen023.htm","text":"1 Vixit autem Sara centum viginti septem annis.\n2 Et mortua est in civitate Arbee, qu\u00e6 est Hebron, in terra Chanaan: venitque Abraham ut plangeret et fleret eam.\n3 Cumque surrexisset ab officio funeris, locutus est ad filios Heth, dicens:\n4 Advena sum et peregrinus apud vos: date mihi jus sepulchri vobiscum, ut sepeliam mortuum meum.\n5 Responderunt filii Heth, dicentes:\n6 Audi nos, domine: princeps Dei es apud nos: in electis sepulchris nostris sepeli mortuum tuum, nullusque te prohibere poterit quin in monumento ejus sepelias mortuum tuum.\n7 Surrexit Abraham, et adoravit populum terr\u00e6, filios videlicet Heth:\n8 dixitque ad eos: Si placet anim\u00e6 vestr\u00e6 ut sepeliam mortuum meum, audite me, et intercedite pro me apud Ephron filium Seor:\n9 ut det mihi speluncam duplicem, quam habet in extrema parte agri sui: pecunia digna tradat eam mihi coram vobis in possessionem sepulchri.\n10 Habitabat autem Ephron in medio filiorum Heth. Responditque Ephron ad Abraham, cunctis audientibus qui ingrediebantur portam civitatis illius, dicens:\n11 Nequaquam ita fiat, domine mi, sed tu magis ausculta quod loquor. Agrum trado tibi, et speluncam qu\u00e6 in eo est, pr\u00e6sentibus filiis populi mei; sepeli mortuum tuum.\n12 Adoravit Abraham coram populo terr\u00e6.\n13 Et locutus est ad Ephron circumstante plebe: Qu\u00e6so ut audias me: dabo pecuniam pro agro: suscipe eam, et sic sepeliam mortuum meum in eo.\n14 Responditque Ephron:\n15 Domine mi, audi me: terra, quam postulas, quadringentis siclis argenti valet: istud est pretium inter me et te: sed quantum est hoc? sepeli mortuum tuum.\n16 Quod cum audisset Abraham, appendit pecuniam, quam Ephron postulaverat, audientibus filiis Heth, quadringentos siclos argenti probat\u00e6 monet\u00e6 public\u00e6.\n17 Confirmatusque est ager quondam Ephronis, in quo erat spelunca duplex, respiciens Mambre, tam ipse, quam spelunca, et omnes arbores ejus in cunctis terminis ejus per circuitum,\n18 Abrah\u00e6 in possessionem, videntibus filiis Heth, et cunctis qui intrabant portam civitatis illius.\n19 Atque ita sepelivit Abraham Saram uxorem suam in spelunca agri duplici, qu\u00e6 respiciebat Mambre. H\u00e6c est Hebron in terra Chanaan.\n20 Et confirmatus est ager, et antrum quod erat in eo, Abrah\u00e6 in possessionem monumenti a filiis Heth.","title":"Vulgate: Genesis: Genesis Chapter 23","type":"page"}