{"collection":"Bible & Christianity","html_url":"https://unchartedknowledge.5gfusion.net/browse/bib/vul/gen024.htm","path":"bib/vul/gen024.htm","source_url":"https://sacred-texts.com/bib/vul/gen024.htm","text":"1 Erat autem Abraham senex, dierumque multorum: et Dominus in cunctis benedixerat ei.\n2 Dixitque ad servum seniorem domus su\u00e6, qui pr\u00e6erat omnibus qu\u00e6 habebat: Pone manum tuam subter femur meum,\n3 ut adjurem te per Dominum Deum c\u00e6li et terr\u00e6, ut non accipias uxorem filio meo de filiabus Chanan\u00e6orum, inter quos habito:\n4 sed ad terram et cognationem meam proficiscaris et inde accipias uxorem filio meo Isaac.\n5 Respondit servus: Si noluerit mulier venire mecum in terram hanc, numquid reducere debeo filium tuum ad locum, de quo egressus es?\n6 Dixitque Abraham: Cave nequando reducas filium meum illuc.\n7 Dominus Deus c\u00e6li, qui tulit me de domo patris mei, et de terra nativitatis me\u00e6, qui locutus est mihi, et juravit mihi, dicens: Semini tuo dabo terram hanc: ipse mittet angelum suum coram te, et accipies inde uxorem filio meo:\n8 sin autem mulier noluerit sequi te, non teneberis juramento: filium meum tantum ne reducas illuc.\n9 Posuit ergo servus manum sub femore Abraham domini sui, et juravit illi super sermone hoc.\n10 Tulitque decem camelos de grege domini sui, et abiit, ex omnibus bonis ejus portans secum, profectusque perrexit in Mesopotamiam ad urbem Nachor.\n11 Cumque camelos fecisset accumbere extra oppidum juxta puteum aqu\u00e6 vespere, tempore quo solent mulieres egredi ad hauriendam aquam, dixit:\n12 Domine Deus domini mei Abraham, occurre, obsecro, mihi hodie, et fac misericordiam cum domino meo Abraham.\n13 Ecce ego sto prope fontem aqu\u00e6, et fili\u00e6 habitatorum hujus civitatis egredientur ad hauriendam aquam.\n14 Igitur puella, cui ego dixero: Inclina hydriam tuam ut bibam: et illa responderit: Bibe, quin et camelis tuis dabo potum: ipsa est quam pr\u00e6parasti servo tuo Isaac: et per hoc intelligam quod feceris misericordiam cum domino meo.\n15 Necdum intra se verba compleverat, et ecce Rebecca egrediebatur, filia Bathuel, filii Melch\u00e6 uxoris Nachor fratris Abraham, habens hydriam in scapula sua:\n16 puella decora nimis, virgoque pulcherrima, et incognita viro: descenderat autem ad fontem, et impleverat hydriam, ac revertebatur.\n17 Occurritque ei servus, et ait: Pauxillum aqu\u00e6 mihi ad bibendum pr\u00e6be de hydria tua.\n18 Qu\u00e6 respondit: Bibe, domine mi: celeriterque deposuit hydriam super ulnam suam, et dedit ei potum.\n19 Cumque ille bibisset, adjecit: Quin et camelis tuis hauriam aquam, donec cuncti bibant.\n20 Effundensque hydriam in canalibus, recurrit ad puteum ut hauriret aquam: et haustam omnibus camelis dedit.\n21 Ipse autem contemplabatur eam tacitus, scire volens utrum prosperum iter suum fecisset Dominus, an non.\n22 Postquam autem biberunt cameli, protulit vir inaures aureas, appendentes siclos duos, et armillas totidem pondo siclorum decem.\n23 Dixitque ad eam: Cujus es filia? indica mihi, est in domo patris tui locus ad manendum?\n24 Qu\u00e6 respondit: Filia sum Bathuelis, filii Melch\u00e6, quem peperit ipsi Nachor.\n25 Et addidit, dicens: Palearum quoque et f\u0153ni plurimum est apud nos, et locus spatiosus ad manendum.\n26 Inclinavit se homo, et adoravit Dominum,\n27\u00a0dicens: Benedictus Dominus Deus domini mei Abraham, qui non abstulit misericordiam et veritatem suam a domino meo, et recto itinere me perduxit in domum fratris domini mei.\n \n28 Cucurrit itaque puella, et nuntiavit in domum matris su\u00e6 omnia qu\u00e6 audierat.\n29 Habebat autem Rebecca fratrem nomine Laban, qui festinus egressus est ad hominem, ubi erat fons.\n30 Cumque vidisset inaures et armillas in manibus sororis su\u00e6, et audisset cuncta verba referentis: H\u00e6c locutus est mihi homo: venit ad virum qui stabat juxta camelos, et prope fontem aqu\u00e6:\n31 dixitque ad eum: Ingredere, benedicte Domini: cur foris stas? pr\u00e6paravi domum, et locum camelis.\n32 Et introduxit eum in hospitium: ac destravit camelos, deditque paleas et f\u0153num, et aquam ad lavandos pedes ejus, et virorum qui venerant cum eo.\n33 Et appositus est in conspectu ejus panis. Qui ait: Non comedam, donec loquar sermones meos. Respondit ei: Loquere.\n34 At ille: Servus, inquit, Abraham sum:\n35 et Dominus benedixit domino meo valde, magnificatusque est: et dedit ei oves et boves, argentum et aurum, servos et ancillas, camelos et asinos.\n36 Et peperit Sara uxor domini mei filium domino meo in senectute sua, deditque illi omnia qu\u00e6 habuerat.\n37 Et adjuravit me dominus meus, dicens: Non accipies uxorem filio meo de filiabus Chanan\u00e6orum, in quorum terra habito:\n38 sed ad domum patris mei perges, et de cognatione mea accipies uxorem filio meo.\n39 Ego vero respondi domino meo: Quid si noluerit venire mecum mulier?\n40 Dominus, ait, in cujus conspectu ambulo, mittet angelum suum tecum, et diriget viam tuam: accipiesque uxorem filio meo de cognatione mea, et de domo patris mei.\n41 Innocens eris a maledictione mea, cum veneris ad propinquos meos, et non dederint tibi.\n42 Veni ergo hodie ad fontem aqu\u00e6, et dixi: Domine Deus domini mei Abraham, si direxisti viam meam, in qua nunc ambulo,\n43 ecce sto juxta fontem aqu\u00e6, et virgo, qu\u00e6 egredietur ad hauriendam aquam, audierit a me: Da mihi pauxillum aqu\u00e6 ad bibendum ex hydria tua:\n44 et dixerit mihi: Et tu bibe, et camelis tuis hauriam: ipsa est mulier, quam pr\u00e6paravit Dominus filio domini mei.\n45 Dumque h\u00e6c tacitus mecum volverem, apparuit Rebecca veniens cum hydria, quam portabat in scapula: descenditque ad fontem, et hausit aquam. Et aio ad eam: Da mihi paululum bibere.\n46 Qu\u00e6 festinans deposuit hydriam de humero, et dixit mihi: Et tu bibe, et camelis tuis tribuam potum. Bibi, et adaquavit camelos.\n47 Interrogavique eam, et dixi: Cujus es filia? Qu\u00e6 respondit: Filia Bathuelis sum, filii Nachor, quem peperit ei Melcha. Suspendi itaque inaures ad ornandam faciem ejus, et armillas posui in manibus ejus.\n48 Pronusque adoravi Dominum, benedicens Domino Deo domini mei Abraham, qui perduxit me recto itinere, ut sumerem filiam fratris domini mei filio ejus.\n49\u00a0Quam ob rem si facitis misericordiam et veritatem cum domino meo, indicate mihi: sin autem aliud placet, et hoc dicite mihi, ut vadam ad dextram, sive ad sinistram.\n \n50 Responderuntque Laban et Bathuel: A Domino egressus est sermo: non possumus extra placitum ejus quidquam aliud loqui tecum.\n51 En Rebecca coram te est, tolle eam, et proficiscere, et sit uxor filii domini tui, sicut locutus est Dominus.\n52 Quod cum audisset puer Abraham, procidens adoravit in terram Dominum.\n53 Prolatisque vasis argenteis, et aureis, ac vestibus, dedit ea Rebecca pro munere: fratribus quoque ejus et matri dona obtulit.\n54 Inito convivio, vescentes pariter et bibentes manserunt ibi. Surgens autem mane, locutus est puer: Dimitte me, ut vadam ad dominum meum.\n55 Responderuntque fratres ejus et mater: Maneat puella saltem decem dies apud nos, et postea proficiscetur.\n56 Nolite, ait, me retinere, quia Dominus direxit viam meam: dimittite me ut pergam ad dominum meum.\n57 Et dixerunt: Vocemus puellam, et qu\u00e6ramus ipsius voluntatem.\n58 Cumque vocata venisset, sciscitati sunt: Vis ire cum homine isto? Qu\u00e6 ait: Vadam.\n59 Dimiserunt ergo eam, et nutricem illius, servumque Abraham, et comites ejus,\n60 imprecantes prospera sorori su\u00e6, atque dicentes: Soror nostra es, crescas in mille millia, et possideat semen tuum portas inimicorum suorum.\n61 Igitur Rebecca et puell\u00e6 illius, ascensis camelis, secut\u00e6 sunt virum: qui festinus revertebatur ad dominum suum.\n62 Eo autem tempore deambulabat Isaac per viam qu\u00e6 ducit ad puteum, cujus nomen est Viventis et videntis: habitabat enim in terra australi:\n63 et egressus fuerat ad meditandum in agro, inclinata jam die: cumque elevasset oculos, vidit camelos venientes procul.\n64 Rebecca quoque, conspecto Isaac, descendit de camelo,\n65 et ait ad puerum: Quis est ille homo qui venit per agrum in occursum nobis? Dixitque ei: Ipse est dominus meus. At illa tollens cito pallium, operuit se.\n66 Servus autem cuncta, qu\u00e6 gesserat, narravit Isaac.\n67 Qui introduxit eam in tabernaculum Sar\u00e6 matris su\u00e6, et accepit eam uxorem: et in tantum dilexit eam, ut dolorem, qui ex morte matris ejus acciderat, temperaret.","title":"Vulgate: Genesis: Genesis Chapter 24","type":"page"}