{"collection":"Bible & Christianity","html_url":"https://unchartedknowledge.5gfusion.net/browse/bib/vul/gen029.htm","path":"bib/vul/gen029.htm","source_url":"https://sacred-texts.com/bib/vul/gen029.htm","text":"1 Profectus ergo Jacob venit in terram orientalem.\n2 Et vidit puteum in agro, tres quoque greges ovium accubantes juxta eum: nam ex illo adaquabantur pecora, et os ejus grandi lapide claudebatur.\n3 Morisque erat ut cunctis ovibus congregatis devolverent lapidem, et refectis gregibus rursum super os putei ponerent.\n4 Dixitque ad pastores: Fratres, unde estis? Qui responderunt: De Haran.\n5 Quos interrogans, Numquid, ait, nostis Laban filium Nachor? Dixerunt: Novimus.\n6 Sanusne est? inquit. Valet, inquiunt: et ecce Rachel filia ejus venit cum grege suo.\n7 Dixitque Jacob: Adhuc multum diei superest, nec est tempus ut reducantur ad caulas greges: date ante potum ovibus, et sic eas ad pastum reducite.\n8 Qui responderunt: Non possumus, donec omnia pecora congregentur, et amoveamus lapidem de ore putei, ut adaquemus greges.\n9 Adhuc loquebantur, et ecce Rachel veniebat cum ovibus patris sui: nam gregem ipsa pascebat.\n10 Quam cum vidisset Jacob, et sciret consobrinam suam, ovesque Laban avunculi sui, amovit lapidem quo puteus claudebatur.\n11 Et adaquato grege, osculatus est eam: et elevata voce flevit,\n12 et indicavit ei quod frater esset patris sui, et filius Rebecc\u00e6: at illa festinans nuntiavit patri suo.\n13 Qui cum audisset venisse Jacob filium sororis su\u00e6, cucurrit obviam ei: complexusque eum, et in oscula ruens, duxit in domum suam. Auditis autem causis itineris,\n14 respondit: Os meum es, et caro mea. Et postquam impleti sunt dies mensis unius,\n15\u00a0dixit ei: Num quia frater meus es, gratis servies mihi? dic quid mercedis accipias.\n \n16 Habebat vero duas filias: nomen majoris Lia, minor vero appellabatur Rachel.\n17 Sed Lia lippis erat oculis: Rachel decora facie, et venusto aspectu.\n18 Quam diligens Jacob, ait: Serviam tibi pro Rachel filia tua minore, septem annis.\n19 Respondit Laban: Melius est ut tibi eam dem quam alteri viro: mane apud me.\n20 Servivit ergo Jacob pro Rachel septem annis: et videbantur illi pauci dies pr\u00e6 amoris magnitudine.\n21 Dixitque ad Laban: Da mihi uxorem meam: quia jam tempus impletum est, ut ingrediar ad illam.\n22 Qui vocatis multis amicorum turbis ad convivium, fecit nuptias.\n23 Et vespere Liam filiam suam introduxit ad eum,\n24 dans ancillam fili\u00e6, Zelpham nomine. Ad quam cum ex more Jacob fuisset ingressus, facto mane vidit Liam:\n25 et dixit ad socerum suum: Quid est quod facere voluisti? nonne pro Rachel servivi tibi? quare imposuisti mihi?\n26 Respondit Laban: Non est in loco nostro consuetudinis, ut minores ante tradamus ad nuptias.\n27 Imple hebdomadam dierum hujus copul\u00e6: et hanc quoque dabo tibi pro opere quo serviturus es mihi septem annis aliis.\n28 Acquievit placito: et hebdomada transacta, Rachel duxit uxorem:\n29 cui pater servam Balam tradiderat.\n30\u00a0Tandemque potitus optatis nuptiis, amorem sequentis priori pr\u00e6tulit, serviens apud eum septem annis aliis.\n \n31 Videns autem Dominus quod despiceret Liam, aperuit vulvam ejus, sorore sterili permanente.\n32 Qu\u00e6 conceptum genuit filium, vocavitque nomen ejus Ruben, dicens: Vidit Dominus humilitatem meam: nunc amabit me vir meus.\n33 Rursumque concepit et peperit filium, et ait: Quoniam audivit me Dominus haberi contemptui, dedit etiam istum mihi; vocavitque nomen ejus Simeon.\n34 Concepitque tertio, et genuit alium filium: dixitque: Nunc quoque copulabitur mihi maritus meus: eo quod pepererim ei tres filios: et idcirco appellavit nomen ejus Levi.\n35 Quarto concepit, et peperit filium, et ait: Modo confitebor Domino, et ob hoc vocavit eum Judam: cessavitque parere.","title":"Vulgate: Genesis: Genesis Chapter 29","type":"page"}