{"collection":"Bible & Christianity","html_url":"https://unchartedknowledge.5gfusion.net/browse/bib/vul/gen040.htm","path":"bib/vul/gen040.htm","source_url":"https://sacred-texts.com/bib/vul/gen040.htm","text":"1 His ita gestis, accidit ut peccarent duo eunuchi, pincerna regis \u00c6gypti, et pistor, domino suo.\n2 Iratusque contra eos Pharao (nam alter pincernis pr\u00e6erat, alter pistoribus),\n3 misit eos in carcerem principis militum, in quo erat vinctus et Joseph.\n4 At custos carceris tradidit eos Joseph, qui et ministrabat eis: aliquantulum temporis fluxerat, et illi in custodia tenebantur.\n5 Videruntque ambo somnium nocte una, juxta interpretationem congruam sibi:\n6 ad quos cum introisset Joseph mane, et vidisset eos tristes,\n7 sciscitatus est eos, dicens: Cur tristior est hodie solito facies vestra?\n8 Qui responderunt: Somnium vidimus, et non est qui interpretetur nobis. Dixitque ad eos Joseph: Numquid non Dei est interpretatio? referte mihi quid videritis.\n9 Narravit prior, pr\u00e6positus pincernarum, somnium suum: Videbam coram me vitem,\n10 in qua erant tres propagines, crescere paulatim in gemmas, et post flores uvas maturescere:\n11 calicemque Pharaonis in manu mea: tuli ergo uvas, et expressi in calicem quem tenebam, et tradidi poculum Pharaoni.\n12 Respondit Joseph: H\u00e6c est interpretatio somnii: tres propagines, tres adhuc dies sunt:\n13 post quos recordabitur Pharao ministerii tui, et restituet te in gradum pristinum: dabisque ei calicem juxta officium tuum, sicut ante facere consueveras.\n14 Tantum memento mei, cum bene tibi fuerit, et facias mecum misericordiam: ut suggeras Pharaoni ut educat me de isto carcere:\n15 quia furto sublatus sum de terra Hebr\u00e6orum, et hic innocens in lacum missus sum.\n16 Videns pistorum magister quod prudenter somnium dissolvisset, ait: Et ego vidi somnium: quod tria canistra farin\u00e6 haberem super caput meum:\n17 et in uno canistro quod erat excelsius, portare me omnes cibos qui fiunt arte pistoria, avesque comedere ex eo.\n18 Respondit Joseph: H\u00e6c est interpretatio somnii: tria canistra, tres adhuc dies sunt:\n19 post quos auferet Pharao caput tuum, ac suspendet te in cruce, et lacerabunt volucres carnes tuas.\n20 Exinde dies tertius natalitius Pharaonis erat: qui faciens grande convivium pueris suis, recordatus est inter epulas magistri pincernarum, et pistorum principis.\n21 Restituitque alterum in locum suum, ut porrigeret ei poculum:\n22 alterum suspendit in patibulo, ut conjectoris veritas probaretur.\n23 Et tamen succedentibus prosperis, pr\u00e6positus pincernarum oblitus est interpretis sui.","title":"Vulgate: Genesis: Genesis Chapter 40","type":"page"}