{"collection":"Bible & Christianity","html_url":"https://unchartedknowledge.5gfusion.net/browse/bib/vul/gen041.htm","path":"bib/vul/gen041.htm","source_url":"https://sacred-texts.com/bib/vul/gen041.htm","text":"1 Post duos annos vidit Pharao somnium. Putabat se stare super fluvium,\n2 de quo ascendebant septem boves, pulchr\u00e6 et crass\u00e6 nimis: et pascebantur in locis palustribus.\n3 Ali\u00e6 quoque septem emergebant de flumine, f\u0153d\u00e6 confect\u00e6que macie: et pascebantur in ipsa amnis ripa in locis virentibus:\n4 devoraveruntque eas, quarum mira species et habitudo corporum erat. Expergefactus Pharao,\n5 rursum dormivit, et vidit alterum somnium: septem spic\u00e6 pullulabant in culmo uno plen\u00e6 atque formos\u00e6:\n6 ali\u00e6 quoque totidem spic\u00e6 tenues, et percuss\u00e6 uredine oriebantur,\n7 devorantes omnium priorum pulchritudinem. Evigilans Pharao post quietem,\n8 et facto mane, pavore perterritus, misit ad omnes conjectores \u00c6gypti, cunctosque sapientes, et accersitis narravit somnium, nec erat qui interpretaretur.\n9 Tunc demum reminiscens pincernarum magister, ait: Confiteor peccatum meum:\n10 iratus rex servis suis, me et magistrum pistorum retrudi jussit in carcerem principis militum:\n11 ubi una nocte uterque vidimus somnium pr\u00e6sagum futurorum.\n12 Erat ibi puer hebr\u00e6us, ejusdem ducis militum famulus: cui narrantes somnia,\n13 audivimus quidquid postea rei probavit eventus; ego enim redditus sum officio meo, et ille suspensus est in cruce.\n14 Protinus ad regis imperium eductum de carcere Joseph totonderunt: ac veste mutata obtulerunt ei.\n15 Cui ille ait: Vidi somnia, nec est qui edisserat: qu\u00e6 audivi te sapientissime conjicere.\n16 Respondit Joseph: Absque me Deus respondebit prospera Pharaoni.\n17 Narravit ergo Pharao quod viderat: Putabam me stare super ripam fluminis,\n18 et septem boves de amne conscendere, pulchras nimis, et obesis carnibus: qu\u00e6 in pastu paludis virecta carpebant.\n19 Et ecce, has sequebantur ali\u00e6 septem boves, in tantum deformes et macilent\u00e6, ut numquam tales in terra \u00c6gypti viderim:\n20 qu\u00e6, devoratis et consumptis prioribus,\n21 nullum saturitatis dedere vestigium: sed simili macie et squalore torpebant. Evigilans, rursus sopore depressus,\n22 vidi somnium. Septem spic\u00e6 pullulabant in culmo uno plen\u00e6 atque pulcherrim\u00e6.\n23 Ali\u00e6 quoque septem tenues et percuss\u00e6 uredine, oriebantur e stipula:\n24 qu\u00e6 priorum pulchritudinem devoraverunt. Narravi conjectoribus somnium, et nemo est qui edisserat.\n25 Respondit Joseph: Somnium regis unum est: qu\u00e6 facturus est Deus, ostendit Pharaoni.\n26 Septem boves pulchr\u00e6, et septem spic\u00e6 plen\u00e6, septem ubertatis anni sunt: eamdemque vim somnii comprehendunt.\n27 Septem quoque boves tenues atque macilent\u00e6, qu\u00e6 ascenderunt post eas, et septem spic\u00e6 tenues, et vento urente percuss\u00e6, septem anni ventur\u00e6 sunt famis.\n28 Qui hoc ordine complebuntur:\n29 ecce septem anni venient fertilitatis magn\u00e6 in universa terra \u00c6gypti,\n30 quos sequentur septem anni alii tant\u00e6 sterilitatis, ut oblivioni tradatur cuncta retro abundantia: consumptura est enim fames omnem terram,\n31 et ubertatis magnitudinem perditura est inopi\u00e6 magnitudo.\n32 Quod autem vidisti secundo ad eamdem rem pertinens somnium: firmitatis indicium est, eo quod fiat sermo Dei, et velocius impleatur.\n33 Nunc ergo provideat rex virum sapientem et industrium, et pr\u00e6ficiat eum terr\u00e6 \u00c6gypti:\n34 qui constituat pr\u00e6positos per cunctas regiones: et quintam partem fructuum per septem annos fertilitatis,\n35 qui jam nunc futuri sunt, congreget in horrea: et omne frumentum sub Pharaonis potestate condatur, serveturque in urbibus.\n36 Et pr\u00e6paretur futur\u00e6 septem annorum fami, qu\u00e6 oppressura est \u00c6gyptum, et non consumetur terra inopia.\n37 Placuit Pharaoni consilium et cunctis ministris ejus:\n38 locutusque est ad eos: Num invenire poterimus talem virum, qui spiritu Dei plenus sit?\n39\u00a0Dixit ergo ad Joseph: Quia ostendit tibi Deus omnia qu\u00e6 locutus es, numquid sapientiorem et consimilem tui invenire potero?\n \n40 Tu eris super domum meam, et ad tui oris imperium cunctus populus obediet: uno tantum regni solio te pr\u00e6cedam.\n41 Dixitque rursus Pharao ad Joseph: Ecce, constitui te super universam terram \u00c6gypti.\n42 Tulitque annulum de manu sua, et dedit eum in manu ejus: vestivitque eum stola byssina, et collo torquem auream circumposuit.\n43 Fecitque eum ascendere super currum suum secundum, clamante pr\u00e6cone, ut omnes coram eo genu flecterent, et pr\u00e6positum esse scirent univers\u00e6 terr\u00e6 \u00c6gypti.\n44 Dixit quoque rex ad Joseph: Ego sum Pharao: absque tuo imperio non movebit quisquam manum aut pedem in omni terra \u00c6gypti.\n45 Vertitque nomen ejus, et vocavit eum, lingua \u00e6gyptiaca, Salvatorem mundi. Deditque illi uxorem Aseneth filiam Putiphare sacerdotis Heliopoleos. Egressus est itaque Joseph ad terram \u00c6gypti\n46 (triginta autem annorum erat quando stetit in conspectu regis Pharaonis), et circuivit omnes regiones \u00c6gypti.\n47 Venitque fertilitas septem annorum: et in manipulos redact\u00e6 segetes congregat\u00e6 sunt in horrea \u00c6gypti.\n48 Omnis etiam frugum abundantia in singulis urbibus condita est.\n49 Tantaque fuit abundantia tritici, ut aren\u00e6 maris co\u00e6quaretur, et copia mensuram excederet.\n50 Nati sunt autem Joseph filii duo antequam veniret fames: quos peperit ei Aseneth filia Putiphare sacerdotis Heliopoleos.\n51 Vocavitque nomen primogeniti Manasses, dicens: Oblivisci me fecit Deus omnium laborum meorum, et domus patris mei.\n52 Nomen quoque secundi appellavit Ephraim, dicens: Crescere me fecit Deus in terra paupertatis me\u00e6.\n53 Igitur transactis septem ubertatis annis, qui fuerant in \u00c6gypto,\n54 c\u0153perunt venire septem anni inopi\u00e6, quos pr\u00e6dixerat Joseph: et in universo orbe fames pr\u00e6valuit, in cuncta autem terra \u00c6gypti panis erat.\n55 Qua esuriente, clamavit populus ad Pharaonem, alimenta petens. Quibus ille respondit: Ite ad Joseph: et quidquid ipse vobis dixerit, facite.\n56 Crescebat autem quotidie fames in omni terra: aperuitque Joseph universa horrea, et vendebat \u00c6gyptiis: nam et illos oppresserat fames.\n57 Omnesque provinci\u00e6 veniebant in \u00c6gyptum, ut emerent escas, et malum inopi\u00e6 temperarent.","title":"Vulgate: Genesis: Genesis Chapter 41","type":"page"}