{"collection":"Bible & Christianity","html_url":"https://unchartedknowledge.5gfusion.net/browse/bib/vul/hab001.htm","path":"bib/vul/hab001.htm","source_url":"https://sacred-texts.com/bib/vul/hab001.htm","text":"1\u00a0Onus quod vidit Habacuc propheta.\n \n2\u00a0[Usquequo, Domine, clamabo,\n et non exaudies?\n vociferabor ad te, vim patiens,\n et non salvabis?\n3\u00a0Quare ostendisti mihi iniquitatem et laborem,\n videre pr\u00e6dam et injustitiam contra me?\n Et factum est judicium, et contradictio potentior.\n4\u00a0Propter hoc lacerata est lex,\n et non pervenit usque ad finem judicium;\n quia impius pr\u00e6valet adversus justum,\n propterea egreditur judicium perversum.\n5\u00a0Aspicite in gentibus, et videte;\n admiramini, et obstupescite:\n quia opus factum est in diebus vestris,\n quod nemo credet cum narrabitur.\n6\u00a0Quia ecce ego suscitabo Chald\u00e6os,\n gentem amaram et velocem,\n ambulantem super latitudinem terr\u00e6,\n ut possideat tabernacula non sua.\n7\u00a0Horribilis et terribilis est:\n ex semetipsa judicium et onus ejus egredietur.\n8\u00a0Leviores pardis equi ejus,\n et velociores lupis vespertinis:\n et diffundentur equites ejus:\n equites namque ejus de longe venient;\n volabunt quasi aquila festinans ad comedendum.\n9\u00a0Omnes ad pr\u00e6dam venient,\n facies eorum ventus urens;\n et congregabit quasi arenam captivitatem.\n10\u00a0Et ipse de regibus triumphabit,\n et tyranni ridiculi ejus erunt;\n ipse super omnem munitionem ridebit,\n et comportabit aggerem, et capiet eam.\n11\u00a0Tunc mutabitur spiritus, et pertransibit, et corruet:\n h\u00e6c est fortitudo ejus dei sui.]\n \n12\u00a0[Numquid non tu a principio,\n Domine, Deus meus, sancte meus,\n et non moriemur?\n Domine, in judicium posuisti eum,\n et fortem, ut corriperes, fundasti eum.\n13\u00a0Mundi sunt oculi tui, ne videas malum,\n et respicere ad iniquitatem non poteris.\n Quare respicis super iniqua agentes,\n et taces devorante impio justiorem se?\n14\u00a0Et facies homines quasi pisces maris,\n et quasi reptile non habens principem.\n15\u00a0Totum in hamo sublevavit,\n traxit illud in sagena sua,\n et congregavit in rete suum.\n Super hoc l\u00e6tabitur, et exsultabit.\n16\u00a0Propterea immolabit sagen\u00e6 su\u00e6,\n et sacrificabit reti suo,\n quia in ipsis incrassata est pars ejus,\n et cibus ejus electus.\n17\u00a0Propter hoc ergo expandit sagenam suam,\n et semper interficere gentes non parcet.]","title":"Vulgate: Habakkuk: Habakkuk Chapter 1","type":"page"}