{"collection":"Bible & Christianity","html_url":"https://unchartedknowledge.5gfusion.net/browse/bib/vul/hab002.htm","path":"bib/vul/hab002.htm","source_url":"https://sacred-texts.com/bib/vul/hab002.htm","text":"1\u00a0[Super custodiam meam stabo,\n et figam gradum super munitionem:\n et contemplabor ut videam quid dicatur mihi,\n et quid respondeam ad arguentem me.]\n \n2\u00a0Et respondit mihi Dominus, et dixit: [Scribe visum, et explana eum super tabulas,\n ut percurrat qui legerit eum.\n3\u00a0Quia adhuc visus procul;\n et apparebit in finem, et non mentietur:\n si moram fecerit, exspecta illum,\n quia veniens veniet, et non tardabit.\n4\u00a0Ecce qui incredulus est, non erit recta anima ejus in semetipso;\n justus autem in fide sua vivet.\n5\u00a0Et quomodo vinum potantem decipit,\n sic erit vir superbus, et non decorabitur:\n qui dilatavit quasi infernus animam suam,\n et ipse quasi mors, et non adimpletur:\n et congregabit ad se omnes gentes,\n et coacervabit ad se omnes populos.\n6\u00a0Numquid non omnes isti super eum parabolam sument,\n et loquelam \u00e6nigmatum ejus, et dicetur:\n V\u00e6 ei qui multiplicat non sua?\n usquequo et aggravat contra se densum lutum?\n7\u00a0Numquid non repente consurgent qui mordeant te,\n et suscitabuntur lacerantes te,\n et eris in rapinam eis?\n8\u00a0Quia tu spoliasti gentes multas,\n spoliabunt te omnes qui reliqui fuerint de populis,\n propter sanguinem hominis,\n et iniquitatem terr\u00e6, civitatis, et omnium habitantium in ea.\n9\u00a0V\u00e6 qui congregat avaritiam malam domui su\u00e6,\n ut sit in excelso nidus ejus,\n et liberari se putat de manu mali!\n10\u00a0Cogitasti confusionem domui tu\u00e6;\n concidisti populos multos,\n et peccavit anima tua.\n11\u00a0Quia lapis de pariete clamabit,\n et lignum, quod inter juncturas \u00e6dificiorum est, respondebit.\n12\u00a0V\u00e6 qui \u00e6dificat civitatem in sanguinibus,\n et pr\u00e6parat urbem in iniquitate!\n13\u00a0Numquid non h\u00e6c sunt a Domino exercituum?\n laborabunt enim populi in multo igne,\n et gentes in vacuum, et deficient.\n14\u00a0Quia replebitur terra, ut cognoscant gloriam Domini,\n quasi aqu\u00e6 operientes mare.\n15\u00a0V\u00e6 qui potum dat amico suo mittens fel suum,\n et inebrians ut aspiciat nuditatem ejus!\n16\u00a0Repletus es ignominia pro gloria;\n bibe tu quoque, et consopire.\n Circumdabit te calix dexter\u00e6 Domini,\n et vomitus ignomini\u00e6 super gloriam tuam.\n17\u00a0Quia iniquitas Libani operiet te,\n et vastitas animalium deterrebit eos\n de sanguinibus hominum,\n et iniquitate terr\u00e6, et civitatis, et omnium habitantium in ea.\n18\u00a0Quid prodest sculptile, quia sculpsit illud fictor suus,\n conflatile, et imaginem falsam?\n quia speravit in figmento fictor ejus, ut faceret simulacra muta.\n19\u00a0V\u00e6 qui dicit ligno: Expergiscere;\n Surge, lapidi tacenti!\n Numquid ipse docere poterit?\n ecce iste coopertus est auro et argento,\n et omnis spiritus non est in visceribus ejus.\n20\u00a0Dominus autem in templo sancto suo:\n sileat a facie ejus omnis terra!]","title":"Vulgate: Habakkuk: Habakkuk Chapter 2","type":"page"}