{"collection":"Bible & Christianity","html_url":"https://unchartedknowledge.5gfusion.net/browse/bib/vul/hab003.htm","path":"bib/vul/hab003.htm","source_url":"https://sacred-texts.com/bib/vul/hab003.htm","text":"1\u00a0Oratio Habacuc prophet\u00e6, pro ignorantiis.\n \n2\u00a0[Domine, audivi auditionem tuam, et timui.\n Domine, opus tuum, in medio annorum vivifica illud;\n in medio annorum notum facies:\n cum iratus fueris, misericordi\u00e6 recordaberis.\n3\u00a0Deus ab austro veniet,\n et Sanctus de monte Pharan:\n operuit c\u00e6los gloria ejus,\n et laudis ejus plena est terra.\n4\u00a0Splendor ejus ut lux erit,\n cornua in manibus ejus:\n ibi abscondita est fortitudo ejus.\n5\u00a0Ante faciem ejus ibit mors,\n et egredietur diabolus ante pedes ejus.\n6\u00a0Stetit, et mensus est terram;\n aspexit, et dissolvit gentes,\n et contriti sunt montes s\u00e6culi:\n incurvati sunt colles mundi ab itineribus \u00e6ternitatis ejus.\n7\u00a0Pro iniquitate vidi tentoria \u00c6thiopi\u00e6;\n turbabuntur pelles terr\u00e6 Madian.\n8\u00a0Numquid in fluminibus iratus es, Domine?\n aut in fluminibus furor tuus?\n vel in mari indignatio tua?\n Qui ascendes super equos tuos, et quadrig\u00e6 tu\u00e6 salvatio.\n9\u00a0Suscitans suscitabis arcum tuum,\n juramenta tribubus qu\u00e6 locutus es;\n fluvios scindes terr\u00e6.\n10\u00a0Viderunt te, et doluerunt montes;\n gurges aquarum transiit:\n dedit abyssus vocem suam;\n altitudo manus suas levavit.\n11\u00a0Sol et luna steterunt in habitaculo suo:\n in luce sagittarum tuarum ibunt,\n in splendore fulgurantis hast\u00e6 tu\u00e6.\n12\u00a0In fremitu conculcabis terram;\n in furore obstupefacies gentes.\n13\u00a0Egressus es in salutem populi tui,\n in salutem cum christo tuo:\n percussisti caput de domo impii,\n denudasti fundamentum ejus usque ad collum.\n14\u00a0Maledixisti sceptris ejus,\n capiti bellatorum ejus,\n venientibus ut turbo ad dispergendum me:\n exsultatio eorum, sicut ejus qui devorat pauperem in abscondito.\n15\u00a0Viam fecisti in mari equis tuis,\n in luto aquarum multarum.\n16\u00a0Audivi, et conturbatus est venter meus;\n a voce contremuerunt labia mea.\n Ingrediatur putredo in ossibus meis,\n et subter me scateat:\n ut requiescam in die tribulationis,\n ut ascendam ad populum accinctum nostrum.\n17\u00a0Ficus enim non florebit,\n et non erit germen in vineis;\n mentietur opus oliv\u00e6,\n et arva non afferent cibum:\n abscindetur de ovili pecus,\n et non erit armentum in pr\u00e6sepibus.\n18\u00a0Ego autem in Domino gaudebo;\n et exsultabo in Deo Jesu meo.\n19\u00a0Deus Dominus fortitudo mea,\n et ponet pedes meos quasi cervorum:\n et super excelsa mea deducet me\n victor in psalmis canentem.]","title":"Vulgate: Habakkuk: Habakkuk Chapter 3","type":"page"}